აფხაზეთიდან შემოტანილი კონტრაბანდული სიგარეტი მანჩესტერი აჭარის სავაჭრო ქსელში იყიდება. სოციალურ ქსელში ერთ-ერთი მომხმარებელი მის მიერ აჭარაში შეძენილი სიგარეტის კოლოფის ფოტოს აქვეყნებს. ფოტოზე მკაფიოდ ჩანს აფხაზური აქციზური მარკა, რომელსაც საქართველოს დანარჩენ ტერიტორიაზე იურიდიული ძალა არ გააჩნია. როგორ აღმოჩნდა აღნიშნული სიგარეტი აჭარის სავაჭრო ქსელში და რატომ არ რეაგირებენ შესაბამისი სამსახურები?
ეს ქართულ ბაზარზე "მანჩესტერის" პირველი გამოჩენა არ არის — ოკუპირებული აფხაზეთიდან შემოტანილი სიგარეტი ზუგდიდსა და სამეგრელოს სოფლებში 2.5 ლარად იყიდება, ადგილობრივების თქმით, ეს სიგარეტი აფხაზეთში 1,5 ღირს. სამეგრელოში ამბობენ, რომ ამ კონკრეტული სიგარეტის მოხმარებას სხვადასხვა უკუეფექტები მოხმარების პროცესშივე აქვს, როგორებიცაა სისუსტის შეგრძნება და თავბრუსხვევა.
სს კოდექსის მე-200 მუხლის თანახმად, ქმედება დასჯადია, როდესაც უაქციზო საქონლის ღირებულება აღემატება 2 000 ლარს, ხოლო თუ მისი ღირებულება 2000 ლარზე ნაკლებია, ამ შემთხვევაში ადგილი აქვს ადმინისტრაციულ სამართალდარღვევას, რაზედაც რეაგირებას ახორციელებს შემოსავლების სამსახურის შესაბამისი დანაყოფი.
"კომერსანტი" აჭარის სავაჭრო ქსელში კონტრაბანდული სიგარეტის გაყიდვის თაობაზე ფინანსთა სამინისტროს საგამოძებო სამსახურს დაუკავშირდება, უწყების პასუხს მოგვიანებით შემოგთავაზებთ.
მარიამ მორგოშია
თამბაქო
