როგორ ხვდება ქვეყანა პანდემიას და როგორია სახელმწიფო პოლიტიკა სასურსათო უსაფრთხოებასთან დაკავშირებით ? რადიო კომერსანტის გადაცემაში „აგრო სექტორი“ გარემოს დაცვისა და სოფლის მეურნეობის მინისტრის პირველი მოადგილე, გიორგი ხანიშვილი სახელმწიფოს მიერ ხორბლის სუბსიდირების პროგრამის შესახებ საუბრობს და აღნიშნავს, რომ საზოგადოება ე.წ სოციალურ პურს ფასის ცვლილების გარეშე მიიღებს. მისი თქმით სახელმწიფოს სუბსიდირება 63 საწარმოს შეეხო.
„სასურსათო უზრუნველყოფის ნაწილში პანდემიის პირობებში გაზაფხულზე შევძელით ერთი თვის მოხმარებული ხორბლის სუბსიდირება, აქ კრიზისული იყო ის, რომ იმ პერიოდში რუსეთმა, რომელიც ყველაზე დიდი მომწოდებელია, გარკვეული კვოტები დააწესა და ქვეყანას, რომ არ შექმნოდა სასურსათო უზრუნველყოფის თვალსაზრისით საფრთხე, მთლიანად დავასუბსიდირეთ ერთი თვის მარაგი. ეს იყო 4 მილიონ ლარის ოდენობის თანხა. ჩვენ გვინდოდა სოციალური პური მიგვეწოდებინა საზოგადოების ყველაზე მოწყვლადი ფენებისთვის ფასის ცვლილების გარეშე. ამ გადაწყვეტილებით ვფარავთ სრულიად საქართველოს. სუბსიდირებას 63 საწარმო მიიღებს, ჯარიმაც ეხება მათ ვინც სუბსიდირებას მიიღებს და არ შეასრულებს პირობებს, სხვა საწარმოები რჩებიან თავისუფალი ფასწარმოების პირობებში, მათ თავის ასორტიმენტზე შეუძლიათ გაზარდონ ფასები. ფასის მატება სხვადასხვა წონის პურზე არის 10 თეთრიდან 20 თეთრამდე , ზოგი აცხობს 2-2,5 კგ-იან პურს, ამდენად, თავისუფლად იქნება შესაძლებელი შევიძინოთ სოციალურად დასუბსიდირებული პური, თუ კი ამის სურვილი გვაქვს. მაგრამ იმ შემთხვევაში თუ გვინდა,რომ შევიძინოთ პური თონედან რომელიც ახლოს გვაქვს, ხაჭაპური, ლობიანი თუ ტორტი, იქ მოგვიწევს იმ ადეკვატური ფასის გადახდა, რომელიც მსოფლიოში არსებული ფასწარმოქმნიდან არის გამომდინარე“,- განაცხადა გიორგი ხანიშვილმა.
მინისტრის მოადგილე აცხადებს, რომ საქართველომ უნდა შეძლოს ქვეყანაში წარმოებული პროდუქციის მოცულობა და პროდუქციის ხარისხი გაზარდოს. მისი თქმით, ასევე უნდა შეიქმნას სწორი საფასო პოლიტიკა. გიორგი ხანიშვილის თქმით სწორედ ეს არის მთავრობის როლი და მისი თქმით, აღნიშნუ პოლიტიკას მთავრობა იმ შესაძლებლობის ფარგლებში, რაც აქვს ახორციელებს.
წელიწადში მოგვყავს 150 ათასი ტონა ხორბალი, ითესება 50-55 ათასი ჰექტარი, ჩვენ ახალი სათესლე მასალის შემოტანით და ფერმერების მიერ აგროკალენდრის სწორად დაცვით უნდა შევძლოთ საშუალო საექტრო მოსავლიანობა 4-5 ტონაზე მაინც ავიყვანოთ. ეს იქნება ბიზნესი და ასევე შეიქმნება მარაგი, თუმცა არა იაფი, არამედ მსოფლიო საბაზრო პრინციპით სტრუქტურირებული. დედოფლის წყაროს რომ გაცდებით, შირაქისკენ მიმავალ გზაზე, არის მანქანების თავშეყრის ადგილი, იქ რომ ჩახვალთ, ნახავთ რომ კახელი გლეხი ნიუ-იორკისა და მოსკოვის ბირჟის ფასებზე დაგელაპარაკებათ. შეიძლება თქვათ, საიდან იცისო, მაგრამ ისინი უყურებენ საერთაშორისო ფასებს. ბოლო წლებია გინახავთ,რომ ფერმერი წუწუნებდეს 30 თეთრი ღირს ხორბალიო ?! - იმიტომ რომ სწორი საფასო პოლიტიკა ჩამოყალიბდა და ფერმერმა თავისი დანახარჯი უნდა ამოიღოს,“- ამბობს გიორგი ხანიშვილი.