საბანკო და სამშენებლო რეგულაციების, ნებართვების გართულებული გაცემის და ზოგადად, გამოწვევებით სავსე პერიოდის შემდეგ, სამშენებლო ბიზნესს შეღავათი გაეწევა. კერძოდ, 2008 წლამდე დაწყებული და დაუსრულებელი მშენებლობებისთვის კომპანიებს შეღავათები 2026 წლამდე გაუხანგრძლივდათ .
სამშენებლო სფეროსთვის მძიმე დარტყმების, შეჩერებული გაყიდვებისა და დაკარგული ინვესტიციების შემდეგ მთავრობის მიერ მიღებული გადაწყვეტილება და სექტორზე ხელშეწყობა ჯანსაღ გადაწყვეტილებად მიაჩნია, „საქართველოს მენაშენეთა ასოციაციის“ ხელმძღვანელ ირაკლი როსტომაშვილს. მიუხედავად ამისა, მას უჭირს იმის თქმა, თუ რა ვადაში აისახება კომპანიებისზე მათთვის გაწეული შეღავათი.
„სახელმწიფოს სხვა გზა აღარ აქვს, ეს გადაწყვეტილება უნდა მიეღოთ. ვთქვათ ჩაუდგა სახელმწიფო ჯიბრში დეველოპერებს და არ მისცა შეღავათი, რა იქნება მერე? ამით ფულს იშოვიან თუ რას იზამენ? ისევ ისე დარჩება სექტორი როგორც დღესაა. ამიტომ მგონია, რომ ჯანსაღი ხელშეწყობა არის მთავარი და ამ ნაბიჯს დგამენ. როგორც დეველოპერების ასევე მყიდველების პრობლემა მთლიანად ეკონომიკაზეა გადაჯაჭვული. ადამიანმა, რომელმაც წლების წინ სესხით იყიდა ბინა და იმ ვალდებულებას დღემდე იხდის, თავისდაუნებურად გაეზარდა გადასახადი ლარის გაუფასურების გამო. აღარ არის გადახდისუნარიანი. სახელმწიფო ზუსტად ამ კრიზისის დაძლევის ალტერნატივას სთავაზობს. თუმცა, არ ვიცით რა ვადაში დავინახავთ შედეგს, რადგან ყველა კომპანიას სხვადასხვა პრობლემა აქვს.“-ამბობს ირაკლი როსტომაშვილი.
როსტომაშვილი იმასაც უსვამს ხაზს, რომ მსგავსი პრობლემა რაც დეველოპერებს ჩვენს ქვეყანაში აქვთ, მხილოდ საქართველოს ბაზარზე არ არის, რადგან მსოფილიოში სამშენებლო ბიზნესს, სხვადასხვა კრიზის დროს უწევს მსგავს საკითხებთან გამკლავება.
„როდესაც მსოფლიო ეკონომიკური კრიზისი იყო,ის დეველოპერულ ბაზარზეც აისახა. სახელმწიფოებმა დეველოპერებს სხვადასხვა კამპანიებით ხელი შეუწყვეს . იგივე ხდება აქაც და ძალიან კარგი ფაქტია.“-ამბობს როსტომაშვილი.
„კომერსანტის“ კითხვაზე 2008 წლამდე დაწყებული და დაუსრულებელი მშენებლობებისთვის კომპანიებისთვის გაწეული შეღავათები, არის თუ არა წლების წინ გამოცხადებული სამშენებლო ამინისტიის გაგრძელება, „საქართველოს მენაშენეთა ასოიციაციის“ ხელმძღვანელი გვპასუხობს, რომ:
„ადრე იყო ობიექტური მიზეზი, 2008 წლის ომის დროს როდესაც ეკონომიკური ვარდნა დაიწყო, სამშენებლო სექტორზე მძლავრად აისახა. დღეს იგივე მიზეზი არ გვაქვს, თუმცა, შეღავათის გაწევას ბაზარი ნამდვილად ითხოვს.“
შეგახსენებთ, რომ 6 თებერვლს გამართულ მთავრობის სხდომაზე, საქართველოს პრემიერ-მინისტრმა გიორგი გახარიამ განაცხადა, რომ 2008 წლამდე დაწყებული და დაუსრულებელი მშენებლობებისთვის კომპანიებისთვის გაწეული შეღავათები.
როგორც გახარიამ აღნიშნა, ასეთი პროექტები საკმაოდ ბევრი იყო, რის გამოც მთავრობამ გადაწყვეტილება მიიღო ვადა 2026 წლამდე გაეგრძელებინა.
“მოგეხსენებათ, რომ 2015 წელს საქართველოს მთავრობამ მიიღო გადაწყვეტილება 2008 წლამდე დაწყებული და დაუსრულებელი მშენებლობების მხარდაჭერისთვის და ჩვენ დღეს მივიღეთ გადაწყვეტილება კანონის ეს მუხლი გავაგრძელოთ 2026 წლამდე. ეს ცვლილება, ეს შეღავათი იყო ძალზედ ეფექტური, რამაც ხელი შეუწყო ბევრ დაწყებული და დაუსრულებელი მშენებლობის სწრაფ და ეფექტიან განხორციელებას. თუმცა, როგორც აღმოჩნდა ასეთი პროექტები იყო საკმაოდ ბევრი და მივიღეთ გადაწყვეტილება ეს შესაძლებლობა ჩვენს ბიზნესს მივცეთ 2026 წლამდე“, - განაცხადა გიორგი გახარიამ.
ნათია ლომიძე