სახელმწიფო აუდიტის სამსახურმა ქრონიკული დაავადებების სამკურნალო მედიკამენტებით უზრუნველყოფის სახელმწიფო პროგრამის ანგარიში წარადგინა. ერთ-ერთი საკითხი რაზეც აუდიტმა გაამახვილა ყურადღება მედიკამენტების შესყიდვას უკავშირდება. ერთ-ერთი შესყიდვის პირობებში სახელმწიფოს 100 ათასი ლარის დაზოგვა შეეძლო, თუმცა მედიკამენტები ისეთი მიმწოდებლისგან შეიძინა რომ შესასყიდი თანხა გაორმაგდა.
კერძოდ, სააგენტოს მიერ გამოცხადებულ ტენდერებში ძირითადად მონაწილეობდა და იმარჯვებდა 3 ადგილობრივი კომპანია.
საქონლის მიწოდების შემჭიდროებული ვადები, რაც განსაზღვრული იყო სააგენტოს მიერ გამოცხადებულ ტენდერებში, ზღუდავდა სხვა კომპანიების, მათ შორის, უცხოური კომპანიების მონაწილეობას სატენდერო პროცედურებში, რასაც ადასტურებს ის გარემოებაც, რომ მედიკამენტების შესყიდვაზე გამოცხადებული 128 ტენდერიდან მხოლოდ 6 შემთხვევაში მიიღო მონაწილეობა უცხოურმა კომპანიამ − Sanofi-Aventis Private Co. Ltd. აღნიშნული კომპანია სააგენტოს მიერ შესყიდული მედიკამენტის უშუალო მწარმოებელია, მისგან შესყიდული საქონლის ერთეულის ღირებულება კი მნიშნვნელოვნად განსხვავდება ადგილობრივი კომპანიის შეთავაზებისგან. კერძოდ, 2017 წელს22 მედიკამენტი Losartan Potassium 100 მგ − 0,11 ლარად შესყიდულია Sanofi-Aventis Private Co. Ltd-სგან. მოცემულმა კომპანიამ მონაწილეობა მიიღო და გამარჯვებულად გამოცხადდა იმ ტენდერში, რომლის პროცედურული ვადები იძლეოდა დაახლოებით 20 დღეში მედიკამენტის მიწოდების შესაძლებლობას. აღსანიშნავია, რომ 2018 წელს იმავე მედიკამენტის შესყიდვაზე გამოცხადებულ ტენდერში, სადაც მიწოდების ვადად განსაზღვრული იყო ხელშეკრულების გაფორმებიდან 10 კალენდარული დღე, მონაწილეობა მიიღო და გაიმარჯვა სს „გეფამ“, რომლის მიერ შეთავაზებული საქონლის ერთეულის ღირებულება შეადგენდა 0,22 ლარს, რაც 2-ჯერ აღემატებოდა Sanofi-Aventis Private Co. Ltd- სგან შესყიდული საქონლის ერთეულის ღირებულებას.
მოცემულ შემთხვევაში ტენდერის გამოცხადების მომენტისთვის სააგენტოს გააჩნდა ხსენებული მედიკამენტის, დაახლოებით, 3 თვის საკმარი მარაგი. შესაბამისად, მედიკამენტის ხარჯვის გათვალისწინებით არ არსებობდა შემჭიდროებულ ვადებში მისი მიწოდების აუცილებლობა.
„აღნიშნულის გათვალისწინებით იმ ტენდერების მიხედვით, სადაც შესყიდვის საგანი იყო ის საერთაშორისო არაპატენტირებული დასახელების მედიკამენტი, რომლის განსხვავებული სავაჭრო დასახელების მედიკამენტის ერთ-ერთი მწარმოებელი იყო ასევე მოცემული უცხოური კომპანია და სატენდერო პირობებით გათვალისწინებული იყო შეზღუდული ვადები, შეზღუდვის მოხსნის შემთხვევაში, კონკურენციის პირობებში სააგენტოს გააჩნდა, სავარაუდოდ, 106,800 ლარის ეკონომიის მიღების შესაძლებლობა“, - განმარტავს აუდიტის სამსახური.
0
Gbc.ge