ეკონომიკის ექსპერტი ირაკლი ყიფიანი ერთ-ერთი ტელეკომპანიის ეთერში კრიზისული ეკონომიკური მდგომარეობისგან თავის არიდების გზებზე საუბრობს. მისი აზრით, სახელმწიფომ ეკონომიკის სტიმულირებისთვის გარკვეული ნაბიჯები უნდა გადადგას.

„ბიზნესებს შემცირებული მოთხოვნის (გაყიდვების) დასაბალანსებლად და ხელფასების გასაცემად მეტი რესურსი სჭირდება. 1.6 მილიარდი ლარის ეკონომიკაში ჩაშვება შეამცირებს უმუშევრობის გაზრდის რისკებს, მცირე და საშუალო ბიზნესებს ექნებათ მეტი რესურსი სახელფასო ხარჯებისთვის, რაც რამდენიმე თვიან ინტერვალში, გაუადვილებთ შეინარჩუნონ დასაქმებულები კრიზისის განმავლობაში,“- ამბობს ირაკლი ყიფიანი. მისი განცხადებით, მთავრობამ უნდა იზრუნოს ეკონომიკის სტიმულირებაზე.

„ქამრების შემოჭერის პოლიტიკა გაათავისუფლებს 2 მილიარდ ლარს,რომელიც ეყოფა სოციალურად დაუცველების დახმარების ზრდას 150 მილიონი ლარით, ეს თანხა ეყოფა პენსიონერების დახმარებას 200 ლარიანი ვაუჩერებით,რომ უკეთესად შეიძინონ მედიკამენტები და იზრუნონ საკუთარ თავზე. ეს თანხები ჰყოფნის საშემოსავლო გადასახადის გაუქმებით გამოწვეულ საბიუჯეტო დეფიციტს, რაც პირველ რიგში, ასტიმულირებს ბიზნესს,რომ მეტად შეინარჩუნონ ადამიანები სამსახურში. მთავრობამ სწორედ ამაზე უნდა იზრუნოს,"- ამბობს ირაკლი ყიფიანი.

მისი განცხადებით, ეკონომიკის დანაკლისი - 9 მილიარდი ლარი, ის თანხაა,რომელიც  ტურიზმს, სასტუმროებს, რესტორნებს, მაღაზიებს დააკლდა. „საბოლოო ჯამში, 9 მილიარდი ლარის დანაკლისი ქართული ეკონომიკისთვის 150 ათასი სამუშაო ადგილია. უნდა დავემხმაროთ „თანხით’“ მოქალაქეებს და მივცეთ თავისუფლება თავად გადაწყვიტონ იყიდონ მედიკამენტები, ინტერნეტის ვაუჩერი, კომუნალურები თუ სხვა საჭირო საშუალებები. (რისკის ქვეშ მყოფი ყველა სექტორების იდენტიფიცირება და შემდეგ დახმარება საქართველოს რეალობაში არარიალისტურია, 1 მილიონი ადამიანი თვიდასაქმებულია. როგორ დაადგენ დაკარგა თუ არა სამსახური?“- აღნიშნავს ირაკლი ყიფიანი.

მოამზადა ნათია კეკენაძემ