რა შემადგენლობისაა და გვიცავს თუ არა covid 19-ისგან ბაზარზე არსებული სადეზინფექციო საშუალებები, რომელსაც მოსახლეობა ყოველდღიურად დეზინფექციისთვის ვიყენებთ? რატომ ვლინდება ინფიცირების მზარდი მაჩვენებელი სხვადასხვა დაწესებულებებში, სადაც აუცილებელია ზედაპირებისა და ხელების სწორედ ამ ხსნარებით დამუშავება?
საქართველოში წარმოებული ანტისეპტიკური ხსნარები სტანდარტებს რომ არ შეესაბამება ადასტურებს სადეზინფექციო საშუალებების ერთ-ერთ მსხვილი მწარმოებელ - დისტრიბუტორ კომპანია „კლინტექი“. კომპანიის გენერალური დირექტორი ლადო ჭელიძე აცხადებს, რომ ხშირ შემთხვევაში ბაზარზე გამოხდილ წყალში გაზავებული აცეტონით შექმნილი პროდუქცია იყიდება, რომელიც covid 19 -ს ვერ უმკლავდება.
„ჩვენ სადეზინფექციო ხსნარების წარმოება კორონავირუსით გამოწვეული პანდემიის გავრცელებამდე დავიწყეთ. იქედან გამომდინარე, რომ ჩვენი კომპანიის მიზანია იმპორტის ჩანაცვლება, ისედაც ვგეგმავდით წარმოების დაწყებას და ჰორეკასა და სამედიცინო სექტორისთვის პროდუქტის შეთავაზებას. დავარეგისტრირეთ რამდენიმე პრეპარატი ზედაპირებისთვის, მცირე ზედაპირებისთვის და ხელებისთვის, თუმცა აქ იკვეთება სხვა პრობლემა. კომპანიებმა დაარეგისტრირეს პრეპარატი, მაგრამ საბოლოდ საკითხავია სადეზინფექციო საშუალებები სტანდარტებს შეესაბამება თუ არა. არ მგონია ამ მიმართულებით ვინმე რამეს აკონტროლებდეს. ხშირად დავდივარ მაღაზიებში, სადეზინფექციოს ხელზე მასხამენ, ხსნარს საშინელი სუნი აქვს, ეს წყალში გაზავებული აცეტონია უფროა, ვიდრე ხარისხიანი სადეზინფექციო საშუალება“, — აცხადებს ლადო ჭელიძემ.
„კომერსანტის“ კითხვაზე როგორ ხდება ხსნარის შემოწმება პროფესიონალური სარეცხი და პერსონალის ჰიგიენის საშუალებების უმსხვილეს მწარმოებელ - დისტრიბუტორი კომპანიის გენერალური დირექტორი ლადო ჭელიძე აცხადებს, რომ მას შემდეგ, რაც დაავადებათა კონტროლის მიერ კონკნტრილირებად საწარმოს სადეზინფექციო საშუალებები წარმოების ლიცენზია მიეცემა, არ ხდება მისი შემოწმება იმაზე, თუ რამდენად კეთილსინდისიერად ასრულებს მეწარმე სერთიფიკატით გათვალისწინებულ მოთხოვნებს.
„კომპანიამ ლუგარის კვლევით ცენტრში რაღაც ნიმუში წაიღო, ნიმუშმა დადებითი დასკვნა მიიღო, მაგრამ შემდგომ შემოწმება არ ხდება. კომპანია რას აწარმოებს არავინ ამოწმებს, ქვეყანაში გადამოწმების მექანიზმი არ არსებობს. ჩვენ ვაცხადებთ, რომ უნდა არსებობდეს ორგანიზაციები, რომელიც საკონტროლო შესყიდვებს განახორციელებს. „საიდუმლო მყიდველი“ ბაზარზე სადეზინფექციო ხსნარების შეისყიდის, ჩაატარებს ტესტირებებს და რეალურად გავიგებთ რა ასხია ბოთლში. დავუშვათ, რომ სპირტს იყენებენ, ჩნდება კითხვა ეს სპირტი რამდენად სუფთაა, შეიძლება შემადგენლობაში ეწეროთ სპირტი, მაგრამ აცეტონს იყენებდნენ, რამაც შეიძლება ძლიერი ალერგია გამოიწვიოს“, - აცხადებს ლადო ჭელიძე.
„კლინტექის“ გენერალური დირექტორის მტკიცებით, სადეზინფექციო საშუალებების გამოყენებით მოსახლეობა კორონავირუსისგან დაცული არ არის. მეტიც ლადო ჭელიძე ამბობს, რომ იაფფასიანი სადეზინფექციო საშუალებებმა ინტოქსიკაცია და სხვა დაავადებებიც შეიძლება გამოიწვიოს.
„მე ვიცი, რომ ჩვენ წარმოებაში რა სადეზინფექციო ხსნარიც გვაქვს, მაღალ ხარისხიანია, რაც მივიტანეთ ლუგარში იმას ვაკეთებთ ახლაც. დღეს შეიძლება ვირუსს ვებრძვით, მაგრამ როდესაც თქვენ პრეპარატს, რომელიც არ არის არის მიღებული ნორმებით წარმოებული და რომელსაც ხშირად გამოიყენებთ, დღეში მინიმუმ ათჯერ უნდა კანზე დაიტანოთ, ეს ყველაფერი ორგანიზმში იწოვება, რასაც შეიძლება ინტოქსიკაცია მოჰყვეს. შეიძლება კორონავირუსით კი არა კიბოთი დაავადდე, რომელი უფრო საშიშია, ამ ეტაპზე არ ვიცი“, - ამბობს ლადო ჭელიძე.
ლადო ჭელიძე „კომერსანტთან“ საუბარში განმარტავს, რომ ქართული წარმოების ანტისეპტიკური ხსნარის ფასი მის შემადგენლობას არ შეესაბამება.
„ბაზარზე ისეთი დაბალი ფასებია, წარმოუდგენელია იმ შემადგენლობით, აწარმოონ რომელიც დაარეგისტრირეს, თვითღირებულებაში ვერ ჩაეტევიან. მაგალითად იზოპროფილის სპირტი ერთი ლიტრი ახლა 7-8 ლარი ღირს, ეთანოლის სპირტი 6 ლარამდე შეიძლება იყიდოთ, ამას ემატება, შეფუთვა, ეტიკეტი, დისტრიბუცია, დღგ და ა.შ. ამ დროს კი სადეზინფექციო საშუალებები 6 ლარი ღირს. მაგალითად რაღაც x ხსნარს აწერია, რომ ვირუსის მოსაკლავად სამი მილილიტრი უნდა შეიზილო სამი წუთის განმავლობაში, ეს რომ სცადოთ ნახავთ, რომ ხსნარი გაცილებით ადრე შეშრება. შესაბამისად როგორ მოხდება, დეზინფექცია, როდესაც სპირტი უკვე აორთქლებულია. ლაბორატორიაში ყველაფერი იდეალურადაა, აორთქლების შანსი ნაკლებია, მაგრამ განსხვავებულ სივრცეში სხვა გარემო პირობებია, რა დროსაც ხსნარი ვირუსის განადგურებას ვერ მოასწრებს“,- განმარტავს ლადო ჭელიძე.
ბაჩო ადამია