თვითმმართველ ქალაქებში ბუნებრივი აირის ქსელზე ახალი აბონენტის მიერთების ტარიფი გაორმაგდა. მიზეზებზე „კომერსანტთან“ საქართველოს ენერგეტიკისა და წყალმომარაგების მარეგულირებელი ეროვნული კომისიის(სემეკი) რეგულირების განვითარებისა და მეთოდოლოგიური უზრუნველყოფის დეპარტამენტის დირექტორი, ვანო მეჭურჭლიშვილი საუბრობს. მისი განცხადებით, გაზზე დაერთების ტარიფის გაორმაგება ტექნიკური მომსახურების ხარჯებმა გამოიწვია.
ტექნიკური მომსახურების სრული ციკლი გულისხმობს დაპროექტებას, ნებართვებს, შეთანხმებას, სამუშაოებს, მასალას, სამუშაო ზონის აღდგენას და ა.შ. ჩვენი კომისია ახდენდა ამ პროცესზე დაკვირვებას, ამასთანავე განიხილავდა კომპანიების განცხადებებს, შესაბამისად, კომპანიების მოთხოვნებიდან გამომდინარე, აშკარა იყო რომ ქალაქის ტიპის დასახლებებში განსხვავებული ხარჯები სჭირდებოდა ტექნიკური მომსახურების სრულ ციკლს, ვინაიდან, საჭიროა საკომუნიკაციო კომპანიებთან შეთანხმება, ნებართვების აღება და ქალაქში არსებული ინფრასტრუქტურის განახლება.თუ კომისია არ გაითვალისწინებდა ამ გარემოებას, მაშინ დაირღვეოდა ხარჯების ანაზღაურების სამართლიანობის პრინციპი. ამასთანავე, გათვალისწინებული იყო ასევე მიერთების მსურველის მოთხოვნილებებიც,- აღნიშნავს ვანო მეჭურჭლიშვილი.
როგორც „სემეკის“ წარმომადგენელმა „კომერსანტს“ განუცხადა, ქალაქის ტიპის დასახლებაში, განსაკუთრებით თვითმმართველ ქალაქბში, ასეთი ტიპის სამუშაოები უფრო რთული და ხარჯიანია.
ხდება ასფალტის საფარის აღდგენა, რეკონსტრუქცია, შესაბამისად, ისეთი დასახლებები,სადაც არ არის ასეთი ინფრასტრუქტურა, არც ხდება მსგავსი ხარჯების გაწევა სამუშაოებზე. ამიტომ კომისია ვალდებული იყო ეს გარემოება შეესწავლა. კომისია მუდმივად ცდილობს ტარიფის სამართლიანობის დაცვას. აშკარაა,რომ სამუშაოები ბევრად ხარჯიანია თვითმმართველ ქალაქებში, კომპანიებს ბევრი ხარჯის გაწევა უწევთ და ჩვენ რომ არ მოვახდინოთ რეაგირება, ეს დიდ პრობლემას გამოიწვევს, მათ შორის ეკონომიკური ზრდის შეფერხებას,- ამბობს ვანო მეჭურჭლიშვილი. მისი თქმით, აღნიშნულ ქალაქებში ზირითადად „სოკარგაზი“ და „საქორგაზი“ მუშაობს.
კითხვაზე, აღნიშნული ცვლილება გავრცელდება თუ არა იმ აბონენტებზე, რომლებსაც უკვე გაფორმებული ჰქონდათ ხელშეკრულება გაზის საკომუნიკაციო კომპანიებთან, რომლებიც თავის მხრივ გამანაწილებელი კომპანიების კონტრაქტორ კომპანიებს წარმოადგენენ და სარემონტო-სამუშოებს ახორციელებენ,ან ხომ არ დაზარადლებიან ფინანსურად აღნიშნული კომპანიები, მეჭურჭლიშვილი განმარტავს:
„ეს არის სამოქალაქო ურთიერთობები. ჩვენ ვარეგულირებთ სამოქალაქო ურთიერთობებს, შესაბამისად, თუ სპეციალური ნორმატიული აქტების შესახებ კანონიდან გამომდინარე, პირდაპირ არ იქნება მითითებული უკუძალით ნორმატიული აქტის ამოქმედება, შეუძლებელია,რომ უკვე არსებულ გარიგებაზე გავრცელდეს ცვლილება.თუ რამე პრობლემა შეექმნებათ შეუძლიათ სემეკს მიმართონ“-აცხადებს მეჭურჭლიშვილი.
შეგახსენებთ, მიმდინარე წლის იანვრიდან, თვითმმართველ ქალაქებში, ბუნებრივი აირის ქსელზე ახალი აბონენტის მიერთების ტარიფი გაორმაგდა და 400 ლარის ნაცვლად, 800 ლარი გახდა.
შესაბამისი ცვლილება გაზის მიწოდებისა და მოხმარების შესახებ საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) დადგენილებაში გასული წლის 27 დეკემბერს შევიდა და მისი ამოქმედების ვადად 2020 წლის პირველი იანვარი განისაზღვრა.თვითმმართველი ქალაქებია თბილისი, ქუთაისი, ფოთი, ბათუმი და რუსთავი.