ადამიანს არ უნდა ეშინოდეს,რომ ავად გახდება და არ ექნება ფინანსური, თუ სხვა ხელმისაწვდომობა ჯანდაცვაზე. ჯანმრთელი და განათლებული ერი ქვეყნის წარმატების მთავარი ფაქტორებია. საყოველთაო ჯანდაცვა არ ყოფილა საყოველთაო, მან მხოლოდ უხარისხო მედიცინაზე ხელმისაწვდომობა გაზარდა. 2014 წლიდან დაიწყო ამ პროგრამის დეფიციტი, მიზეზი მისი არასწორი მართვა და დაგეგმარება იყო. როცა სახელმწიფო კლინიკას უხდის არასაბაზრო ფასს ან უგვიანებს გადახდას, კლინიკა ასეთ დროს ან დაიხურება ან ხარისხს დაწევს. - რადიო „კომერსანტის“ გადაცემაში პროფესიონალები კავკასიის მედიცინისა და ჯანდაცვის მენეჯმენტის სკოლის დეკანმა, ვახტანგ სურგულაძემ საყოველთაო ჯანდაცვის ხარვეზებსა და მთავრობის 520-ე დადგენილებაზე ისაუბრა.

მისი თქმით, 520-ე დადგენილება ფინანსური და ეკონომიკური გათვლების გარეშე შეიქმნა.

5 ნოემბერს მიღებული დადგენილება 20 ნოემბერს ამუშავდა. შემსრულებემა სექტორს ბიუჯეტის დათვლის შესაძლებლობაც კი არ მისცა. კლინიკებს აქვთ სესხები და მიუხედავად იმისა,რომ სამინისტროს მხრიდან იყო ნათქვამი კონსულტაციების გავლასთან დაკავშირებით, ნამდვილად, არ ყოფილა კლინიკებთან კონსულტაციები. რეფორმა ასე არ ტარდება. მრჩება შთაბეჭდილება,რომ 520-ე დადგენილებაში პარლამენტის ჯანდაცვის კომიტეტი არ იყო ჩართული,- ამბობს ვახტანგ სურგულაძე. მან გადაცემაში  ჯანდაცვის სისტემაში ხშირი ცვლილებების საშიშრობაზე ისაუბრა.

მიმაჩნია,რომ საქართველოში ჯანდაცვის სისტემა არ არსებობს.უნდა შეიქმნას ერთიანი სისტემა,სადაც ყველა ახალი მინისტრი არ დაიწყებს თავისი იდეების გატარებას. მომსახურება,რომელიც ღირს 1000 ლარი და მასში გადაიხდი 800 ლარს, უნდა იცოდე რომ 1000 ლარიან პროდუქტს ვერ მიიღებ. უხარისხო სამედიცინო დახმარება არ არის უხარისხო ფანქარი ან ფეხსაცმელი.მსოფლიოში სამედიცინო ბაზარი ყოველწლიურად იზრდება, იმიტომ რომ ახალი ტექნოლოგიები შემოდის და მედიკამენტები ძვირდება. შესაბამისად, ყველა ნორმალურ ქვეყანაში, თუ სახელმწიფო აფინანსებს რამეს, ინდექსირებაც ხდება.

საქართველოში მედიკამენტებზე ფასების ზრდა ოლიგოპოლიის მიზეზით არის განპირობებული. გყავს სამი ძირითადი მოთამაშე, არ გამოვრიცხავ მათ შორის კარტელური გარიგების შესაძლებლობას. მათ შეუძლიათ მართონ ფასები. რეგულაციებია საჭირო, ლიმიტირება და ჭერის დადგენა შედეგს არ მოიტანს,- ამბობს სურგულაძე.

მან გადაცემაში კორონავირუსის გავრცელების საშიშროებაზეც ისაუბრა და აღნიშნა,რომ უსაფუძვლო პანიკას საზოგადოება არ უნდა აჰყვეს. ვახტანგ სურგულაძე ასევე საუბრობს საბაჟო კონტროლის გამკაცრებასა და სამედიცინო, თუ სხვა სფეროების პერსონალის გადამზადების აუცილებლობაზე.

მოსახლეობის ნაწილმა პროდუქტები მოიმარაგა, ნამდვილად უსაფუძლო პანიკაა, ამის საჭიროება არ არსებობს. ვირუსის სირთულეს წარმოადგენს ის,რომ პიროვნებიდან პიროვნებაზე ადვილად გადადის. ერთი ადამიანის სიკვდილიც პრობლემაა და ტრაგედია,რაც არ უნდა დავუშვათ. შეიძლება ადამიანმა ისე გადაიტანოს ეს ვირუსი,რომ ვერც მიხვდეს, მაგრამ გახდეს მატარებელი ამ დაავადების. თუმცა, ის მოლოდინი,რომ თუ ვირუსი შეგვხვდა, აუცილებლად გართულდება, არ უნდა არსებობდეს. ჩვენი ამოცანაა, რომ ეპიდემია არ იყოს. ამისთვის, ვფიქრობ საზღვრებზე უნდა გამკაცრდეს კონტროლი. უნდა გვყავდეს კარგად მომზადებული თანამშრომლები საბაჟოჟზე, ყურადღებით უნდა იქნას შესწავლილი პასპორტები. აუცილებელია დავატრენინგოთ სამედიცინო და სასწრაფო დახმარების პერსონალი, საბავშვო ბაღის მასწავლებლები.

სულ მესმის ხელისუფლებისგან,რომ ჩვენ გავაკეთებთ... , მოდი,რა, ერთხელ ვთქვათ,რომ გავაკეთეთ უკვე და ნახეთ, რა გავაკეთეთ,- ამბობს სურგულაძე.

მოამზადა ნათია კეკენაძემ