თბილისში მდებარე სავაჭრო ცენტრების უმეტესობამ რეალიზაცია თითქმის სრულად აღიდგინა. პანდემიისას მთავარ გამოწვევად ამ ეტაპზე მიწოდების უზრუნველყოფაა. ამიტომ ბიზნესისთვის მთავარი შეუზღუდავი მუშაობის შესაძლებლობაა, რასაც კოვიდინფიცირების ბოლო მონაცემები კითხვის ნიშნის ქვეშ ტოვებს.
როგორც ,,გალერეა თბილისის“ ხელმძღვანელი ნიკა ცინცაძე ,,კომერსანტთან“ ამბობს, დაანონსებული მეხუთე ტალღა და ლოკდაუნის შესაძლო გამოცხადება მდგომარეობას საპირისპიროდ შეცვლის და უკიდურესად დაამძიმებს სიტუაციას, რასაც კომპანიების ნაწილმა შეიძლება ვერც გაუძლოს.
,,მძიმე პერიოდი გადავიტანეთ. თუკი ეპიდემიოლოგების რეკომენდაციებს გაითვალისწინებენ და ისევ ლოკდაუნს გამოაცხადებენ, სერიოზულ დანაკარგს მივიღებთ, ბიზნესისთვის რთულად გადასატანი გახდება. 2020 წლიდან მოყოლებული, 2 ლოკდაუნი გადავიტანეთ, თუ ისევ მოგვიწევს გაჩერება, წარმოდგენაც არ მაქვს, რა შეიძლება ამ პროცესს მოჰყვეს. ჯერჯერობით კი სტაბილური სიტუაციაა. გაყიდვები თითქმის დაუბრუნდა პანდემიამდელ მაჩვენებელს, წინა წელთან შედარებით, რეალიზაციაში 90%-იანი ზრდაა. ვიზიტორების რაოდენობა კი 70%-ით არის აღდგენილი. იქიდან გამომდინარე, რომ ქალაქის ცენტრში ვმუშაობთ, ამან პოზიტიური გავლენა მოახდინა“, - ამბობს ,,კომერსანტთან“ ნიკა ცინცაძე.
მისი თქმით, ,,გალერეა თბილისი“ დაახლოებით 100 მაღაზიას აერთიანებს. აქედან 5-მდე ობიექტი პანდემიისას დაიკეტა, თუმცა ამის მიზეზი უშუალოდ კორონავირუსი არ გამხდარა.
,,პრობლემა მხოლოდ პანდემიას არ უკავშირდება. მოთხოვნა მეტია, ვიდრე მიწოდება. ამიტომ ვარჩევთ, ახალი ბრენდები შემოვიყვანოთ, რამდენიმე შევარჩიეთ კიდეც, ჯერჯერობით ვერ დავაკონკრეტებთ, თუმცა ვცდილობთ, ის ბრენდები შევთავაზოთ მომხმარებელს, რომელიც ქვეყანაში არ არის. დეტალები რამდენიმე თვეში გაირკვევა და უკვე 2022 წლიდან დაანონსებას შევძლებთ“, - ამბობს ნიკა ცინცაძე.
მისი ინფორმაციით, ,,გალერეა თბილისში“ დასაქმებულების რაოდენობა, მაღაზიების თანამშრომელთა ჩათვლით, დაახლოებით 1300-მდეა.
მდგომარეობა სტაბილურად ფასდება ,,თბილისი მოლშიც“. სავაჭრო ცენტრის მარკეტინგის სამსახურის ხელმძღვანელი ნატა გოგოლაძე ამბობს, რომ პანდემიის გამო მაღაზიები არ დახურულა, თუმცა გეგმიური ჩანაცვლებები მიმდინარეობს.
,,თბილისი მოლში“ 200-მდე ობიექტი ფუნქციონირებს. უშუალოდ პანდემიის გამო გამო დაკეტილიყო, ასეთი შემთხვევა არ არის, თუმცა ხდება ხოლმე, როცა გეგმიური ჩანაცვლებებია. მომხმარებელი საგრძნობლად გააქტიურდა. ამას ხელი შეუწყო სწავლის პროცესის დაწყებამაც. ნოემბერში ,,შავი პარასკევია“, შემდეგ უკვე საახალწლო სეზონი, რაზეც დიდ იმედს ვამყარებთ“, - ამბობს გოგოლაძე ,,კომერსანტთან“.
მისივე თქმით, თბილისი მოლში 200-მდე იურიდიული პირი ოპერირებს. ჯამში კი სავაჭრო ცენტრი 2700 ადამიანს ასაქმებს.
ანალოგიური მდგომარეობაა ,,ისთ ფოინთშიც“. სავაჭრო ცენტრის მარკეტინგის სამსახურის უფროსი თეიკო ლომინაძე აღნიშნავს, რომ გაყიდვების პროცენტული მაჩვენებლის გაჟღერება ამ ეტაპზე არ შეუძლიათ, თუმცა დინამიკა აშკარად დადებითია.
,,ამ ეტაპზე ,,ისთ ფოინთში“ 250-მდე ბრენდია წარმოდგენილი. პანდემიის გამო არ გასულა არავინ, აღდგენის პროცესი მიმდინარეობს სტაბილურად, როგორც გვქონდა დაგეგმილი. რაც შეეხება სამომავლო გეგმებს, წინასწარ საუბარი გვიჭირს. ეს ერთ-ერთია, რაც კოვიდმა გვასწავლა, რომ გრძელვადიანი გეგმები არ დავსახოთ, ამიტომ მიჭირს ამაზე პროგნოზის გაკეთება“, - ამბობს თეიკო ლომინაძე.
მისი ინფორმაციით, ამჟამად მთლიანად სავაჭრო ცენტრში 3000-მდე ადამიანია დასაქმებული.
ჯანდაცვის სპეციალისტები მოსალოდნელ მეხუთე ტალღასა და საფრთხის აცილების გზებზე საუბრობენ. ბოლო დღე-ღამის განმავლობაში საქართველოში კოვიდინფიცირების 4775 ახალი შემთხვევა დაფიქსირდა და დადებითობის მაჩვენებელმა 10%-ს მიაღწია.
არსებულ სიტუაციაში, როცა იმუნიზაციის ტემპი ზრდის ნაცვლად, იკლებს, ეპიდემიოლოგები კოვიდ-19-ის შესაჩერებლად სხვა გამოსავალს ვერ ხედავენ. დაავადებათა კონტროლის ეროვნული ცენტრის ხელმძღვანელის ამირან გამყრელიძის განცხადებით, თუ კორონავირუსის ახალი შემთხვევების ნახტომისებური ზრდა დაფიქსირდება, შეზღუდვების გამკაცრების საკითხს დააყენებენ.
მარი ჩიტაია