ერთი წელის განმავლობაში კერძო სექტორი პანდემიის გამო საშემოსავლო გადასახადის შეღავათს იღებს. საქართველოს მთავრობის გადაწყვეტილებით, 2020 წლის მაისიდან ბიზნესი 1500 ლარამდე ხელფასის 750 ლარის მოცულობის საშემოსავლო გადასახადისგან თავდაპირველად ექვსი თვით გათავისუფლდა, თუმცა პროგრამა დეკემბრიდან კიდევ ექვსი თვით გახანგრძლივდა.
მაისის ბოლოს კი საქართველოს მთავრობამ გადაწყვიტა, რომ არსებული ეკონომიკური პარამეტრების გათვალისწინებით, რომელიც აპრილში ქვეყანაში 44.8%-იანი ეკონომიკურ ზრდას გულისხმობდა, საშეღავათო პერიოდი აღარ გაეგრძელებინა. გარდა ამისა, ფინანსთა სამინისტროს ინფორმაციით, აპრილის განმავლობაში ქვეყანაში გაცემული ხელფასების მოცულობაც გაიზარდა და წინა წლის ანალოგიურ პერიოდთან შედარებით 100,000-ით მეტმა ადამიანმა აიღო შრომის ანაზღაურება. შესაბამისად, გადაწყვიტეს, რომ პროგრამის გაგრძელების საჭიროება აღარ იდგა.
მთავრობისგან განსხვავებული მოსაზრება აქვთ საქმიან წრეებში. ბიზნესმენების უმრავლესობა ამბობს, რომ ეკონომიკური კრიზისი ჯერ კიდევ არის და კერძო სექტორს კვლავ სჭირდება მთავრობის დახმარება.
საქართველოს ბიზნეს ასოციაციაში ამბობენ, რომ საგადასახადო შეღავათების გაგრძელება-არგაგრძელების საკითხი მთავრობასთან განიხილეს და თუ კომპანიებს ვალდებულებების სრულად შესრულების შესაძლებლობა ექნებათ და კარგი ეკონომიკური მაჩვენებლებიც დაფიქსირდება, მაშინ საშემოავლო გადასახადის დატოვების საჭიროება აღარ იქნება. თუმცა, სხვა შემთხვევაში, შეიძლება, ამ პროგრამის აუცილებლობა ისევ დადგეს.
„ტოიოტა ცენტრ თბილისის“ დამფუძნებელი ირაკლი გურჩიანი „კომერსანტთან“ საუბრისას აღნიშნავენ, რომ სანამ ბიზნესი რეალურად არ ამოქმედდება და ეკონომიკაში მნიშვნელოვანი ზრდა არ იქნება, მსგავსი სახის შეღავათების გაგრძელება საჭიროა.
„აუცილებელი იყო მთავრობას ეს შეღავათები გაეგრძელებინა მანამ, სანამ ეს ეკონომიკური კოლაფსი არ დასრულდება. რაც შეეხება მიზეზად იმის მოყვანას, რომ 45%-მდე ეკონომიკის ზრდა გვაქვს და ბიზნესი აღარ საჭიროებს შეღავათებს, ამაზე კომენტარის გაკეთებაც კი სასაცილოა. მეც დავთვლი და დავწერ, რომ ეკონომიკა სასწაულად გაიზარდა, მაგრამ ამის მართლა სჯერა ვინმეს? ბიზნესი არის ეკონომიკის ლაკმუსის ქაღალდი და არა რაღაც რიცხვები“, - ამბობს ირაკლი გურჩიანი.
აღსანიშნავია, რომ 1500 ლარამდე საშემოსავლო გადასახადის შეღავათი მთავრობამ პირველად 2020 წლის მაისში დააწესა და ის 6 თვის განმავლობაში მოქმედებდა. იმავე წლის 26 ნოემბერს კი ქვეყანაში ხელახალი ლოქდაუნის გამოცხადების შემდეგ შეღავათი კიდევ 6 თვით გაახანგრძლივდა.
2020 წლის განმავლობაში საშემოსავლო გადასახადის შეღავათით კერძო სექტორში 315.5 მილიონი ლარი დარჩა, 2021 წლის პირველ კვარტალში კი 128 მილიონი ლარი. ფინანსთა სამინისტროს 2020 წლის მეორე კვარტლის შედეგები ჯერ არ გამოუქვეყნებია, თუმცა მათი ინფორმაციით, 2021 წელს დაახლოებით 220 მლნ დარჩა ეკონომიკაში, რაც იმას ნიშნავს, რომ საშემოსავლო გადასახადის შეღავათით ბიზნესმა ბიუჯეტის ხარჯზე ნახევარ მილიარდზე მეტი დაზოგა.
საშემოსავლო გადასახადის შეღავათები არ ვრცელდებოდა საბიუჯეტო ორგანიზაციებში, ასევე მარეგულირებელ ორგანოებსა და სახელმწიფო საწარმოებში დასაქმებულ პირებზე, ანუ ამ შეღავათით სარგებელს მხოლოდ კერძო სექტორი იღებდა.