„ქვეყანაში ინფრასტრუქტურის მთავარი პრობლემა არის გაჭიანურებული პროცესები, თუ ეს არ მოგვარდა, ბიზნესი ვერ მოძრაობს, შესაბამისად, სახელმწიფოში ტეპი შენელებულია.“ - ასე აფასებს „მენაშენეთა ასოციაციის“ წარმომადგენელი თორნიკე აბულაძე კოჯორი-შინდისის მიმდებარე ტერიტორიებზე შეჩერებულ მშენებლობებს.
როგორც დედაქალაქის მერმა რამდენიმე დღის წინ აღნიშნა, კოჯორი-შინდისის მიმდებარე ტერიტორიებზე, სადაც გენერალური გეგმის ფარგლებში მშენებლობების განხორციელება დროებით შეჩერდა, განაშენიანების პირველადი საპროექტო გადაწყვეტილებები მომზადდა.
კახა კალაძის თქმით, მიწათსარგებლობის გენერალური გეგმის ფარგლებში, განისაზღვრა 11 არეალი, რომელთა შორის კოჯორი-შინდისის მიმდებარე ტერიტორიებია, მშენებლობების განხორციელება დროებით შეჩერდა, რათა აღნიშნულ მიწის ნაკვეთებზე ქაოტური განაშენიანება არ მომხდარიყო.
„მენაშენეთა ასოციაციაში“ მიაჩნიათ,რომ აუცილებელია პროცესები სწრაფად მიმდინარეობდეს და მესაკუთრეებს შეეძლოთ საკუთარი მიწების გამოყენება, სხვა შემთხვევაში ბიზნესი ვერ განვითარდება.
„ქაოტური სურათის მიღების საშიშროება ცხადია ზოგადად არსებობს ხოლმე, მაგრამ „მგლის შიშით ცხვარი არ უნდა გავწყვტოთ“. ეს არ ნიშნავს რომ პროცესი სრულად უნდა შევაჩეროთ, მაგრამ ისიც მესმის, რომ ეს დასალაგებელია სისტემურად, თუმცა სწრაფად. დღესაც აკრძალულია იქ მშენებლობა, კოჯორი-შინდისის მიმდებარე ტერიტორიებზე არის ძალიან ბევრი კერძო მესაკუთრე, რომელსაც უნდა თავისი ტერიტორიის განვითარება და ამასაც ვერ ახერხებს. ამიტომ მგონია, რომ განაშენიანების პირველადი საპროექტო გადაწყვეტილებები სწრაფად დასაძრავი თემაა.“ - ამბობს თორნიკე აბულაძე.
თბილისის მერმა ურბანული განვითარების საქალაქო სამსახურის უფროსს, გიორგი ებანოიძეს მიწის მფლობელებთან და სამშენებლო სექტორთან აქტიური კომუნიკაცია დაავალა. კახა კალაძემ დედაქალაქის მთავრობის სხდომაზე აღნიშნულ თემასთან დაკავშირებით, საჯარო განხვილვების მოწყობისა და მოსახლეობისთვის ინფორმაციის მიწოდების დავალებაც გასცა.
მარიამ მორგოშია
თორნიკე აბულაძე
