ხევსურეთში, დუშეთის რაიონის სოფელ ხახაბოში მდებარე საოჯახო სასტუმრო „ხახაბო“ პანდემიის მიუხედავად, ტურისტებისთვის საინტერესო, მიმზიდველი და აქტუალურია.
როგორც „ბიზნესპარტნიორს“ სასტუმროს მენეჯერმა ნინო ბარნაბიშვილმა განუცხადა, 2 თვის წინ, დუშეთის რაიონში დაწყებული საოჯახო ბიზნესი დღეს იმდენად პერსპექტიულია, რომ სასტუმროს მფლობელი უკვე გაფართოებაზე ფიქრობს.
მისივე ინფორმაციით, წელს 4 ნომრიან სასტუმროში დამსვენებლების 50% ადგილობრივები, 50% კი უცხოელები არიან. მათ შორის სტუმრები პოლონეთიდან, ლიეტუვიდან, გერმანიიდან, ჩეხეთიდან.
„საქართველოში ორი ხახაბოა, ერთი თუშეთში, მეორე – ხევსურეთში. ჩვენ ხევსურეთში ვართ. სოფელში მხოლოდ ჩვენ ვცხოვრობთ, რამდენიმე კილომეტრის მოშორებითაა, სხვა სოფელში მარო ბებო, რომელიც არ ტოვებს წინაპრის სამოსახლოს,“ - აცხადებს ბარნაბიშვილი.
რამდენად აქვს ხევსურთს ტურისტული პოტენციალი და რას ვთავაზობთ ჩამოსულ ტურისტს, სასტუმრო „ხახაბოს“ მენეჯერი განმარტავს, რომ შატილამდე (რომელიც ხევსურეთის ცენტრია) მიმავალი გზა საკმაოდ კარგ მდგომარეობაშია. თუმცა, დათვიჯვრიდან სოფელ ხახაბომდე მისასვლელი გზა პრაქტიკულად არ არსებობს.
„ხახაბოს ისტორიაში სამანქანე გზა პირველად, ერთი წლის წინ გაიჭრა, თუმცა, აქამდე არ გაწმენდილა. ზამთარში ქანები ჩამოდის. არის მხოლოდ საცალფეხო და საცხენოსნო ბილიკი.
ტურისტებს კი ერთი კონკრეტული ადგილიდან (მათი სურვლის შემთხვევაში) უკვე ცხენებით ვხვდებით და ამოგვყვავს. გზა გაკეთებადია, უბრალოდ უფრო მეტი ყურადღების მიქცევაა საჭირო მუნიციპალიტეტის მხრიდან.
მართალია ერთი ოჯახია და სხვაგან შეიძლება უფრო მეტი პრობლემა იყოს, მაგრამ ვფიქრობ, ქვეყნისთვის ეს პოტენციალი და წამოწყება იმდენად საინტერესოა, რომ ვიმსახურებთ ამ ყურადღებას,“ - აცხადებს ბარნაბიშვილი.
კითხვაზე, როგორ ახერხებს სოფელში, სადაც არ არის მისასვლელი სამანქანე გზა, ოჯახი ცხოვრებას და ბიზნესის წარმოებას, ბარნაბიშვილი აღნიშნავს, რომ პროდუქტების მომარაგებას ისინი წინასწარ ახდენენ.
დუშეთის მუნიციპალიტეტის მერი ზურაბ სეხნიაშვილი „ბიზნესპარტნიორთან“ მთის სოფლებში არსებულ მდგომარეობას, უფრო კონკრეტულად კი, სოფელ ხახაბოს ინფრასტრუქტურულ მოწესრიგებასა და სამომავლო პერსპექტივებს ეხმიანება.
სეხნიაშვილის განცხადებით, ხახაბოში საგზაო ინფრასტრუქტურის მოწესრიგება დუშეთის მუნიციპალიტეტის პრიორიტეტია, შესაბამისად, სამშენებლო სამუშაოები მომავალი წლისთვის არის დაგეგმილი.
