Covid 19-მა სხვა ბიზნესებთან ერთად მნიშვნელოვანი გავლენა ავეჯის მაღაზიებზეც იქონია. დიდი ფასდაკლებების მიუხედავად მათი ნაწილი გაყიდვების შემცირებაზე და უარყოფით მოლოდინებზე საუბრობს.

ავეჯის მაღაზიების „ლაბორატორია ჩემი სახლის“, „კარეს“ და „მობლერის“ მმართველი მენეჯერი გურამ მგელაძე „კომერსანტთან“ საუბრისას აღნიშნავს, რომ ამ ეტაპზე გაყიდვების მხრივ 30%-იანი კლება აქვთ, თუმცა შემოდგომიდან რადიკალურ შემცირებას ელოდებიან.

„მარტი-აპრილის პერიოდში ვცდილობდით, რომ დისტანციურად გვემუშავა, თუმცა იმ პერიოდში გაყიდვები ფაქტობრივად განულებული იყო. მაისში, გახსნის შემდეგ გაყიდვების თვალსაზრისით წინა წლის ანალოგიური სიტუაცია დაფიქსირდა, მაგრამ ივნისის თვეში ისევ კლება დაიწყო. ზაფხულის პერიოდი საკმაოდ აქტიურია ხოლმე გარე ავეჯზე მოთხოვნის თვალსაზრისით, რასაც წლევანდელ წელზე ვერ ვიტყვით. ამ ეტაპზე 30%-იანი კლება გვაქვს წინა წლის პერიოდთან შედარებით და ველოდებით რომ ივლისი-აგვისტოში ეს ტენდენცია გაგრძელდება. ვვარაუდობთ, რომ შემოდგომიდან კლება გაგრძელდება, ზაფხულის პერიოდი რომ გადაივლის და არსებული მძიმე ვითარება უფრო შესამჩნევი იქნება, ეს ჩვენზეც უარყოფითად აისახება. ავეჯი ფუფუნების საგნად შეიძლება ჩაითვალოს, რადგან მისი შეძენა აუცილებლობა არ არის, ავეჯის შეძენა ერთგვარი ინვესტიციია, რისი გადადებაც კრიზისის პერიოდში აქტიურად ხდება, ამიტომ სექტემბრიდან ველოდებით რომ გაყიდვები რადიკალურად შემცირდება. ამ კრიზისის პერიოდში მოგვიწია საკმაოდ დიდი ფასდაკლებების გაკეთება, თითქმის მთელი სეზონი ფასდაკლებებზე ვიმუშავეთ. წელს დავიწყეთ საბითუმო მიმართულებაზე მუშაობა და ვეთანამშრომლებით სხვადასხვა კორპორატიულ სეგმენტს პროექტების განხორციელებაში, ეს იქნება სასტუმროები, რესტორნები თუ ბიზნეს ცენტრები, თუმცა დეტალები მოგვიანებით იქნება ცნობილი“, - განმარტა გურამ მგელაძემ.

იტალიური ავეჯის სახლი „ვერონას“ ერთ-ერთი დამფუძნებელი არჩილ მგალობლიშვილი „კომერსანტთან“ საუბრისას აღნიშნავს, რომ პანდემიის მიუხედავად გაყიდვების რაოდენობა არ შემცირებულა, თუმცა შესაძლოა ამას მაღაზიის მიერ გამოცხადებულმა დიდმა ფასდაკლებებმაც შეუწყო ხელი.

„მომხმარებლების რაოდენობა არ შემცირებულა, პირიქით ახლა ისეთი სეზონია რომ ჩვენი მყიდველები აქტიურად მოდიან. რაც შეეხება გაყიდვებს,  შემცირება არ შეინიშნება,  თუმცა ეს შესაძლოა სხვა ფაქტმაც გამოიწვია, ახალ შენობაში გადავდივართ და გამოცხადებული გვაქვს ძალიან დიდი ფასდაკლება, შესაბამისად წინა წლის ანალოგიურ პერიოდთან შედარებით თითქმის მსგავსი ვითარებაა. რაც შეეხება ონლაინ მიმართულებით გააქტიურებას, მართალია საგანგებო მდგომარეობის დროს ვებ-გვერდიდანაც ვყიდდით, თუმცა ავეჯის ონლაინ გაყიდვა რთულია, თუ მომხმარებელმა არ ნახა რეალურად, არ შეეხო, ძალიან უჭირთ ისე შეძენა. ვებ-გვერდის გარდა, facebook-ითაც შესაძლებელია ჩვენი ავეჯის შეძენა, მაგრამ ამით ძირითადად უცხოელი მომხმარებლები სარგებლობენ და ეს რაოდენობა ძალიან მცირეა. სამომავლოდ კარგი მოლოდინები გვაქვს, რადგან შემოდგომიდან ავეჯის გაყიდვების კიდევ ერთი სეზონი იწყება, გარდა ამისა ახალ შენობაში გადავდივართ და დიდი იმედი გვაქვს, რომ გაყიდვებს მინიმუმ გავაორმაგებთ“, - განაცხადა არჩილ მგალობლიშვილმა.

ნინო თამაზაშვილი