„საპარტნიორო ფონდი“ სასტუმრო „ბორჯომი – ლიკანში“ ინვესტორის შემოყვანას პოსტკრიზისულ პერიოდში გეგმავს.ფონდის აღმასრულებელი დირექტორი ამბობს, რომ აქტივი ღია აუქციონზე გაიყიდება, თუმცა ამისთვის შესაფერისი გარემო უნდა იყოს.
ლიკანში მდებარე სასტუმროს გაყიდვა ფონდმა გასულ წელს დეკემბერში სცადა, თუმცა 37,5 მლნ ლარად გამოტანილ სასტუმროს მყიდველი არ გამოუჩნდა. თუმცა, როგორც ჩანს პროცესი ამით არ დასრულებულა. დღეს დავით საგანელიძემ თქვა, რომ „საპარტნიორო ფონდს“ და ერთ-ერთ მსხვილ ბერძნულ კომპანიას შორის მემორანდუმიც კი იყო გაფორმებული.
„ამ ეტაპზე, როცა მსოფლიო ტურიზმი უმძიმეს სიტუაციაშია, რა თქმა უნდა, სასტუმროების ბიზნესის განვითარება საკმაოდ რთულია, თუმცა ვრჩებით იმ აზრზე, რომ ის გავყიდოთ. საპარტნიორო ფონდი არ არის მენეჯმენტ კომპანია, ჩვენი ფუნქცია არ არის სასტუმროების მართვა, ჩვენი როლი იყო ის, რაც გავაკეთეთ, სასტუმრო აშენდა, წარმატებულად. დადგება დრო და ჩვენ ამ სასტუმროში ყველაზე კარგ და მნიშვნელოვან ინვესტორს შემოვიყვანთ“, – განაცხადა დავით საგანელიძემ.
სასტუმრო ბორჯომი-ლიკანი (ყოფილი RIXOS-BORJOMI) ყაზახური ყაზმუნაიგაზისა და სს „საპარტნიორო ფონდს“ პარტნიორობით აშენდა.
2018 წლის ზაფხულში ქართულმა მხარემ ყაზახი პარტნიორებისგან 50% -იანი წილი გამოისყიდა.
„ბიზნესპარტნიორი“