უწყებათაშორისი საკოორდინაციო საბჭოს გადაწყვეტილებით 1 ივნისიდან ქვეყანაში სახმელეთო საზღვრები გაიხსნა. როგორც კომერსანტთან საუბრისას Hotel collection international - ის რეგიონალურმა დირექტორმა ქეთი მიქაშავიძემ აღნიშნა, მათი დამოკიდებულება საზღვრების გახსნის მიმართ ცალსახად პოზიტიურია და ეს ტურიზმის სწრაფი აღდგენისთვის ერთ-ერთი ყველაზე სწორი ნაბიჯი იქნება.

„არა თუ მივესალმებით, არამედ ამ ხნის მანძილზე ჩვენ თვითონვე ვითხოვდით საზღვრების გახსნას, თუმცა იქიდან გამომდინარე, რომ ჩვენი სამეზობლო ქვეყნებიდან ყველამ თავის მოქალაქეებს სახმელეთო საზღვრით სარგებლობის უფლება არ მისცა და თავისი პირობებიც დააყენა, ძალიან ოპტიმისტური მოლოდინებიც არ მექნებოდა, თუმცა ცალსახად ძალიან პოზიტიური ნაბიჯია, ჩვენ სამეზობლო ქვეყნებიდანაც მოთხოვნა ძალიან  დიდია და მიუხედავად მათი მხრიდან გარკვეული დაბრკოლებისა ველოდებით, რომ ჩვენი ქვეყნისკენ მაინც დიდი ნაკადები წამოვა.

ვხედავთ, რომ მოთხოვნა კვირიდან კვირამდე იზრდება და ამასთან ერთად იმასაც ვაცნობიერებთ, რომ კერძო სექტორის პასუხისმგებლობა მთლიანად ჩვენზეა გადმოსული და ფრთხილად უნდა ვიყოთ და დავიცვათ ყველა რეგულაცია და თანამშრომლებს და სტუმრებსაც მოვთხოვოთ მათი დაცვა, რომ არ გამოვიწვიოთ ინფიცირების შემთხვევების ზრდა“  -   აღნიშნა ქეთი მიქაშავიძემ.

აჭარა ჯგუფის ბიზნეს განვითარების დირექტორის თქმით საქართველოში შემოსული სტუმრების ძალიან დიდი წილი, სწორედ სახმელეთო საზღვრებიდან მოდის, შესაბამისად საზღვრების გახსნის მიმართ მათაც დიდი მოლოდინი ჰქონდათ.

„ძალიან დიდი ხანია, რაც სახმელეთო საზღვრების გახსნას ველოდებით, შემოსული სტუმრების ძალიან დიდი  წილი ჩვენ ქვეყანაში სახმელეთო საზღვრებიდან მოდის, მათ შორის უდიდესი წილი არის ჩვენი მეზობელი  ქვეყნები, რომლებიც დიდი ხანია ამას ელოდებიან, რასაც დიდ მნიშვნელობას სძენს ისიც, რომ პანდემიიდან გამომდინარე კვლავ ძალიან ბევრი შეზღუდვა მოქმედებს და შესაბამისად ფრენებზე ფასი ძალიან მაღალია.

ველოდებით რომ სტუმრების ძალიან დიდი წილი წამოვა არა მხოლოდ ჩვენი სასტუმროების, არამედ ზოგადად მთელი ქვეყნის, როგორც საზღვაო ქალაქების, ასევე სხვა ქალაქების მიმართაც. - აღნიშნა ტატა ჭუმბურიძემ.

თაკო კვაჭანტირაძე