უახლოეს ხანებში სახმელეთო ტრანსპორტის სააგენტო სატრანსპორტო საშუალებით სახიფათო ტვირთის გადაზიდვაში ან/და საერთაშორისო გადაყვანა-გადაზიდვაში ჩართულ პირთათვის თანამედროვე ტექნოლოგიებით აღჭურვილ საგამოცდო ცენტრის მშენებლობას გეგმავს. აღნიშნული ასახულია დოკუმენტში „ქვეყნის ძირითადი მონაცემების და მიმართულებები 2023-2026 წლებისათვის“.
როგორც „კომერსანტს“ სახმელეთო ტრანსპორტის სააგენტოში განუცხადეს, საქართველოსა და ევროკავშირს შორის ასოცირების ხელშეკრულებაზე ხელმოწერამ და ქვეყნის მიერთებამ სატრანსპორტო დარგში არსებულ პრიორიტეტულ კონვენციებთან და შეთანხმებებთან, შექმნა იმის ხელსაყრელი პირობები, რომ საქართველოს გამოეყენებინა თავისი სატრანსპორტო პოტენციალი.
„ამ შეთანხმებების, კონვენციების და ევრორეგულაციების შინაარსმა, რომლის დანიშნულებაა უსაფრთხოების ამაღლება, შედეგად მოიტანა სატრანსპორტო პარკის სტრუქტურული გაუმჯობესება და რაც მთავარია დარგში დასაქმებული კადრების მომზადება და კვალიფიკაციის ამაღლება. სააგენტოში უკვე რამდენიმე წელია მიმდინარეობს აქტიური მუშაობა ამ მიმართულებით. სააგენტოში არსებულ საკვალიფიკაციო ცენტრში ხდება მძღოლების, ავტოსატრანსპორტო კომპანიის პასუხისმგებელი პირების მომზადება/გადამზადება. შედეგად უკვე მომზადებულია 9300 - ზე მეტი მძღოლი და 300 - ზე მეტი ტრანსპორტის მენეჯერი, რომელთაგან ნაწილი საქმიანობს ქვეყნის შიგნით, ნაწილი წარმატებულად მუშაობს საზღვარგარეთ. ისინი არიან სრულიად კონკურენტუნარიანნი საერთაშორისო სატრანსპორტო ბაზარზე.
აღსანიშნავია, რომ „საავტომობილო ტრანსპორტის შესახებ“ საქართველოს კანონში ცვლილების შეტანის თაობაზე“ საქართველოს კანონის თანახმად (მიღების თარიღი: 07/06/2022, სარეგისტრაციო კოდი: 310060000.05.001.020578) კერძო სექტორს ეძლევა უფლება განახორციელოს სატრანსპორტო საშუალებით სახიფათო ტვირთის გადაზიდვაში ან/და საერთაშორისო გადაყვანა-გადაზიდვაში ჩართულ პირთათვის საწყისი კვალიფიკაციის მინიჭებისთვის საჭირო სწავლება და პერიოდული გადამზადება თუ მათ აღნიშნულისათვის მიღებული აქვთ სსიპ - სახმელეთო ტრანსპორტის სააგენტოსგან შესაბამისი სტატუსი.
ასევე, სააგენტო უახლოეს მომავალში გეგმავს სატრანსპორტო საშუალებით სახიფათო ტვირთის გადაზიდვაში ან/და საერთაშორისო გადაყვანა-გადაზიდვაში ჩართულ პირთათვის საწყისი კვალიფიკაციის მინიჭებისთვის და პერიოდული გადამზადებისთვის საჭირო, თანამედროვე ტექნოლოგიებით აღჭურვილ საგამოცდო ცენტრის მშენებლობას“, - აღნიშნავენ სააგენტოში.
სახიფათო ტვირთი არის ნივთიერებები ან/და ნაკეთობები, რომლებიც საერთაშორისო ნორმებით, საშიშროების ტიპის მიხედვით 9 კლასადაა კლასიფიცირებული და რომელთა საერთაშორისო საავტომობილო გადაზიდვა „სახიფათო ტვირთების საერთაშორისო საგზაო გადაზიდვების შესახებ “ ევროპული შეთანხმების (ADR) შესაბამისად აკრძალულია ან დასაშვებია მხოლოდ გარკვეული პირობების დაცვით.
სახიფათო ტვირთების საერთაშორისო საგზაო გადაზიდვა რეგულირდება ტექნიკური რეგლამენტით- „სატრანსპორტო საშუალებით სახიფათო ტვირთების გადაზიდვის წესის“ შესაბამისად.
აღნიშნული რეგლამენტი შემუშავებულია „სახიფათო ტვირთების საერთაშორისო საგზაო გადაზიდვების შესახებ“ ევროპული შეთანხმების (ჟენევა 1957 წლის 30 სექტემბერი), „საგზაო მოძრაობის შესახებ“ საქართველოს კანონის და სხვა სამართლებლივი აქტების შესაბამისად და სრულ შესაბამისობაშია სახიფათო ტვირთების გადაზიდვასთან დაკავშირებულ გაეროს წესებთან და ADR-ის დებულებების მოთხოვნებთან.