იანვარში იმპორტი გასული წლის ანალოგიურ პერიოდთან შედარებით 38.7%-ით $779 მლნ-მდე გაიზარდა. საიმპორტო პარტნიორებში პირველი ადგილი ტრადიციულად თურქეთმა დაიკავა, საიმპორტო პროდუქციაში მსუბუქმა ავტომობილებმა, მაგრამ ზრდის უფრო მაღალი - 97.7%-იანი ტემპი ნავთობ-პროდუქტების მიმართულებით დაფიქსირდა.

მიმდინარე წლის იანვარში ნავთობპროდუქტების იმპორტმა $72.7 მლნ-ს მიაღწია. რაც გასული წლის ანალოგიური პერიოდის მაჩვენებელს თითქმის 2-ჯერ აღემატება. დრამატული ზრდის უმთავრესი მიზეზი მსოფლიო ბაზარზე ნედლი ნავთობის გაძვირებაა. თუ გასული წლის იანვარში ბარელი ნავთობის ფასი $65-ს შეადგენდა, წელს $90-ს მიაღწია. უკვე გადამუშავებული ნავთობპროდუქტის ფასი პლატსზე დგინდება, მაგრამ პლატსის ფასს დიდწილად ნედლი ნავთობის ღირებულება განსაზღვრავს.

საწვავი განსაკუთრებული პროდუქტია და მისი ფასის ცვლილება ინფლაციაზე მნიშვნელოვან გავლენას ახდენს. არსებული 13.9%-იან ინფლაციის ერთ-ერთი გამომწვევი მიზეზი სწორედ საწვავის გაძვირება გახდა.

საწვავი აქციზით იბეგრება ტონა ბენზინი (1300 ლიტრი) 500 ლარით და ტონა დიზელი 400 ლარით რაც 1 ლიტრ ბენზინს 38 თეთრით და 1 ლიტრ დიზელს 31 თეთრით აძვირებს. ბოლო პერიოდში აქციზის გაუქმების ან როგორც მინიმუმ განახევრების აზრი პოპულარული გახდა, რასაც მთავრობა შემოსავლების დაკარგვის მოტივით არ ეთანხმება. საწვავის აქციზიდან 2021 წელს ბიუჯეტი 518 მლნ ლარით შეივსო. 0.5 მლრდ ლარი ცოტა არ არის, მაგრამ მეორე მხარეს ორნიშნა ინფლაციაა, რომელიც პირველ დარტყმას სოციალურად მოწყვლად ფენას აყენებს. ბოლო 1 წელიწადში სოციალური შემწეობის მიმღებთა რაოდენობა 116 ათასით 648 ათასამდე გაიზარდა.

საქართველოში ბრენდირებულ ავტოგასამართ სადგურებზე 1 ლიტრი რეგულარის ტიპის ბენზინის შეძენა 3.10-3.23 ლარადაა შესაძლებელი, პრემიუმი 3.20-3.27 ლარი ღირს, სუპერი - 3.30-3.37 ლარი, დიზელის ფასი 3.09 ლარიდან იწყება და 3.25-ზე ადის. იმპორტიორები უახლოეს მომავალში ფასების მოსალოდნელ ზრდას ადასტურებენ.