საქართველოს მთავრობა სრულ პოსტკრიზისულ ეკონომიკურ გეგმას დაახლოებით ორ კვირაში წარადგენს. როგორც ქვეყნის მეთაური აცხადებს განსაკუთრებული ყურადღება სექტორულ მიმართულებებს მიექცევა, რომელთაგან გიორგი გახარიას განმარტებით, პირველი იქნება ტურიზმი, შემდეგ კი სოფლის მეურნეობა. დამატებითი დეტალები, თუ რა ქმედითი ნაბიჯების გადადგმას აპირებს ხელისუფლება აგრარულ სექტორში კორონავირუსით გამოწვეული ზიანის შესამსუბუქებლად, ცნობილი არ არის. თუმცა,როგორც „კომერსანტისთვის“  გახდა ცნობილი, განიხილება რთველის სახელმწიფოს მიერ თანადაფინანსების საკითხი. ამის შესახებ მედიაჰოლდინგს ღვინის მწარმოებელი კომპანია „თბილღვინოს“ დირექტორმა ზურაბ მარგველაშვილმა განუცხადა.

მისი თქმით, ღვინის სექტორს სოფლის მეურნეობის სამინისტროსთან მუდმივი კომუნიკაცია აქვს. როგორც ბიზნესმენი აცხადებს, სახელმწიფოს მხრიდან არსებობს სრული მზაობა, რომ ბიზნესს ეკონომიკური საქმიანობის გაგრძელებაში ხელი მაქსიმალურად შეუწყოს. როგორც ზურაბ მარგველაშვილი განმარტავს სოფლის მეურნეობის პროექტებში დამატებით ისეთი კომპონენტები შემოდის, როგორიც არის თანხის მაქსიმალური ზედა ზღვარის გაზრდა, რაც ბიზნესმენის თქმით, საშუალებას მისცემს კარგი საკრედიტო ისტორიის მქონე კომპანიებს, საჭიროების შემთხვევაში ბანკიდან დამატებით იაფი ფულადი რესურსი მოიზიდონ.

 „სახელმწიფოს მხრიდან კონკრეტული ქმედითი ნაბიჯების მოლოდინი ნამდვილად გვაქვს. საქართველოს მთავრობისგან და ბანკებისგან გვაქვს ინფორმაცია, რომ ჩვენ გვექნება იაფ ფულად რესურსზე წვდომა. ჩვენ კომპანიის შემთხვევაში ეს დაგვეხმარება იმ დაწყებული პროექტების დასრულებაში, რომელიც კორონავირუსის გავრცელებამდე დავგეგმეთ. ჩვენ 40 ჰექტარზე საფერავის ვენახის გაშენება გვქონდა გადაწყვეტილი, პროცესი კორონავირუსამდე დაიწყო და მიუხედავად განსაკუთრებული ვითარებისა,მარტის ბოლოს დავასრულეთ, პლუს გვაქვს საწარმოო სიმძლავრეების განვითარების გაზრდის პროექტი, რომლის გარკვეული ნაწილი მომავალ წლამდე გადავწიეთ, მაგრამ ნაწილს ვახორციელებთ. იმედი გაქვს, რომ შეთავაზებულ ფინანსურ რესურსებს ამ პროექტების დასაფინანსებლად გამოვიყენებთ. თუ რთველის პერიოდში სახელმწიფო ღვინის კომპანიებს ფინანსურ თანადაფინანსებას გაუწევს, რაც უკვე გაჟღერდა, ესეც რა თქმა უნდა კომპანიებისთვის ხელშესახები მხარდაჭერა იქნება. იმ შემთხვევაში თუ რაიმე დამატებითი ღონისძიებების გატარება იქნება საჭირო, ჩვენ გვაქვს საშუალება სოფლის მეურნეობის სამინისტროსთან გვქონდეს კომუნიკაცია“,- განაცხადა ზურაბ მარგველაშვილმა.

„კომერსანტისთვის“ რამდენიმე დღის წინ ასევე ცნობილი გახდა, რომ სოფლის მეურნეობის სამინისტრო და ღვინის ეროვნული სააგენტო მუშაობს ახალი მარკეტინგული სტრატეგიის შემუშავებაზე. როგორც „თელავის ღვინის მარნის“ დამფუძნებელმა ზურაბ რამაზაშვილმა „კომერსანტს“ განუცხადა, პროცესში ჩართულია როგორც ღვინის კომპანიები ასევე ღვინის ასოციაციები. დამატებით დეტალების გასარკვევად ღვინის ეროვნულ სააგენტოს დავუკავშირდით, თუმცა, სახელმწიფო უწყებაში ამ ეტაპზე დამატებით კომენტარს არ აკეთებენ.

ბაჩო ადამია