საქართველოს ეროვნულმა ბანკმა ტურიზმის და სასტუმრო სექტორის კვლევა წარმოადგინა, რომელიც დეტალურად მიმოიხილავს ტურიზმის მახასიათებლებს პანდემიამდე და დამატებით, აღწერს COVID-19 შედეგებსა და აღდგენის ტემპებს ამ სექტორში. მათ შორისაა ინფორმაცია სასტუმროების სექტორის პორტფელის, კონცენტრაციის, შემოსავლის წყაროების და მსესხებლის კატეგორიის მიხედვით.
კვლევის თანახმად, ყველაზე მეტი, 1 733 სესხი „თიბისის“ აქვს გაცემული, რომელთა მოცულობაც 1.3 მილიარდ ლარს აჭარბებს. მეორე პოზიციაზეა „საქართველოს ბანკი“ გაცემული 1 230 სესხით, რომლის მოცულობაც 1 მილიარდ ლარზე მეტია. მესამეა „კრედო“ 713 კრედიტით.
სესხების 58% მიკროა (MICRO), 32% - მცირე და საშუალო ბიზნესესხია (SME) და 10% - მსხვილი ( CORP). მოცულობის მიხედვით ყველაზე დიდია CORP-ის - ₾1.9 მლრდ (64%).
ანგარიშის თანახმად, 2.9-მილიარდიანი პორტფელის 87% უცხოურ ვალუტაში არის ნომინირებული. ამასთანავე, უკანასკნელ წლებში მზარდია კრედიტებში ლარის წილი, თუმცა სესხების მთლიან ნაშთზე ჯერჯერობით დიდ გავლენას ვერ ახდენს. სებ-ის შეფასებით, კრედიტების მაღალი დოლარიზაცია ამ სფეროს კრიზისების მიმართ მოწყვლადს ხდის.
კვლევის თანახმად, პანდემიურ 2020-ში პორტფელის ზრდა შენარჩუნდა (+ ₾772 მლნ). კურსის ცვლილების ხარჯზე, 350 მლნ-იანი მატებით (45%). 41% (+ ₾314 მლნ) 10 უმსხვილესი სასტუმროს პორტფელის ზრდაზე მოდის.
როგორც „ეროვნული ბანკის კვლევაშია აღნიშნული სესხის ნაშთის წილი ლარში მზარდია, თუმცა ზრდის ტემპი დაბალია.
ასევე კვლევის ავტორები მიუთითებენ რომ: „სესხის ნაშთის ევროში კონვერტირება გაძლიერდა 2017 წლიდან დოლარის გაცვლითი კურსის ლართან მიმართებაში სწრაფი გამყარების ფონზე; მზარდია სესხის ნარჩენი ვადიანობა, ზრდის ტემპი შედარებით მაღალია ლარის სესხებზე, რაც ბანკების მიერ ლარის გრძელვადიანი რესურსის ხელმისაწვდომობის ზრდით აიხსნება; უცხოური ვალუტის ვადიანობები თითქმის თანაბარია; ასევე გამომდინარე იქედან რომ 2021 წელს მცირე კლება იყო პორტფელში, შეინიშნება ვადიანობის შემცირებაც.
ნაშთებზე ვადიანობის ზრდის ერთ-ერთი წამყვანი ფაქტორია საკონტრაქტო ვადიანობების ზრდა ყველა ვალუტაში; ამასთან ლარის და უცხ. ვალუტის ვადების გეპი სულ უფრო მცირდება; კლებადია საპროცენტო განაკვეთებიც ნაშთებზე, განსაკუთრებით ვალუტაში, 2021-ში რისკების ზრდის გამო შეინიშნება განაკვეთის ზრდა ყველა ვალუტაში, თუმცა განსაკუთრებით ლარში, რაც უმეტესწილად რეფინანსირების განაკვეთის ზრდითაც აიხსნება“.