„შევთავაზებდი ჯანდაცვის სამინისტროს მსჯელობა დაიწყოს საქართველოში საყოველთაო სავალდებულო დაზღვევის სისტემის შემოღებაზე, როდესაც ყველა მოქალაქე იქნება დაზღვეული“, - ამის შესახებ „კომერსანტს“ ჯანმრთელობის დაცვისა და სოციალურ საკითხთა კომიტეტის ყოფილმა წევრმა ლევან კობერიძემ განუცხადა. მისი თქმით, მხოლოდ ამ შემთხვევაშ იქნება შესაძლებელი ჯანდაცვის სექტორში არსებული მდგომარეობის უკეთესობისკენ სწრაფად შეცვლა და მოქალაქეებისთვის ხარისხიანი სამედიცინო მომსახურების მიწოდება. ყოფილი დეპუტატი აცხადებს, რომ სადაზღვეო კომპანიები მთლიან ჯაჭვში ერთის მხრივ, იმიტომ უნდა დაბრუნდნენ, რომ სახელმწფოს ფინანსური ტვირთი გადაინაწილონ, ხოლო მეორეს მხრივ, კლინიკებთან თანხის ხარჯვის ნაწილი აკონტროლონ.
„კომერსანტის" მეშვეობით შევთავაზებ სამინისტროს გაიხსნას პლატფორმა სადაც მსჯელობა საყოველთაო სავალდებულო დაზღვევაზე დაიწყება, როდესაც ყველა მოქალაქე ვალდებულია იყოს დაზღვეული. ვისაც არ აქვს ამის შესაძლებლობა მას სახელმწიფო აზღვევს. მაგალითად პენსიონრებს, სოციალურად დაუცველებს და ა.შ. ვისაც აქვს შემოსავალი თვითონ დაეზღვევა. მსხვილი კომპანიები შეგვიძლია დავავალდებულოთ, რომ თავის თანამშრომლების სადაზღვეო პაკეტების მინუმუმ ნახევარი მაინც გადაიხადონ. ეს არის სწორი მოდელი, რომელიც მუშაობას შვეიცარიაში და გერმანიაში. რაც მთავარია საყოველთაო სავალდებულო დაზღვევა სახელმწიფო ბიუჯეტს ფინანსურ ტვირთს უადვილებს, რადგან შემდგომში ნებისმიერი ოპერაცია აღარაა ბიუჯეტის გადასახდელი. ამასთან ერთად უნდა დაინერგოს DRG“ - „დიაგნოზთან შეჭიდული ჯგუფების“ სისტემა. ეს იქნებოდა რეალური რეფორმა ჯანდაცვის სექტორში და მოგვცემდა მნიშვნელოვან ეფექტს მოქალაქეებისთვისაც და სახელმწიფოსთვისაც. აღარ იქნებოდა სოციალისტური დამოკიდებულება, როდესაც სახელმწიფო ამბობს, რომ რახან ფულს მე ვიხდი მე თვითონ უნდა ვიყო დამკვეთიც, არბიტრიც და შემფასებელიც“, - განმარტავს ლევან კობერიძე.
„ლელოს“ ყოფილი წევრი აცხადებს, რომ მნიშვნელოვანია სახელმწიფომ რეალური სისტემური რეფორმა დაიწყოს. მისი განმარტებით, დღევანდელი საყოველთაო ჯანდაცვის სისტემიდან მხოლოდ სახელი დარჩა და ის საყოველთაო აღარ არის. როგორც ყოფილი დეპუტატი ამბობს, უამრავი ადამიანის სახელმწიფოსაგან ამ სერვისს ვეღარ იღებს და რეალურად პროგრამის გარეთ არიან დარჩენილები. ლევან კობერიძის თქმით, მათ ვერც კერძო სადაზღვეო კომპანიები სთავაზობენ ადეკვატურ პროდუქტს იმიტომ, რომ სადაზღვეო მომსახურების ფასი ძალიან მაღალია. ჯანმრთელობის დაცვისა და სოციალურ საკითხთა კომიტეტის ყოფილი წევრი გვიყვება, რომ როდესაც ადამიანების ჯანმრთელობას საფრთხე ექმნება, ისინი კატასტროფული დანახარჯების წინაშე არიან, სადაც სახელმწიფო საერთოდ ვერ იღებს მონაწილეობას. ამდენად დეპუტატი ამბობს, რომ დღეს საყოველთაო ჯანდაცვის პროგრამა გაკოტრებულია და კატასტროფული დანახარჯებისგან საზოგადეობის დაცვას ვეღარ ახერხებს.
„საყოველთაო ჯანდაცვის სისტემა ერთ ეტაპზე, რეალურად იყო შვება იმ მოსახლეობისთვის, რომელიც სამედიცინო სერვისებს ფიზიკურად ვერ იღებდა, იმის გამო რომ არ ჰქონდა შემოსავალი, ხოლო სახელმწიფო სისტემა არ აძლევდა მას სერვისებზე წვდომის საშუალებას. ამიტომ პირველ ეტაპზე, რა თქვა უნდა პროგრამამ გარკვეული შვება მოიტანა და ადამიანებმა შეძლეს თავიანთ ჯანმრთელობაზე ზრუნვის დაწყება. მაგრამ სისტემას თავიდანვე ეტყობოდა, რომ ვერ გაამართლებდა, რადგან მთელი ფინანსური ტვირთი სახელმწფოს დარჩა. თვითონ იყო დამკვეთიც, შემსრულებელიც, კლინიკებთან ფულის გადამრიცხავიც და მაკონტროლებელიც. ეს არასწორი სისტემაა, რადგან სახელმწიფო ვერასდროს იქნება მთლიანი პროცესის კარგი მენეჯერი.
სხვა პროგრამები ჩვენს მოცემულობაში არის კორუფციული სისტემა, რადგან უამრავ ხვრელს ტოვებს. ხშირ შემთხვევაში კლინიკებიც სარგებლობენ ამ საკითხით. არის გარკვეული კლინიკები, რომლებიც იმ მიზნით იხსნება, რომ სახელმწიფოსგან რაც შეიძლება მეტი ფული გადმოქაჩოს და მათ თავის მფარველები ჰყავს. მეორე საკითხი არის გაურკვევლობა, ადამიანებმა არ იციან რა სერვისები ეკუთვნით, შესაბამისად ეს სამედიცინო მომსახურებას ართულებს. სახელმწიფომ, სადაზღვეო კომპანიებმა, კლინიკებმა და ექსპერტებმა ერთად უნდა იმუშავონ თუ რა კომპონენტები შევა საყოველთაო სავალდებულო დაზღვევის პროგრამაში. ვთვლი, რომ აუცილებლად უნდა იყოს წამლის კომპონენტი გათვალისწინებული, რადგან ჯიბიდან თანაგადახდის წილი ძირითადად მედიკამენტებით არის განპირობებული. ამ ტიპის დაზღვევა გაცილებით ეფექტიანი იქნება ვიდრე საყოველთაო ჯანდაცვის პროგრამა“, - აცხადებს ლევან კობერიძე.