„ფშავ-ხევსურეთისკენ რთული და ცუდი გზებია, რთული რელიეფის გამო, აქ 290 სოფელია და აქედან 70% მთაა. იქ გზების მიყვანა ძალიან რთულია. მიხედავად ამისა, ჩვენი მთავრობის დროს ისტორიული საქმე გაკეთდა - გაიჭრა გზა. ამ ეტაპზე ვერ შევძლებთ გზების მოხრეშვას და ასე შემდეგ. რთული რელიეფია, თუმცა, მომავალი წლისთვის დაიგეგმება. აქვე აღსანიშნავია, რომ ეს სამუშაოები საკმაოდ დიდ ფინანსურ რესურსს მოითხოვს,“ - აცხადებს სეხნიაშვილი.
დუშეთის მუნიციპალიტეტის მერი აცხადებს, რომ ადგილობრივი ხელისუფლების ხელშეწყობით ხახაბოში, აღნიშნულ ოჯახს და სხვადასხვა სოფელში, ჯამში 60 კომლს მზის ბატარიები დაუმონტაჟდა. ადგილზე ელექტროენერგიის მიყვანა კი დიდი ალბათობით ვერ მოხდება. აღნიშნულ სოფლებში მოხდა ინტერნეტიზაციაც.
„ეს ენერგო-პრო ჯორჯიას საქმეა, თუმცა რელიეფიდან გამომდინარე, ელექტროგადამცემი ხაზების მონტაჟი ვერ მოხდება,“ - აცხადებს სეხნიაშვილი.
შეგახსენებთ, ხახაბო ხევსურეთში ერთ-ერთი ყველაზე მაღალი სოფელია, 2135 მეტრ სიმაღლეზე, დათვიჯვრიდან მარჯვნივ, წუბროვანისა და ჭანჭახის უღელტეხილის მხარეს, 12 კილომეტრში მდებარეობს. გასული საუკუნის შუახანებში აქ 60-მდე კომლი ცხოვრობდა, 80-90-იანი წლებისთვის კი 5-6 ოჯახი იყო შემორჩენილი.
დღეს აქაურობა დაცლილია, შუა საუკუნეების კოშკები და ციხე-სახლები – დანგრეული.ცხოვრობს მხოლოდ ერთი ოჯახი, რომელიც თავს საკუთარი მეურნეობით და საოჯახო სასტუმრო „ხახაბოთი“ ირჩენს.
„მართალია ერთი ოჯახია და სხვაგან შეიძლება უფრო მეტი პრობლემა იყოს, მაგრამ ვფიქრობ, ქვეყნისთვის ეს პოტენციალი და წამოწყება იმდენად საინტერესოა, რომ ვიმსახურებთ ამ ყურადღებას,“ - აცხადებს ბარნაბიშვილი.
კითხვაზე, როგორ ახერხებს სოფელში, სადაც არ არის მისასვლელი სამანქანე გზა, ოჯახი ცხოვრებას და ბიზნესის წარმოებას, ბარნაბიშვილი აღნიშნავს, რომ პროდუქტების მომარაგებას ისინი წინასწარ ახდენენ.
შეგახსენებთ, ხახაბო ხევსურეთში ერთ-ერთი ყველაზე მაღალი სოფელია, 2135 მეტრ სიმაღლეზე, დათვიჯვრიდან მარჯვნივ, წუბროვანისა და ჭანჭახის უღელტეხილის მხარეს, 12 კილომეტრში მდებარეობს. გასული საუკუნის შუახანებში აქ 60-მდე კომლი ცხოვრობდა, 80-90-იანი წლებისთვის კი 5-6 ოჯახი იყო შემორჩენილი.
დღეს აქაურობა დაცლილია, შუა საუკუნეების კოშკები და ციხე-სახლები – დანგრეული.
Business-partner.ge
სასტუმრო ხახაბო 
