“ლელოს” დამფუძნებელი მამუკა ხაზარაძე სანქციების გამო კომპანია „ბორჯომის“ საწარმოს დროებით გაჩერების ფაქტს სოციალურ ქსელში ეხმაურება.
„ბორჯომმა წარმოება შეაჩერა. საფრთხის წინაშეა ბორჯომის ბრენდი, მისი მომავალი, ექსპორტი, ათასობით სამუშაო ადგილი, შემოსავლები ბიუჯეტში. მიზეზი - კომპანიის სტრუქტურაში დასანქცირებული რუსული ალფა ჯგუფის აქციონერობაა. “ალფა ჯგუფს კომპანია ბორჯომის საკონტროლო პაკეტი ბადრი პატარკაციშვილის ოჯახმა და ტვ იმედის დღევანდელმა მმართველმა მიყიდა 2013 წელს.
გამოსავალი შექმნილი მდგომარეობიდან:
სახელმწიფომ უნდა გამოისყოდოს „ალფა ჯგუფისგან“ ბორჯომის კომპანიის აქციები, შემდგომში კი თბილისის საფონდო ბირჟის საშუალებით გაასხვისოს საქართველოს მოქალაქეებზე. მხოლოდ ასეთი ნაბიჯებით არის შესაძლებელი შექმნილი კრიზისის გადალახვა და ამავე დროს, კაპიტალის ბაზრის ჩამოყალიბებაში დიდი სტიმულის შემოტანა“,— წერს ხაზარაძე.
დღეიდან ბორჯომის ჩამომსხმელ ორივე ქარხანაში წარმოების პროცესი ჩერდება, ამის შესახებ „კომერსანტს“ კომპანია „IDS ბორჯომი საქართველოში“ განუცხადეს. კომპანიის ინფორმაციით, მათ შეეზღუდათ წვდომა საბანკო ანგარიშებზე, რამაც კომპანიას ჩაუკეტა სავალუტო შემოსავლების მიღებისა და კრედიტორებთან ანგარიშსწორების შესაძლებლობა.