სათამაშო ბიზნესის ასოციაციის ადმინისტრაციის ხელმძღვანელმა გიორგი მამულაიშვილმა ჟურნალისტებს მოსალოდნელ რეგულაციებთან დაკავშირებით ბიზნესის პოზიცია გააცნო და აღნიშნა, რომ ის ტონი და ფორმა, რომელსაც მთავრობა ბიზნესთან კომუნიკაციის დროს იყენებს, მიუღებელია. მან ასევე აღნიშნა, რომ ბიზნესთან კონსულტაციები არ გამართულა და მთავრობა მათთან მედიის საშუალებით კონტაქტობს.
„ჩვენი არაერთი მცდელობის მიუხედავად, რომ მათთან გავსულიყავით კონტაქტზე მთავრობის მხრიდან არანაირი ინიციატივა არ ყოფილა, ეს აზიანებს არა მხოლოდ ქვეყნის იმიჯს და იმ კომპანიებს, რომლებიც ქართულ ბაზარზე ოპერირებენ, არამედ ეს დამაზიანებელია იმ საერთაშორისო კომპანიებისთვისაც, რომლებიც საფონდო ბირჟებზე არიან წარმოდგენილები“, - აღნიშნა გიორგი მამულაიშვილმა.
მამულაიშვილს მიაჩნია, რომ სათამაშო ბიზნესი ძალიან კარგად არის დარეგულირებული, რასაც მოწმობს არაერთი საერთაშორისო კომპანიის საქართველოს მოდელით დაინტერესება. მისივე თქმით, ბევრი საერთაშორისო კომპანიის სურვილია, რომ ქართული მაგალითები გადაიღოს.
მამულაიშვილს მიაჩნია, რომ იმ შემთხვევაში, თუ მთავრობის მიერ წარდგენილი რეგულაციები ძალაში შევა, მოქალაქეების დიდი ნაწილი უცხოურ ბაზარზე გადაინაცვლებს და თამაშს გააგრძელებს, რაც არალიცენზირებული სისტემის და VPN-ის საშუალებით იქნება შესაძლებელი.
„იმ არალიცენზირებული საიტების მეშვეობით, რომლებიც საქართველოში რეგისტრირებულები არ არიან, ქვეყნიდან საკმაოდ დიდი რაოდენობის თანხების გადინება მოხდება ეს დღესაც ხდება და ეს თანხა ჯამში 120 მლნ ლარს შეადგენს. მიუხედავად იმისა, რომ გვპირდებიან თითქოს დაიბლოკება უცხოეთში თამაშებთან დაკავშირებული კომპანიებისთვის თანხის გადარიცხვა, თანამედროვე ტექნოლოგიების საშუალებით ამის კონტროლი შეუძლებელია. ასეთი მაგალითები მსოფლიოში არ არსებობს. თუნდაც აშშ-ის ან ჩინეთის მაგალით რომ ავიღოთ , ამ ქვეყნებმა თავისი რესურსებით ამის გაკეთება ვერ მოახერხეს და ეჭვი მეპარება, რომ ეს საქართველოს მთავრობამ მოახერხოს“, - აღნიშნა გიორგი მამულიაშვილმა.
სათამაშო ბიზნესისთვის მოსალოდნელი რეგულაციები პრემიერ-მინისტრმა ირაკლი ღარიბაშვილმა დააანონსა, რომლის თანახმად ონლაინ-კაზინოებს გადასახადები გაეზრდებათ, ასევე გაიზრდება ასაკობრივი ზღვარი და აიკრძალება სატელევიზიო რეკლამა, გარდა სპონსორობისა. ფინანსთა სამინისტროს მიერ მომზადებული კანონპროექტის სამუშაო ვერსიის თანახმად, თამაში დაახლოებით, მილიონ ადამიანს აეკრძალება, მათ შორის საჯარო მოხელეებს, ასევე სოციალურად დაუცველებს.
თაკო კვაჭანტირაძე