როგორია ბიზნესის გამოწვევები „COVID 19“–ის პირობებში? - რადიო კომერსანტის გადაცემაში ბიზნესი და სამართალი“ ნინო ლიპარტიასთან ერთად,ევროპული ბიზნეს ასოციაციის გენერალური დირექტორის მოადგილემ, მარიამ ქუჩულორიამ და  „არდი დაზღვევის“ გენერალურმა დირექტორმა ქართლოს ყორანაშვილმა, დადგენილი ეკონომიკური შეზღუდვების აუცილებლობა შეაფასეს.

მარიამ ქუჩულორიას თქმით,  ბიზნესის მთავარ გამოწვევას პანდემიის პერიოდში,  სახელმწიფოს არაპროგნოზირებადი  გადაწყვეტილებები წარმოადგენდა.

კოვიდ 19-ის პირობებში აღმოვაჩინეთ,რომ შესაძლებელია თანამშრომლების ნაწილთან დისტანციური მუშაობის გაგრძელება, ასევე გაიზარდა ელექტრონული ვაჭრობა - ბიზნესი გადავიდა დისტანციური სერვისების მიმართულებით. უნდა ითქვას,რომ ამ პერიოდში ბიზნესისთვის ყველაზე დიდი გამოწვევა უკავშირდება არა წარმოების შეზღუდვას ან ოპერაციების შეჩერებას, არამედ  გაურკვევლობას.  არაერთი გამოკითხვა და კვლევა გვქონდა, სადაც გამოიკვეთა ბიზნესის გამოწვევები. პირველი პრობლემა იყო,ის რომ მათ არ იცოდნენ,რა მოხდებოდა მომავალში. კომპანიებს,რომლებსაც მანამდე ჰქონდათ გარკვეული სტანდარტები შემუშავებული და დაკმაყოფილებული, არ გასჭირვებიათ. ამ სტანდარტებს ერთგვარ გამოწვევად აღიქვამენ ხოლმე კომპანიები, თუმცა, კოვიდ 19-მა დაგვანახა,რომ ევროპულ სტანდარტებთან შესაბამისობამ, ასეთი კომპანიები მალე დაუბრუნა ჩვეულ პირობებს.

მსგავსად იმისა,როცა სახლი იწვის და მხოლოდ ერთ ოთახში ცდილობ შუქი ჩააქრო, ქვეყანამ,როგორც არ უნდა გამოასწოროს ეპიდ სიტუაცია და როგორი დაცულებიც არ უნდა ვიყოთ, მაინც დამოკიდებულები ვართ მსოფლიო ეპიდემიოლოგიურ სიტუაციაზე. არ მინდა დავიჯერო,რომ მეორე ტალღა მოხდება და ისევ ჩაიკეტება ბიზნესი,რადგან ყველამ ყველაფერი უკვე ისწავლა და ბიზნესისვე ინტერესებშია,რომ მისი თანამშრომელი ჯანმრთელი იყოს და არ შეაჩეროს ფუნქციონირება. იყო მაგალითები,როდესაც არ ჰქონდათ ვალდებულება გარკვეული  ბიზნესის წარმომადგენლებს,რომ შეეჩერებინათ ფუნქციონირება, თუმცა, მათ დამატებითი ზომების მიღებისთვის და თანამშრომლების დაცვისთვის, მაინც შეწყვიტეს საქმიანობა. ბიზნესი უფრო მეტად ზრუნავს თავის თანამშრომლებზე,ვიდრე სახელმწიფო მოქალაქეებზე. ბიზნესისთვის ადამიანური კაპიტალი ნომერ პირველია და უფრთხილდება მას. ., - აღნიშნავს მარიამ ქუჩულორია.

„არდი დაზღვევის“ გენერალური დირექტორის, ქართლოს ყორანაშვილის განცხადებით,ხელისუფლებას ეპიდემიოლოგებთან ერთად, სხვა დარგის სპეციალისტების რჩევებიც უნდა გაეთვალისწინებინა.

ქართული ბიზნესი მდგრადი არ აღმოჩნდა. მდგრადი აღმოჩნდა ჩვენი ეპიდემიოლოგიური სექტორი. ბიზნესი კი საკმაოდ ბევრ პრობლემას წააწყდა. ბიზნესი ნიშნავს საქმიანობას, საქმიანობა კი მოძრაობას, ეპიდემიოლოგიური სიტუაციის გამო, გადაწყდა,რომ უნდა მომხდარიყო ქვეყნის უძრაობის მართვა, რაც სრულიად აბსურდია.

კრიტიკული სიტუაცია არ ნიშნავს იმას,რომ ყველაფერი უნდა გაჩერებულიყო. როდის ყოფილა სახელმწიფო მართულიყო ერთი დარგის სპეციალისტების მიერ, ამ დროს უნდა მოუსმინო ყველა სექტორს, მათ შორის ეკონომისტებს.  იქნებ ეპიდემიოლოგების რჩევები ფარავენ სხვა დარგის ინტერესებს?  სახელმწიფოს მმართველმა  უნდა მოახერხოს სწორი გადაწყვეტილების მიღება,რომ მოძრაობა შენარჩუნდეს. სახელმწიფოს არ უმართავს ეს 4 თვე, ის მართეს ეპიდემიოლოგებმა.

ჩვენი კომპანიისთვის ეს პერიოდი რთული არ ყოფილა, იმ თვალსაზრისით,რომ დიჯიტალიზაციასთან დაკავშირებით არსებული რეფორმების ტალღა ადრევე დავიწყეთ, რამაც ადამიანური რესურსების მართვა და ტექნოლოგიური პროცესები გაგვიმარტივა. თუმცა,ჩვენც დამოკიდებულები ვართ სხვა კომპანიებზე. ეს ყოველივე არ ნიშნავს იმას,რომ თუ მე კარგად ვარ, ბედნიერი ვარ და არ გვაინტერესებს,სხვა პარტნიორ კომპანიებთან რა მოხდა. ჩვენ გვყავს ათასობით კლიენტ კომპანია და მათთან ურთიერთობით ვიგებთ,რამდენად გაუჭირდა ბიზნესს.  მათმა ნაწილმა უარი თქვა დაზღვევაზე, ნაწილი კი გვთხოვს გადავუვადოთ და შევუმსუბუექოთ გადახდები.

კოვიდ 19-ის მთავარი მიგნება იყო ის,რომ გამოჩნდა,რამდენად დამოკიდებულები ვართ ერთმანეთზე. მე ვიოცნებებ,რომ სახელმწიფომ დაინახოს,რამდენად  არის სახელმწიფო დამოკიდებული კერძო სექტორზე. ის ბიზნესს ვერ აღიქვამს, ის აღიქვამს მას  მხოლოდ ქაღალდზე, სახელწოდებით, შიგნით რა ხდება არ იცის, ვერ აღიქვამს ასევე ბიზნესებს ჯამში  და აღიქვამს მხოლოდ მსხვილ ორგანიზაციებს. სახელმწიფო ვერ ხედავს ელიავაზე ყალიბის ჩამომსხმელ ინდ.მეწარმეს. ეს არის ბიზნესი, თორემ მსხვილი ბიზნესის დანახვა ადვილია,- ამბობს ქართლოს ყორანაშვილი.