დღეიდან საქართველოში ყველა სახის მაღაზიამ, ბაზრობებმა და სავაჭრო მოლებმა მუშაობა განაახლეს. აღნიშნული გადაწყვეტილება პრემიერ-მინისტრმა გიორგი გახარიამ უწყებათაშორისი საკოორდინაციო საბჭოს სხდომაზე 27 მაისს გამოაცხადა.

„სითი მოლის“ დირექტორმა ლევან მესხელმა „კომერსანტთან“ საუბრისას აღნიშნა, რომ სავაჭრო ცენტრში მდებარე მაღაზიების უმეტესობა გაიხსნა, დანარჩენი ნაწილი კი უახლოეს პერიოდში გეგმავს მუშაობის დაწყებას.

„ძირითადი მაღაზიები დღეს გაიხსნა, ჯერჯერობით არც ერთ მათგანს არ დაუტოვებია მოლი, თუმცა არის რაღაც ნაწილი რომელიც ახლა არ გახსნილა, თუმცა ემზადება და უახლოეს პერიოდში მიიღებს მომხმარებლებს. საკმაოდ მაღალი აქტივობა შეინიშნება ორივე მოლში საბურთალოზეც და გლდანშიც. რაც შეეხება წესების დაცვას, მოიჯარეები ძალიან ადეკვატურად შეხვდნენ ცვლილებებს და მათ ტერიტირიაზე დეზობარერების თუ სხვა საჭირო ინვენტარის განთავსების საჭიროებას. ჩვენ კი ჩვენი მხრიდან მთელი მოლის ტერიტორიაზე განვათავსეთ საჭირო ინვენტარი. ამ პერიოდში საკმაოდ დიდი  ზარალი მოგვადგა, თუმცა ზუსტ რიცხვს ვერ დავაკონკრეტებ. ბოლო პერიოდი კომპანიას არ აქვს შემოსავალი, ხარჯის ნაწილი კი ისევ უცვლელი დაგვრჩა და  რეზერვიდან ვაფინანსებდით“, - განმარტა ლევან მესხელმა.

„ისთ ფოინთის“ წარმომადგენელი თეაკო ლომინაძე აღნიშნავს, რომ სავაჭრო ცენტრში დილიდან მომხმარებლების დიდი ნაკადი შეინიშნებოდა.

„დილიდან ადამიანების დიდი ნაკადი შეინიშნება, 10 საათამდეც მომხმარებლები მაღაზიების გახსნას ელოდებოდნენ, ზოგადად ძალიან დიდი აქტივობაა. „ისთ ფოინთში“ ყველა მაღაზია გაიხსნა და რაც მთავარია არც ერთი ბრენდი არ გასულა. ყველა ის მაღაზია რომელიც Covid 19-მდე ჩვენთან ფუნქციონირებდა - დღეს გაიხსნა. რაც შეეხება სიახლეებს, ჯერჯერობით მხოლოდ გახსნაზე ვართ კონცენტრირებული და ველოდებით როგორ განვითარდება სიტუაცია, ამიტომ ამ ეტაპზე რომელიმე ახალი ბრენდის შემოყვანა არ იგეგმება“, - განაცხადა თეაკო ლომინაძემ.

აღსანიშნავია, რომ სავაჭრო ობიექტებს საკოორდინაციო საბჭოს დადგენილებით გათვალისწინებული მოთხოვნების დაცვა უწევთ. ობიექტები აღჭურვილი უნდა იყოს დეზობარიერითა და სადეზინფექციო ხსნარით. ასევე, უნდა უზრუნველყონ მომხმარებლის თერმორსკრინინგი. თავად  მომხმარებლისთვის კი სავალდებულოა სამედიცინო ნიღბის ქონა, წინააღმდეგ შემთხვევაში ისინი ობიექტზე არ დაიშვებიან. საკოორდინაციო  საბჭოს დადგენილებით, მოლის საერთო სივრცეში 10 კვ.მ. ფართზე მხოლოდ ერთი ადამიანი დაიშვება, ინდივიდუალური ფართით მოსარგებლეთა სივრცეში კი ასევე ერთი პირი 5 კვ.მ. ფართზე.