„მტევინო“ საუკეთესო ახალი ბრენდი, რომელმაც ოპერირება 2020 წელს ბაზარზე შექმნილი კრიზისული სიტუაციის მიუხედავად დაიწყო ტურიზმის ეროვნული ჯილდოს გამარჯვებულია. მიღწეულ წარმატებაზე „კომერსანტთან“ „მტევნოს“ ბიზნესის განვითარების მენეჯერი ტურიზმისა და HoReCa მიმართულებით ნათია ჯიჯიაშვილი საუბრობს. მისი თქმით, რთული წლის მიუხედავად „მტევინო“ ერთ დღე არ გაჩერებულა. მთელი ამ დროის განმავლობაში სასტუმრო იღებდა სტუმრებს და მათ მაღალი ხარისხის მომსახურებას, მყუდრო და ოჯახურ გარემოს სთავაზობდნენ. შესაბამისად „მტევინოს“ ბიზნესის განვითარების მენეჯერი თვლის, რომ ამ გამარჯვებით კომპანიას შრომა დაუფასდა. მისივე განმარტებით, ჯილდო კომპანიას წარმატებას მოუტანს და ცნობადობის გაზრდაში კიდევ უფრო დაეხმარება.
„Welcome to Georgia- ტურიზმის ეროვნული დაჯილდოება ტურიზმის მიმართულებით ყველაზე მაღალი ჯილდოა, მისი მოპოვება საქართველოში მოქმედი ბიზნესებისთვის ძალიან დიდი მოტივაციაა. ამიტომ ძალიან გვინდოდა ამ კონკურსში მონაწილეობა. გავიარეთ შესაბამისი ეტაპები და საბედნიეროდ ერთ-ერთი გამარჯვებული გავხდით. „მტევნოს“ მომხმარებლებისთვის და სტუმრებისთვის მნიშვნელოვანი იქნება ის ფაქტი, რომ გამარჯვებული კომპანიის პროდუქტით სარგებლობენ, ეს ჩვენთვის როგორც ბიზნესისთვის ძალიან დიდი მოტივაციაა. ტურიზმის ეროვნული დაჯილდოება არის ყოველწლიური კონკურსი და ვეცდებით, რომ მონაწილეობა ყოველ წელს სხვადასხვა ნომინაციაში მივიღოთ. ამ ყველაფერში ჩვენ ძალიან დიდ შრომას ვდებთ და ყველაფერს ვაკეთებთ იმისთვის, რომ ბრენდი მოწინავე პოზიცაზე იყოს“, - აცხადებს ნათია ჯიჯიაშვილი.
რთველი, ქორწილები, კონფერენციები,კორპორატიული შეხვედრები „მტევინო“ მთელი წლის განმავლობაში აქტიურად, რეგულაციების სრული დაცვით აგრძელებდა მუშაობას. როგორც ნათია ჯიჯიაშვილი გვიყვება, სასტურმო 90 პროცენტიანი დატვირთვით მუშაობდა. მისი თქმით, მიუხედავად ბევრი სირთულისა რამდენიმე თვეში „მტევინო“ ბევრმა ადამიანმა გაიცნო და შეიყვარა.
„გასულ წელს ჩვენ გეგმაში რამდენიმე მიმართულების განვითარება გვქონდა. ეს იყო სასტუმროს მიმართულება - კულინარიული მასტერკლასების სივრცის ამუშავება და კონფერენციების მასპინძლობა. შემოდგომაზე ამ მიმართულებამ არაჩვეულებრივად იმუშავა, საკმაოდ დიდ ჯგუფებს ვუმასპინძლეთ. ესენი იყვნენ სკოლის მოსწავლეები, კოლეგები, უბრალოდ მეგობრები, ოჯახები. ოქტომბერში, როდესაც რთველი დავიწყეთ, სტუმრები ჩვენ ვენახებში ყურძენს კრეფდნენ, შემდეგ კულინარიულ სივრცეში მიდიოდნენ და კერძებს თვითონ ამზადებდნენ. სასტუმრო დატვირთული იყო სტუმრებით, ვუმასპინძლეთ კონფერენციებს და ასევე გვქონდა არაჩვეულებრივი ქორწილიც. ვფიქრობ, რომ ერთგული მომხმარებლები ძალიან მალე მოვიპოვეთ, ამას კი ჩვენი სტუმრების შეფასებები ადასტურებს. როდესაც 8 თვეში სტუმარი სასტუმროში მესამედ და მეოთხედ ბრუნდება ვფიქრობ, რომ ძალიან კარგი შედეგია“, - განაცხადა ნათია ჯიჯიაშვილმა.