„4 პროექტი, რომელიც აქტიურ ფაზაში იყო გაგვიჩერდა და ჯერჯერობით ინვესტორები გაგრძელებისგან თავს იკავებენ,“ - უცხოელი ინვესტორების მხრიდან ინვესტიციების შეჩერებაზე, მთავრობის მიერ გატარებულ შეზღუდვებზე და შეჩერებულ და აუშენებელ პროექტებზე „კომერსანტთან“ Best Western Hotels & Resorts-ის ოფიციალური წარმომადგენელი კომპანია Capitol HPS-ის დამფუძნებელმა გოჩა ჯაიანმა ისაუბრა.
„ინვესტორები ელოდებოდნენ, რომ სექტემბერში მოძრაობა ისევ დაიწყებოდა, მაგრამ არაფერი ჩანს და ამიტომ ისევ გაზაფხულამდე გადაიტანეს. მომავალი წლის გაზაფხულის ბოლომდე ალბათ სიახლე არ გვექნება, ყოველ შემთხვევაში ხელმოწერილი ხელშეკრულების სახით მაინც. მოლაპარაკებები მიყვანილი იყო ბოლომდე, ხელშეკრულებები უნდა გაგვეფორმებინა, რაც ნიშნავდა იმას, რომ შემდეგ 1-1.5 წელიწადში კიდევ 4 ახალი ბრენდული სასტუმრო შეემატებოდა საქართველოს 4 სხვადასხვა რეგიონს. როცა ასეთი სიტუაციაა რეგიონებში სასტუმროების განვითარების კუთხით, გვინდა, რომ რეგიონებში გაჩნდეს ბრენდული სასტუმროები და მომსახურების სერვისი გაიზარდოს.
არავინ უარყოფს ვირუსის არსებობას, მაგრამ ასეთი პანიკა არ უნდა ამტყდარიყო. რა თქმა უნდა საჭიროა სიფრთხილე, მაგრამ გადამეტებული რეგულაციები ზედმეტი იყო. როცა ფრენების გახსნა 1 ივნისიდან დაანონსდა, აუცილებლად მაგ დროს უნდა გახსნილიყო რომ ზაფხულს წესიერად ჩაევლო. მკაცრი ზომები მისაღები არ იყო.
გოჩა ჯანიანის თქმით , კომპანიის მთავარი მიზანი რეგიონებში ბრენდული სასტუმროების განვითარებაა, თუმცა არსებული სიტუაციიდან გამომდინარე ტურიზმის სფეროში ძველი პოზიციების დასაბრუნებლად ქვეყანას 2-3 წელი დასჭირდება.
„ნოემბერში ლიკანში საკმაოდ კარგი სასტუმრო უნდა გაგვეხსნა. ხელშეკრულებაც ხელმოწერილი გვქონდა, კარკასი დასრულებულია, მაგრამ ინვესტორმა ინვესტირება შეაჩერა და ეს პროექტიც მომავალ წლამდე გადაიდო.
სახელმწიფო ცდილობს, რომ დაეხმაროს სექტორს რითიც შეუძლია, მაგრამ ალბათ დამატებითი რესურსებიც უნდა გამოიძებნოს, რადგან სტუმარმასპინძლობის სფერო საერთოდ გაკოტრდება.
2-3 წელი მაინც დაგვჭირდება პანდემიამდე პერიოდს რომ დაუბრუნდეს სასტუმრო ბიზნესი, ესეც იმ შემთხვევაში, თუ ახალი სეზონიდან (გაზაფხულიდან) ყველაფერი ჩვეულ რიტმში გაგრძელდება. ასე რომ, პროგნოზი სახარბიელო არაა, მაგრამ იმედი გვაქვს, რომ ყველაფერი კარგად იქნება,“- ამბობს გოჩა ჯაიანი.
Best Western Hotels & Resorts-ი სასტუმროების ერთ-ერთი უდიდესი ქსელია მსოფლიოში და უმსხვილესი სასტუმროების ქსელების ათეულში შედის. კომპანია შედგება სხვადასხვა კატეგორიის 11 ბრენდისგან. მის ქსელში გაერთიანებულია 100-ზე მეტი ქვეყნის 4200-მდე სასტუმრო. სათაო ოფისი მდებარეობს ქ.ფენიქსში, არიზონა, აშშ. საქართველოს წარმომადგენლობა ექვემდებარება ქსელის ევროპის რეგიონალურ ოფისს, რომელიც მდებარეობს ირლანდიაში, ქ. დუბლინში.