დღეიდან სავალუტო ჯიხურების ფუნქციონირება განახლდა. საქართველოს მთავრობის დადგენილების მიხედვით, საქართველოს მთელ ტერიტორიაზე ვალუტის გადამცვლელი პუნქტები ჯანდაცვის სამინისტროს რეკომენდაციებით აგრძელებენ მუშაობას.
„საქართველოს ვალუტის გადამცვლელთა ასოციაციის“ აღმასრულებელმა დირექტორმა ნინო ქავთარაძემ „კომერსანტთან“ საუბრისას აღნიშნა, რომ სავალუტო ჯიხურების გახსნის დროში ასე გაწელვამ გამოიწვია ის, რომ ჯიხურების რაოდენობა ბაზარზე ნელ-ნელა შემცირდება და სავარაუდოდ, მათი დიდი ნაწილი დაიხურება.
„ძალიან ბევრი ფიქრობს სავალუტო პუნქტების დახურვას, ამ შეზღუდვებმა და გახსნის დროში ასე გაწელვამ გამოიწვია ის, რომ ჯიხურების რაოდენობა ბაზარზე ნელ-ნელა შემცირდება. სავარაუდოდ, მათი დიდი ნაწილი დაიხურება. როგორც ჩემთვის არის ცნობილი, რამოდენიმე მათგანმა უკვე მიმართა მარეგულირებელს დახურვის მოთხოვნით, თუმცა ზუსტად რა რაოდენობაზეა სუბარი ამ ეტაპზე არ მაქვს ინფორმაცია. სექტორი ძალიან მძიმე მდგომარეობაშია და არ ვიცით როგორ შეძლებს ბაზარზე ისე მყარად დაბრუნებას, როგორც აქამდე იყო. ჩვენი სექტორი გამოირჩევა მცირე კაპიტალით და დიდი ზარალის წინაშე აღმოვჩნდით, ხარჯვითი ვალდებულებები გვრჩებოდა, შემოსავალი კი განულებული იყო, რადგან ჩვენ კანონი დისტანციურად საქმიანობის უფლებას არ გვაძლევდა, რამაც ძალიან ცუდ მდგომარეობაში ჩაგვაყენა. აღსანიშნავია, რომ დახურვამდეც ცუდი მდგომარეობა იყო, რადგან კურსის ხშირმა ცვლილებმა ძალიან დიდი ზიანი მიაყენა სავალუტო ჯიხურებს და ამიტომ საუბარია იმაზე, რომ ბევრმა მათგანმა მუშაობა ვეღარ გააგრძელოს და 800 ობიექტიდან, ნაწილი დაიხუროს“, - განმარტავს ნინო ქავთარაძე.
აღსანიშნავია, რომ კორონავირუსის პრევენციის მიზნით, ვალუტის გადამცვლელი 800-მდე პუნქტი იყო დახურული. მთავრობის დადგენილებით, სავალუტო ჯიხურების საქმიანობა 31 მარტს შეჩერდა და მხოლოდ დღეს, 8 ივნისს აღდგა.
ნინო თამაზაშვილი