შეკვეთილის სასტუმრო „პარაგრაფში“ სარემონტო სამუშაოები დასრულდა და 15 ივლისიდან სტუმრებს აქტიურად იღებს. მიუხედავად იმისა, რომ ფასებში მნიშვნელოვანი ცვლილება სასტუმროს არ განუხორციელებია და კვლავაც ძვირადღირებულ კატეგორიას განეკუთვნება, აგვისტოსა და სექტემბერში მოთხოვნა ადგილობრივებისგან მაღალია. ამის შესახებ „კომერსანტს“ სასტუმროს მენეჯერმა თამუნა ჯიჯიხიამ განუცხადა.
„აგვისტოს თვეში სტუმრების რაოდენობასა და მოთხოვნას ვერ ავუდივართ. უცხოელი სტუმრების ჯავშნები გასაგები მიზეზების გამო, გაუქმდა. შესაბამისად, ჩვენი მომხმარებლების 100%-ი საქართველოს მოქალაქეა, რაც ძალიან გვახარებს, ხოლო სექტემბერშიც მოთხოვნა სავარაუდოდ გაიზრდება -განმარტავს თამუნა ჯიჯიხია.
როგორც პარაგრაფში განმარტავენ სასტუმროს ფასი პანდემიის შემდეგ, არ შეცვლილა. შეგახსენებთ, რომ „პარაგრაფ რეზორტი და სპა შეკვეთილში“-ს ნომრების ფასი 654 ლარიდან იწყება და 3000 ლარსაც აღწევს.
სასტუმრო „პარაგრაფი“ შეკვეთილში 2017 წელს გაიხსნა. „Marriott International“-მა 2018 წლის საუკეთესო „ფრენჩაიზის“ სასტუმროების ნომინაციაზე შეკვეთილში მდებარე სასტუმრო „პარაგრაფი“ ევროპის 300 სასტუმროს შორის პირველ ადგილზე დაასახელა.
ანი ცარციძე