„მაღალი ბიუჯეტი და დაბალი რეიტინგი - ფრაქცია „დამოუკიდებელი დეპუტატების“ წევრმა, ლევან კობერიძემ დარგობრივი ეკონომიკისა და ეკონომიკური პოლიტიკის კომიტეტის სხდომაზე საზოგადოებრივი მაუწყებლის 2019 წლის ანგარიში განიხილა.

როგორც კობერიძემ კომიტეტის სხდომაზე აღნიშნა, მაღალი ბიუჯეტის პირობებში საზოგადოებრივ მაუწყებელს დაბალი რეიტინგი აქვს.

საზოგადოებრივი მაუწყებლის ბიუჯეტი - 69 მილიონი ლარი ქუთაისის ბიუჯეტზე მეტია. რეიტინგებში საზოგადოებრივი მაუწყებელი მე-6,მე-7,მე-8 ადგილს იკავებს, რაც ძალიან დაბალია ამ თანხის პირობებში. ბიუჯეტთან ერთად მაუწყებელი იღებს სესხს,მთლიანობაში 100 მლნ ლარია წლიური ბიუჯეტი. ძალიან დიდ ციფრებზეა საუბარი, ყოველ შემთხვევაში ისეთი ქვეყანისთვის,როგორიც საქართველოა. ყველა ვცდილობთ,რომ საზოგადოებრივი მაუწყებელი იყოს კარგი, თუმცა რეიტინგის მაჩვენებლები და შედეგები, არ იძლევა ამ ციფრების დადასტურების საშუალებას,- აღნიშნავს ლევან კობერიძე.

მან ასევე ისაუბრა საზოგადოებრივი მაუწყებლის ბიუჯეტთან დაკავშირებით კანონში ცვლილებების აუცილებლობაზე. ცვლილებების განხილვასთან დაკავშირებით ლევან კობერიძემ, საზოგადოებრივი მაუწყებლის სამეურვეო საბჭოს თავმჯდომარისგან თანხმობა მიიღო.

საზოგადოებრივი მაუწყებლის ბიუჯეტი არის ერთ-ერთი ყველაზე მეტად გარანტირებული ბიუჯეტი. კანონში ჩაწერილია,რომ საზოგადოებრივ მაუწყებელს ქვეყნის მშპ-ს არანაკლებ 0.14% უნდა გადაეცეს. წლიდან წლამდე,როდესაც ეკონომიკური მდგომარეობა უმჯობესდება, თქვენი ბიუჯეტიც იზრდება და წელს ეს რიცხვი 69 მილიონია ჯამურად. ხომ არ თვლით,რომ არსებული მდგომარეობიდან და პრიორიტეტებიდან გამომდინარე,რაც დღეს ქვეყანაში დგას, უმჯობესია კანონში ამ ჩანაწერის შეცვლა. ხო არ დააყენებდით მენეჯმენტში ამ საკითხს,რომ თუნდაც შემდეგი 1 წლის განმავლობაში აღნიშნული ნორმა გადაიხედოს და ფიქსირებულ თანხაზე იყოს შეთანხმება,- მიმართა ლევან კობერიძემ სამეურვეო საბჭოს თავმჯდომარეს.

ლევან კობერიძის განცხადებით,, საზოგადოებრივი მაუწყებლის მუშაობის შეფასება პრობლემურია, ვინაიდან, ბუნდოვანია კრიტერიუმები. მისივე თქმით, საზოგადოებრივმა მაუწყებელმა სარეკლამო ბაზრიდან 3 მილიონამდე ღირებულების რეკლამა წაართვა სხვა ტელევიზიებს.

საუბარი იყო იმაზე,რომ საზოგადოებრივ მაუწყებელს კომერციული რეკლამის გამოყენების უფლება მისცემოდა. მახსოვს, ხაზგასმული იყო პოზიცია,რომ ეს იქნებოდა მენეჯმენტის სტიმულირებისთვის კარგი. მაშინ დავაფიქსირე პოზიცია,რომ სხვა კომერციულ ტელევიზიებს ამ ცვლილებების შედეგად, მოაკლდებოდათ შემოსავალი. იყო საუბარი იმაზეც,რომ გაჩნდებოდა ახალი სარეკლამო ბაზარი. 2017-2018 წლებში სარეკლამო ბაზარი არ გაიზარდა და იყო ორივე წელს 75 მილიონი ლარი. საზოგადოებრივმა მაუწყებელმა 2018 წელს 2,9 მლნ ლარის რეკლამა მიიღო, ეს ნიშნავს იმას,რომ ბაზარი არ გაზრდილა, მაგრამ მაუწყებელმა მთლიანი ბაზრიდან, დაახლოებით 3მლნ ლარი წამოიღო. -აღნიშნა კობერიძემ.