„ყველა ვხვდებით, რომ საზღვრები არჩევნებამდე არ გაიხსნება“, - ამის შესახებ „კომერსანტს“ ტურიზმის ეროვნული ადმინისტრაციის ყოფილმა ხელმძღვანელმა მაია სიდამონიძემ საქართველოში რეგულარული ფრენების დაშვების უკვე მეექვსედ, 1-ელ ოქტომბრამდე გადავადებაზე საუბრისას განუცხადა.
მაია სიდამონიძის განმარტებით, მიუხედავად იმისა, რომ საქართველოში საზღვრების გახსნის შესაძლებლობა მწვანე ზონის ქვეყნებთან არსებობდა, მთავრობამ არჩევნებამდე ეპიდსიტუაციის დამძიმების შიშით რეგულარული საჰაერო მიმოსვლა 1-ელ ოქტომბრამდე შეზღუდა.
„გადადებული რეისები და საზღვრების ჩაკეტვა ათასობის ბიზნესის ფინანსური შემოსავლების გარეშე, ხოლო უამრავი ადამიანის სამუშაოს გარეშე დარჩენას გულისხმობს. ეს კი ინდუსტრიისთვის და ეკონომიკისთვის უმძიმესია.
გახსნის შესაძლებლობა ნამდვილად გვქონდა, რადგან ისეთი ქვეყნების ფონზე, სადაც ეპიდსიტუაცია ბევრად უფრო მძიმეა, მაგალითად დუბაი, იტალია და ა.შ. რომლებიც დღის განმავლობაში უამრავ ტურისტს იღებენ, ჩვენ ისევ ჩაკეტილები ვართ და გვეშინია არჩევნებამდე ეპიდსიტუაცია არ დამძიმდეს - ეს დიდი შეცდომაა. ტურიზმის სექტორს არ გვაქვს იმის სურვილი, რომ საზღვრები ყველასთან გაიხსნას, არამედ რეგულარული რეისების დანიშვნა გვსურს მწვანე ზონის ქვეყნებთან, ამიტომ გაუგებარია ასეთი მიდგომა და მითუმეტეს ბოლო წუთას ამ ინფორმაციის გაჟღერება. ყველა ვხვდებით, რომ საზღვრები არჩევნებამდე არ გაიხსნება და უმჯობესია გამოვიდნენ და ეს ყველაფერი წინასწარ გვითხრან და აქვე გააჟღერონ თუ როგორ აპირებენ ბიზნესის დახმარებას, რადგან ბიზნესს უამრავი ხარჯი აქვს, მათ შორის გადასახადები და კრედიტები ამიტომ, როცა ქვეყანა საგანგებო რეჟიმშია და ფაქტიურად სექტორი ასეთ მდგომარეობაშია, მთავრობა მინიმუმ საშეღავათო პაკეტებს უნდა სთავაზობდეს მათ. არ შეიძლება ბიზნესი ჰაერში იყოს და მხოლოდ მოლოდინებით არსებობდეს, ცუდია ბოლო წუთს იგებდეს ისეთ გადაწყვეტილებებს, როგორიც ფრენების გადადება და საზღვრების გახსნის გადავადებაა“, - განმარტა მაია სიდამონიძემ.
ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტოს მორიგი NOTAM-ს მიხედვით ირკვევა, რომ რეგულარული საჰაერო მიმოსვლა შეზღუდულია 30 სექტემბრის ჩათვლით. თუმცა არსებობს გამონაკლისიც და თბილისის მიმართულებით რეგულარული რეისების განხორციელება დაშვებულია მიუნხენიდან, პარიზიდან და რიგადან.
ნინო თამაზაშვილი