რამდენიმე დღის წინ,  საქართველოში ახალი კორონავირუსის შესაძლო გავრცელების აღკვეთის ღონისძიებების ფარგლებში სახელმწიფო მთავრობამ იმპორტიორებს რეკომედაციით მიმართა,  შესაძლებლობის შემთხვევაში ტვირთების ქვეყანაში შემოტანა განახორციელონ სარკინიგზო ტრანსპორტით. საკანონმდებლო მაცნეს გვერდზე გამოქვეყნდა მთავრობის განკარგულება, რომელშიც აღნიშნულია, რომ საქართველოს ფინანსთა სამინისტროს მმართველობის სფეროში შემავალი სსიპ − შემოსავლების სამსახური უზრუნველყოფს.

იმპორტიორთა ასოციაციის ხელმძღვანელი ივა ჭყონია მიიჩნევს, რომ იმპორტიორი კომპანიებისთვის მსგავსი რეკომენდაცია შესაძლოა მხოლოდ მცირედით აისახოს ფასზე და რკინიგზით ტვირთის შემოტანას უფრო მეტი დრო დასჭირდეს.

„ეს რეკომენდაცია ძირითადად   ირანიდან ექსპორტს  ეხება, რადგან ამ ქვეყნიდან  სახმელეთო მიმოსვლა შეფერხებულია და ქართველ მძღოლებს არ აქვთ სურვილი შევიდნენ ქვეყანაში.  ირანელი მძღოლი პრობლემას აწყდება ჩვენს ტერიტორიაზე შემოსვლისას. მთავრობამ მოგვიწოდა, რომ თუ ირანიდან ტვირთის შემოტანის აუცილებლობაა, გადავეწყოთ  სარკინიგზო ტრანსპორტზე. რიგმა  კომპანიებმა ეს გაითვალისწინეს და ამას უკვე აკეთებენ. აქ მნიშვნელოვანია დროის ფაქტორი, შეიძლება დროში იყოს გაწელილი ტრანსპორტირება და მცირედით ფასზე აისახოს, თუმცა სხვა პრობლემას და რამე დამაზარალებელ გარემოებას ვერ ვხედავ კომპანიებისთვის. ირანთან ძირითადად ურთიერთობა არ გვაქვს ბიტუმის იმპორტის გარდა. ჩვენთვის ახლა ყველაზე მნიშვნელოვანია სასურსათო კალათა არ გაძვირდეს და სურსათის მიმართულებით არ შეგვექმნას პრობლემა. სარკინიგზო მიმოსვლა არის ოპტიმალური ვარიანტი და მაქსიმალურად უნდა გამოვიყენოთ ეს საშუალება. აქვე ვიტყვი, რომ რკინიგზაზე გადასვლით პრობლემა არ შეგვექმნება ეკონომიკაში.“ - ამბობს ივა ჭყონია.

„სატრანსპორტო დერეფნის კვლევის ცენტრის“ ხელმძღვანელი პაატა ცაგარეიშვილი რეკომენდაციას მიზანშეწონილად მიიჩნევს , თუმცა აღნიშნავს რომ გარკვეულ პროდუქციასთან მიმართებაში იმპორტის პირობები დახვეწას საჭიროებს, რათა ქვეყანაში მარაგის პრობლემა არ შეიქმნას.

„რიგი გადაზიდვების შემთხვევაში რკინიგზა ბევრად უფრო მომგებიანი და ეკონომიურია, ამიტომ მიზანშეწონილია მთავრობის ეს რეკომენდაცია. არის პროდუქტები, რომელთა მარაგების შექმნას რკინიგზით იმპორტისას გარკვეული დახვეწა და რკინიგზის მხრიდან შეღავათები სჭირდება. ხორბლის გადაზიდვა დღესდღეობით საავტომობილო ტრანსპორტით ხდება, რაშიც მძღოლები არიან ჩართული და რის გამოც ვირუსის გავრცელების საშიშროება იზრდება.  ხორბლის მარაგის შესაქმნელად  მნიშვნელოვანია, რომ დიდი პარტიებით, გემით და რკინიგზით გადაიზიდოს ხორბალი. თუ გადაზიდვის ორგანიზებას ისე მოახერხებენ, რომ ერთ კვირაში ხელახალი შეკვეთა ჩამოვიდეს რუსეთიდან ან ყაზახეთიდან და შეკვეთები ერთმანეთს მიყვება, დროის ფაქტორი ფაქტობრივად განულდება. ჩვენ გვაქვს პრობლემა ბიტუმთან დაკავშირებით იმიტომ, რომ ვეღარ შემოდის ირანიდან და არის შესაძლებლობა, რომ აზერბაიჯანიდან და ყაზახეთიდან მოვახდინოთ მისი შემოტანა.  ამიტომ,  თუ რკინიგზა მისცემს ფასდაკლებას კომპანიებს, ამ შემთხვევაში არ გაძვირდება ბიტუმი და არ გავაჩერებთ მშენებლობას. იდეა კარგია მაგრამ გარკვეულ ტვირთებთან მისადაგებას საჭიროებს.სახელმწიფომ მოქნილობის ელემენტის შემოტანა უნდა შეძლოს.“ - ამბობს პაატა ცაგარეიშვილი

„კომერსანტი“ შემოსავლების სამსახურსაც დაუკავშირდა, უწყებაში აცხადებენ, რომ რეკომენდაცია ეხება არა მხოლოდ იმ ქვეყანას, რომელთანაც ამ ეტაპზე სატრანსპორტო მიმოსვლა აქვს საქართველოს შეზღუდული, არამედ ყველა ქვეყანას საიდანაც შესაძლებელია სარკინიგზო გადაზიდვა.

„რეკომენდაცია ეხება, საავტომობილო გადაზიდვებთან დაკავშირებული რისკების მინიმუმამდე დაყვანის მიზნით,  შესაძლებლობის შემთხვევაში ყველა ქვეყანას, საიდანაც შესაძლებელია განხორციელდეს სარკინიგზო გადაზიდვა, რადგან სარკინიგზო გადაზიდვების გამოყენება არსებულ სიტუაციაში არის ბევრად  უსაფრთხო, სწრაფი, გამოიყენება ნებისმიერ მეტეოროლოგიურ პირობებში, იაფია , გააჩნია დიდი წონისა და მოცულობის ტვირთების გადაზიდვის შესაძლებლობა; ასევე ძალიან დიდი პარტიის ერთდროულად გადაზიდვის შესაძლებლობა ( შესაძლებელია  ზოგ შემთხვევებში მოხდეს 80-100 ა/მ-ით გადაადგილებული ტვირთის გადაზიდვა 1 სარკინიგზო შემადგენლობით, რაც თავისთავად გულისხმობს 80-100 სატრანსპორტო საშუალების მძღოლის ჩანაცვლებას 1 ლოკომოტივის მძღოლით ) რაც თავისთავად მინიმუმამდე დაიყვანს კორონავირუსის გავრცელების რისკს.“ - განაცხადეს შემოსავლების სამსახურში.

მარიამ მორგოშია