„რაჭისთვის ეს სეზონი ძალიან აქტიური იქნება, რადგან მწვანე ზონა ვართ. ამჟამად ივლისში სასტუმრო 90 პროცენტით დაჯავშნილია,“- ამის შესახებ „კომერსანტს“ რაჭაში მდებარე სასტუმრო „შაორის“ გენერალურმა მენეჯერმა ირაკლი ჯმუხაძემ განუცხადა.
ამბროლაურის მუნიციპალიტეტში შაორის ტბის სანაპიროზე სასტუმრო „შაორი“ სტუმრებს რამდენიმე დღეა აქტიურად იღებს. ჯანდაცვის სამინისტროს მითითებების შესაბამისად, სასტუმროს აღჭურვა მოხდა პირბადეებით, ხელთათმანებით, დეზობარიერებით. როგორც სასტუმროში განმარტავენ რაჭა მწვანე ზონის სტატუსს ამართლებს და ივლისის თვეში შაორის მახლობლად მდებარე პირველი სასტუმრო თითქმის სრულად დაჯავშნილია.
„რასაც ველოდებოდით იმ აქტიურობის 70 პროცენტი გამართლდა, ანუ ჯავშნები გვაქვს რა თქმა უნდა, ძირითადად ქართველებისგან.ჯერჯერობით უცხოელების ჯავშნები საერთოდ არ არის ჩვენს სასტუმროში. გვგონია, რომ აქტიური სეზონი უნდა იყოს ზოგადად რაჭის მიმართულებით იმიტომ, რომ ჯერ კიდევ გახსნამდე იყო ძალიან დიდი მოთხოვნა.
სასტუმრო ყველა რეგულაციას იცავს, სტუმრებს თერმოსკრინინგი უტარდებათ, მიმღებში პირბადის გარეშე შესვლა აკრძალულია. ამასთან, გვაქვს სიახლეები, დავამატეთ ღია აუზი და ინფრასტრუქტურა ეზოში,“- აცხადებენ სასტუმროში.
“სასტუმრო მეორე წელია ფუნქციონირებს, სახელმწიფოს მიერ გამოცხადებული „აწარმოე საქართველოს“ პროგრამის თანადაფინანსებით აშენდა, დასაქმებულია 30 ადამიანი, რომელთა უმეტესობა ადგილობრივია, სასტუმროში 70 ამდე სტუმრის მიღებაა შესაძლებელი.
მარიამ მორგოშია