საერთაშორისო საკონსალტინგო კომპანია Deloitte მიიჩნევს, რომ 2022 წელს მედიაბაზარზე აქტიურად გავრცელდება ახალი ტექნოლოგიები, რომლებიც სატელევიზიო რეკლამას უფრო მიზნობრივს გახდიან.
ასევე მკვლევარები პერსპექტიულად მიიჩნევენ ფსიქიკური ჯანმრთელობის მონიტორინგის აპლიკაციების ბაზარს, რომელიც წელიწადში 20-30%-ით გაიზრდება.
კომპანიამ გამოაქვეყნა კვლევა „მაღალი ტექნოლოგიების, ტელეკომუნიკაციების, გართობის და მას-მედიას დარგების განვითარების პერსპექტივები“, რომელშიც 2022 წლის მთავარ ტექნოლოგიურ მიღწევად მიიჩნევს მიზნობრივ ტელერეკლამას, რომელიც კონკრეტულად სეგმენტირებულ აუდიტორიაზე იქნება გათვლილი.
ციფრული ტექნოლოგია განათავსებს კონკრეტულ რეკლამას იმის მიხედვით, რომელ ოჯახში უყურებენ ამა თუ იმ გადაცემას და ამ ბაზრის ღირებულება გლობალურ მასშტაბში 7,5 მლრდ დოლარს მიაღწევს, რაც 40-ჯერ მეტია, ვიდრე 2012 წელს, როდესაც კომპანიამ მისი შეფასება დაიწყო.
კიდევ ერთ პერსპექტიულ მიმართულებად მკვლევარები ფსიქიკური ჯანმრთელობის მონიტორინგის, სტრესის კონტროლის და მედიტაციების მობილური აპლიკაციების ბაზარს მიიჩნევენ. 2019 წელს ამ აპლიკაციების ბაზარი 200 მლნ დოლარად, ხოლო 2020-ში - უკვე 270 მლნ დოლარად შეფასდა. Deloitte-ის პროგნოზის მიხედვით, 2022 წელს მისი მოცულობა 500 მლნ დოლარს მიაღწევს. კომპანიის დასკვნით, არსებული დინამიკის მიხედვით, უახლოეს წლებში დარგი წელიწადში 20-30%-ით გაიზრდება.
Deloitte ასევე აღნიშნავს, რომ უახლოესი წლების მაღალი ტექნოლოგიების დარგის მთავარი გამოწვევა ჩიპების დეფიციტი იქნება, რომელიც 2020 წელს დაიწყო და, სავარაუდოდ, არც 2022 წელს დასრულდება. თუმცა, შიმშილი მიკროსქემების ბაზარზე ისეთი ძლიერი არ იქნება, როგორიც 2021 წელს უყო, თანაც ჩიპების მხოლოდ ზოგიერთ სეგმენტს შეეხება.
2022 წელს ვენჩურული ინვესტორები ნახევარგამტარი მიკროსქემების სტარტაპებში 6 მლრდ დოლარზე მეტს ჩადებენ, თუმცა, ეს მოსალოდნელი მთლიანი ვენჩურული ინვესტიციების 2%-ს შეადგენს - მთლიანობაში 2022 წელს მაღალტექნოლოგიურ დარგებში 300 მლრდ დოლარის ჩადებაა მოსალოდნელი.
„კრიზისული ვითარება, რომელიც შეიქმნა კორონავირუსის გავრცელების გამო, კავშირგაბმულობის ციფრული ტექნოლოგიების უფრო აქტიურ დანერგვას და გამოყენებას ხელს უწყობს“, - განაცხადა Deloitte-ის მაღალი ტექნოლოგიების და ტელეკომუნიკაციების დეპარტამენტის უფროსმა არიან ბიუკაიმ.
მისი თქმით, მოთხოვნა ჩიპებზე ახალი ციფრული პროდუქტების გაჩენის, ინტერნეტის სულ უფრო ფართო გავრცელების და უპილოტო ავტომობილების დანერგვის წყალობით მნიშვნელოვნად გაიზრდება.
Deloitte-ის ექსპერტები ასევე ყურადღებას ორ სწრაფად განვითარებად ტექნოლოგიაზე - 5G და Wi-Fi 6-ზე ამახვილებენ და მათი აზრით 2022 წელს Wi-Fi 6 დიდი პოპულარობით ისარგებლებს.
ბოლო 2 წლის მანძილზე ბევრი ქვეყანა 5G სტანდარტს აქტიურად ნერგავს, თუმცა, ყველასთვის შეუმჩნევლად ბაზარზე გაყიდვების მიხედვით წინ Wi-Fi 6 ტექნოლოგია გავიდა. 2022 წელს მეტი Wi-Fi 6-ის მოწყობილობა გაიყიდება, ვიდრე 5G-ს პროდუქტები.
Deloitte-ის დასკვნით, Wi-Fi 6 მომავალში უსადენო კავშირგაბმულობის სამყაროში არანაკლებ როლს შეასრულებს, ვიდრე 5G სტანდარტი, თანაც როგორც კერძო პირებისთვის, ასევე ბიზნესისთვის.
Deloitte