ავტომობილების ტექნიკური ინსპექტირების ბაზარზე მომუშავე ქართულ-გერმანული კაპიტალით შექმნილმა სასწავლო საგამოცდო ცენტრმა PTI-მ საქართველოს მთავრობასთან 2 წლიანი სასამართლო დავა მოიგო და უახლოეს მომავალში საქართველოში ოპერირებას იწყებს. კომპანიას 2018 წელს სახელმწიფოსგან უარი ეთქვა ტექნიკური ინსპექტირების ცენტრის გახსნაზე, რის გამოც ორი წლის მანძილზე ჩადებული ინვესტიცია და მათ მიერ მოპოვებული მშენებლობის უფლება შეჩერდა. კომპანიისთვის მიყენებული ზარალის ანაზღაურება კი სახელმწიფოს ბიუჯეტს მილიონები დაუჯდება.

როგორც კომპანიის იურისტმა ლევან ალაფიშვილმა „კომერსანტთან“ განმარტა, სასამართლოში კიდევ ერთხელ დადასტურდა სახელმწიფოს მხრიდან ბიზნესის შევიწროების შემთხვევა და უახლოეს მომავალში უცხოელ პარტნიორებთან ერთად ეკონომიკის სამინისტროს მხრიდან ზარალის ანაზღაურების პროცედურებზე განხილვები წარიმართება.  

„ესაა ერთ-ერთი საქმე, რომელშიც მთავრობამ არ დაუშვა ავტომობილების ტექნიკური ინსპექტირების ბაზარზე ახალი მოთამაშე და მონოპოლიზაციას შეუწყო ხელი. სასწავლო და საგამოცდო ცენტრ  PTI-ს  ოპერირება თბილისში 7 ინსპექტირების ხაზით უნდა დაეწყო, თუმცა ყოველგვარი კანონის დარღვევით, სახელმწიფომ ბიზნესი დაჩაგრა და მათ საქმიანობის საშუალება არ მისცა. ამ კომპანიამ მიმართა სასამართლოს, შედეგად კი სამივე ინსტანციამ დაადასტურა  სახელმწიფოს მხრიდან ბიზნესის შევიწროვება.საბოლოოდ, სასამართლომ დაავალა ეკონომიკის სამინისტროს ამ კომპანიასთან ხელშეკრულების გაფორმება. სამწუხარო ისაა, რომ ამ ყველაფერს 2 წელი დასჭირდა. ამჟამად პარტნიორებთან ერთად, ზიანის ანაზღაურების პროცედურებსაც გადავწყვეტთ. სავარაუდოდ ეს არ იქნება მცირე თანხა და ამაზე პასუხისმგებელი ბიუჯეტი იქნება. ვფიქრობთ, რომ შეიძლება მილიონებზე იყოს საუბარი. ეს ყველაფერი იმის გამო, რომ სახელმწიფომ ორი წლით გამზადებული ინვესტიციები გააჩერა, გააჩერა კომპანია, რომელსაც მშენებლობის ნებართვა ჰქონდა აღებული. უცხოელი ინვესტორები კი ადვილად არ თმობენ თავიანთ უფლებებს.“ - ამბობს ალაფიშვილი.

იურისტმა საქართველოს ტექინსპექტირების ბაზარზე მონოპოლისტი კომპანიის „გრინვეის“ საქმიანობის არამართებულობას გაუსვა ხაზი და აღნიშნა, რომ სახელმწიფო უკანონოდ ჩაერია არარეგულირებად სფეროში და გეოგრაფიულად გაანაწილა ცენტრები, რომელთაც ოპერირების უფლება ექნებოდათ.  

„2018 წელს სახელმწიფო ჩაერია არარეგულირებად სფეროში, დაადგინა მოთხოვნები, რომ საქართველოში უნდა არსებობდეს 151 ინსპექტირების ხაზი, განაწილა გეოგრაფიულად და მხოლოდ მათ შეეძლებათ ოპერირება. ჯამურად დღეს ოპერირებს 43 ინსპექტირების ცენტრი, საიდანაც ერთ კომპანიას უჭირავს ბაზრის 35-40 პროცენტი, კომპანია „გრინვეი“ მთავრობის 2018 წლის დადგენილებით შეიქმნა, სწორედ მათ მოარგეს საკონკურსო პირობები მთავრობაში. მთავრობის ამ გადაწყვეტილებით შეიქმნა მონოპილისტი.

სასწავლო და საგამოცდო ცენტრი PTI  მნიშვნელოვანი იმიტომაა, რომ მათი ერთერთი მიმართულებაა იმ პერსონალის გადამზადება, რომელიც ყველა ცენტრს სჭირდება, რომელიც აუცილებელია ევროპულ სტანდარტებთან მიახლოებისთვის და რომელსაც გვავალდებულებს ასოცირების ხელშეკრულება.“ - განმარტავს ლევან ალაფიშვილი.

მარიამ მორგოშია