ეროვნული ბანკი მტკვრის მარჯვენა სანაპიროზე, ცირკსა და რესტორან „არაგვს“ შორის არსებული მიწის ნაკვეთზე სათაო ოფისის ვერ ააშენებს. პროექტს უარი თბილისის მერიამ უთხარი, თუმცა სანამ დედაქალის მთავრობა ცენტრალურ ბანკს უარს ეტყოდა მარეგულირებელმა ორგანომ ჯერ მიწის ნაკვეთი გადაიფორმა,  შემდეგ ახალი ოფისის პროექტი შეიძინა.

კონკურსი საპროექტო დიზაინის შესყიდვის თაობაზე 2019 წელს გამოაცხადა. კონკურსში მონაწილეობა სულ ხუთმა კომპანიამ მიიღო და ამერიკულმა კომპანია GLMV Architecture-მა გაიმარჯვა. 2019 წლის 28 ნოემბერს ეროვნულმა ბანკმა კომპანიასთან ხელშეკრულება გააფორმა, თუმცა მერიის უარყოფითი გადაწყვეტილების შემდეგ,  კობა გვენეტაძემ 2.5 მლნ ლარის ღირებულების ხელშეკრულება გაწყვიტა. ეროვნულ ბანკს ნასყიდობის ხელშეკრულების თანახმად 8.4 მილიონი არც მიწის მესკუთრე შპს „სითი ცენტრისთვის“ გადაუხდია, თუმცა ჩნდება კითხვები, რატომ გადაიფორმა ეროვნულმა ბანკმა ის  მიწის ნაკვეთი, რომელსაც სარეკრეაციო ზონის სტატუსი აქვს? ჰქონდა თუ არა ინფორმაცია ქვეყნის ცენტრალურ ბანკს იმის შესახებ, რომ საპროექტო ტერიტორია მაღალი საშიშროების მქონე არეალში ხვდებოდა? იცოდა თუ არა ის, რომ  საპროექტო ტერიტორია ბუნებრივ ლანდშაფტში მდებარეობდა და ქალაქის ისტორიულ ნაწილს წარმოადგენს, სადაც მასტაბური მშენებლობები მიზანშეწონილი არაა?  ამ კითხვებზე ეროვნული ბანკისგან კონკრეტული პასუხი ვერ მივიღეთ. მათგან ვერც იმის გაგება შევძელით, თუ ეს ინფორმაცია მათთვის ცნობილი იყო, რატომ ირიცხებოდა  8,779 კვადრატული მეტრის ფართობის მიწის ნაკვეთი სებ - ის ბალანსზე. სებ-ის კომენტარს „კომერასნტი“ უცვლელად გთავაზობთ:

„გვსურს მოგახსენოთ, რომ საქართველოს ეროვნული ბანკი ამ პროცესის თითოეულ ეტაპზე მოქმედებდა კანონმდებლობის სრული დაცვით და მაღალი პასუხისმგებლობით ეკიდებოდა თითოეულ გადაწყვეტილებას. სწორედ ამიტომ, 2019 წლის 26 ივლისს ეროვნულ ბანკსა და შპს „სითი ცენტრს“ შორის გაფორმებული ნასყიდობის ხელშეკრულების თანახმად, იმ შემთხვევაში, თუ სებ-ი ხელშეკრულების გაფორმებიდან არაუგვიანეს 7 თვის ვადაში ვერ მიიღებდა უფლებამოსილი ორგანოს მიერ გაცემულ შესაბამის ნებართვას, ქონება გამყიდველს თავისივე ხარჯით დაუბრუნდებოდა. რაც ასე მოხდა კიდეც. აღნიშნული არსებითი პირობა ეყრდნობოდა იმ გარემოებას, რომ ქონების შეძენის მიზანს წარმოადგენდა მასზე სათაო ოფისის აშენება, რისთვისაც, მათ შორის, საჭირო იყო შესაბამისი ნებართვის მიღება. ქალაქ თბილისის მუნიციპალიტეტის მთავრობის 2020 წლის 19 თებერვლის განკარგულების თანახმად, უარი ეთქვა ქალაქ თბილისში, ცირკსა და ყოფილ რესტორან „არაგვს“ შორის მიმდებარედ არსებულ მიწის ნაკვეთზე საზოგადოებრივ-საქმიანი კომპლექსის განაშენიანების რეგულირების გეგმის გეგმარებითი დავალების პროექტის მოწონებას. ხელშეკრულების თანახმად, ქონების საფასურის გადახდა დამოკიდებული იყო უფლებამოსილი ორგანოს მხრიდან სათანადო ნებართვის მიღებაზე, შესაბამისად, ეროვნული ბანკის მხრიდან თანხის გადახდა არ განხორციელებულა და ეროვნული ბანკის საბჭოს გადაწყვეტილებით, დაიწყო ქონების გამყიდველისათვის დაბრუნების პროცესი და შესაბამისად, ქონება დაუბრუნდა გამყიდველს,“- ნათქვამია ეროვნული ბანკის განმარტებაში.

არასწორად მართული პროცესი ქვეყნის ცენტრალურ ბანკს სანდოობის ხარისხს უქვეითებს. სებ-ს რომლის საქმიანობაც გრძელვადიან პროგნოზირებას და მოლოდინების მართვას უკავშირდება სათაო ოფისის ასაშენებლად როგორც ჩანს გადაიფორმა მიწის ნაკვეთი, რომლის შესახებაც არაფერი იცოდა. ქვეყნის ცენტრალურ ბანკს არ მოუკვლევია ურბანული საკითხები, არ დაინტერესებულა მიწის სტატუსით და არიქტექტურის სამსახურში პროექტი ისე შეიტანა, რომ გეოლოგიური კვლევა არ ჩაუტარებია.

ბაჩო ადამია