ამონიუმის ნიტრატი, რომელიც ბეირუთის პორტში აფეთქდა, სავარაუდოდ „რუსთავის აზოტის“ ქარხანაში იყო წარმოებული, ამის შესახებ „რუსთავის აზოტის“ გენერალური დირექტორის მოადგილემ ლევან ბურდილაძემ განაცხადა.
თუმცა, მას ამასთან დაკავშირებით ზუსტი ინფორმაცია არ აქვს, რადგანაც კომპანია, რომელსაც ის წარმოადგენს, ქარხანას მხოლოდ 2017 წლიდან მართავს, ლიბანში აფეთქებული ნიტრატი კი 2013 წელს იყო წარმოებული.
„მაშინ ქარხანას სხვა იურიდიული პირი შპს „რუსთავის აზოტი“ მართავდა, ამიტომ ზუსტად ვერაფერს გეტყვით“, - განაცხადა ბურდილაძემ.
მისი თქმით, ამონიუმის ნიტრატის ვარგისიანობის ვადა მხოლოდ 6 თვეა. მისი შენახვა 7 წლის მანძილზე, თანაც უსაფრთხოების ნორმების უხეში დარღვევით - დაუშვებელია.
„ამ პროდუქტის შენახვა პორტთან ახლოს, მაღალი ტენიანობის პირობებში კატეგორიულად აკრძალულია. ასევე, დაუზუსტებელი ინფორმაციით, იქვე ახლოს ფეირვერკების წარმოება ხდებოდა. ეს იგივეა, რომ ცეცხლი გაზის და ბენზინის ცისტერნასთან ახლოს აანთო“, - განაცხადა ბურდილაძემ.
ამჟამად „რუსთავის აზოტს“ თავის პროდუქცია ექსპორტზე სხვადსხვა ქვეყნებში გააქვს - მათ შორის, იტალიაში, ბრიტანეთში, საფრანგეთში, უკრაინაში, მაროკოში, ლათინური ამერიკის ქვეყნებში.
ლიბანის მთავრობის ინფორმაციით, ბეირუთის პორტში 4 აგვისტოს 2750 ტონა ამონიუმის ნიტრატი აფეთქდა, რომელიც 2013 წელს იყო ჩამორთმეული . ხომალდი, რომელსაც საშიში ტვირთი ბათუმიდან მოზამბიკში გადაჰქონდა, ბეირუთის პორტში შემთხვევით, ტექნიკური პრობლემების გამო აღმოჩნდა, თუმცა, მის მფლობელებს ტვირთი ვალების გამო ჩამოერთვათ.
აფეთქების შედეგად 100-ზე მეტი ადამიანი დაიღუპა, 4000-ზე მეტი დაშავდა.
წყარი Ekhokavkaza.com
მოამზადა თენგიზ აბლოთიამ
რუსთავის აზოტი
