საქართველოს პრემიერმინისტრმა გიორგი გახარიამ დღეს ეკონომიკის გახსნის 6-ეტაპიანი გეგმა წარადგინა, რომელიც 2 -კვირიანი შუალედებით შეზღუდვების მოხსნას გულისხმობს. გეგმა სამთვიანია, თუმცა, არცერთ ეტაპზე არ გვხვდება საჰაერო მიმოსვლისა და საზოგადოებრივი ტრანსპორტის აღდგენის კომპონენტი.
შესაბამისად, დღემდე უცნობია, როდის აღდგება ავიამიმოსვლა ან როდის დაიწყებს ქალაქებში მუნიციპალური ტრანსპორტი მუშაობას. bm.ge-ის კითხვაზე რა გეგმა აქვს ამ მიმართულებით მთავრობას გიორგი გახარია პასუხობს, აღნიშნული სეგმენტების ამოქმედება დამოკიდებულია ქვეყანაში ეპიდსიტუციაზე, შესაბამისად, დღეს შეუძლებელია რაიმე თარიღის დასახელება.
"დღეს ვერ გეტყვით როდიდან უნდა ველოდოთ ავიამიმოსვლის აღდგენას, მე დღეს გამოვყავი რამოდენიმე კრიტიკულად მნიშნელოვანი სეგმენტი, რომელზეც სპეციალურად განზრახ არ ვისაუბრე, ეს არის მაგალითად მუნიციპალური ტრანსპორტის აღდგენა ან გეგმიური ოპერაციების აღდგენა. ეს ისეთი მსხვილი ელემენტებია ჩვენი ყოველდღიური ცხოვრების, რომლებიც პირდაპირ ზემოქმედებენ ყოველდღიურ მობილობაზე და პირდაპირ არის დამოკიდებული როგორი ეპიდემიური მდგომარეობის განვითარება გვექნება ქვეყანაში. ამიტომ ამ სეგმენტების, ამ გახსნების ეტაპებში ჩასმა დღეს შეუძლებელია, ზუსტად ასეა საჰაერო მიმოსვლაც. დღეს ვერავინ გეტყვით, მსოფლიოში როდის გაიხსნება საავიაციო ბიზნესი. ეს ჩვენთვის კრიტიკულად მნიშვნელოვანია და მივესალმებით, რაც შეიძლება სწრაფად, იმიტომ რომ ტურიზმი ჩვენი ქვეყნისთვის არის განმსაზღვრელი",-აცხადეს გიორგი გახარია.
წყარო: რეზონანსი