თბილისის სახელმწიფო სამედიცინო უნივერსიტეტმა ცოტა ხნის წინ საკუთარი კლინიკური ბაზები კიდევ უფრო გაზარდა და „საქართველოს ჯანდაცვის ჯგუფისგან“ ინგოროყვას კლინიკის 40%-იანი წილი 12 მლნ დოლარად შეიძინა.  „პირველი საუნივერსიტეტო კლინიკა, გივი ჟვანიას სახელობის პედიატრიის აკადემიური კლინიკა, აპოლონ ურუშაძის სახელობის სტომატოლოგიური კლინიკა, #1 სტომატოლოგიური კლინიკა, #2 სტომატოლოგიური კლინიკა  - ახლა უკვე  „მაღალი სამედიცინო ტექნოლოგიების ცენტრიც“. 

ეს ის კლინიკაა, რომელსაც „ევექსმა“  ნაკლებ შემოსავლიანი აქტივი უწოდა. მაშინ, რატომ გადაწყვიტა სახელმწიფო სამედიცინო უნივერსიტეტმა 12 მილიონ დოლარად ასეთი აქტივის შეძენა?  

„კომერსანტი“ გარიგების დეტალებით კვლავ დაინტერესდა და ამჯერად თბილისის სახელმწიფო სამედიცინო უნივერსიტეტს რამდენიმე კითხვით მიმართა. პასუხად მივიღეთ, რომ უნივერსიტეტისთვის კლინიკური ბაზის გაზრდა სასიცოცხლოდ მნიშვნელოვანი იყო. მათივე განმარტებით ინგოროყვას კლინიკის ტექნოლოგიებისთვის 12 მილიონი ადეკვატური ფასია და ეკონომიკურად გამართლებული ნაბიჯია.  

„შეუფერხებელი აკადემიური საქმიანობისთვის - სწავლის, სწავლებისა და კვლევისათვის - სასიცოცხლოდ მნიშვნელოვანი იყო თბილისის სახელმწიფო სამედიცინო უნივერსიტეტს ეზრუნა კლინიკური ბაზების გაზრდაზე. შპს „მაღალი სამედიცინო ტექნოლოგიების ცენტრი, საუნივერსიტეტო კლინიკაში“ შესაძლებელი გახდება სამედიცინო უნივერსიტეტის სასწავლო კლინიკური დეპარტამენტების განთავსება, სადაც შესაბამისი ინფრასტრუქტურული გარემოა აღნიშნული დეპარტამენტების მიერ კლინიკური, აკადემიური და კვლევითი აქტივობების შეუფერხებელი განხორციელებისათვის. როგორც მოგეხსენებათ აღნიშნული კლინიკა არის თანამედროვე მაღალტექნოლოგიური სამედიცინო დაწესებულება, სადაც ხელმისაწვდომია თითქმის ყველა სახის სამედიცინო სერვისი.

აღნიშნულ კლინიკაში წილის შეძენა გამართლებულია როგორც  სასწავლო, სამეცნიერო და სამედიცინო საქმიანობის, ისე ეკონომიკური თვალსაზრისითაც. მივიჩნევთ, რომ გარიგებით განსაზღვრული თანხა უკვე მოქმედი, მაღალი სტანდარტების მქონე კლინიკის ადეკვატური ღირებულებაა, რომელიც გაცილებით ნაკლებია სსიპ - ლევან სამხარაულის სახელობის სასამართლო ექსპერტიზის ეროვნულ ბიუროს დასკვნის შესაბამისად განსაზღვრულ ღირებულებასთან მიმართებაში.“ - განგვიცხადეს უნივერსიტეტში.

საქართველოს ჯანდაცვის ჯგუფმა ინგოროყვას კლინიკის 50 პროცენტი 2015 წელს 17 მილიონ დოლარად შეიძინა, ამასთან 5 წლის მანძილზე დარგის განვითარებაში რამდენიმე მილიონიანი ინვესტიცია განახორციელა. კლინიკის 50 პროცენტიანი წილის ფლობისა და მართვისთვის ევექსმა 20 მილიონი დოლარი დახარჯა, თუმცა თავისი 40 პროცენტი 12 მილიონად გაყიდა. ჯანდაცვის ჯგუფის ზარალი ამ გარიგებაში აშკარად ჩანს ციფრებში. თუმცა როგორც დანარჩენი 50 პროცენტის მფლობელმა გოჩა ინგოროყვამ ცოტა ხნის წინ ჩვენთან აღნიშნა, ევექსს კლინიკის წილების შეძენით არაფერი წაუგია  თუმცა შემოსავალი შემცირდა.

„კომერციულად რომ შევხედოთ, თუ არ აწყობდა ინგოროყვას კლინიკა, მაშინ რატომ იყიდა? თავდაპირველად ევექსთან შეთანხმების მიზანი იყო ის, რომ მინდოდა კლინიკის ფინანსურად გაძლიერება, „ევექსი“ კი ფინანსურად ძლიერი იყო.  თუ ეს საავადმყოფო არ ვარგოდა, რატომ იყიდა, ან რატომ გაყიდა?“ - ამბობდა ქირურგი.

გარიგების შედეგად, ინგოროყვას კლინიკაში GHG-ის წილი 10%-მდე შემცირდა, რომლის გასხვისებასაც ჯგუფი უახლოეს მომავალში აპირებს.

შეგახსენებთ, საქართველოს ჯანდაცვის ჯგუფი ლონდონის საფონდო ბირჟიდან მოიხსნა. ეს გადაწყვეტილება კომპანიამ 8 ივლისს მიიღო, თუმცა ძალაში 2020 წლის 5 აგვისტოს შევიდა. GHG კერძო კომპანია გახდა და მისი აქციები Georgia Capital-მა გამოისყიდა, რომელიც აქამდე „საქართველოს ჯანდაცვის ჯგუფის“ 70.6%-იანი წილის მფლობელი იყო.