ორგანიზაცია „საქართველოს სასამართლოს გუშაგი“ სასამართლოს მონიტორინგის პროექტს იწყებს. სასამართლო პროცესების მონიტორინგს ის მოქალაქეები განახორციელებენ, რომლებიც სხვადასხვა სფეროს წარმოადგენენ, თუმცა პროფესიით იურისტები არ არიან.
„დამოუკიდებელი სასამართლო სტაბილური დემოკრატიის ქვაკუთხედია. სასამართლოს დამოუკიდებლობა წარმოადგენს ფუნდამენტურ მოთხოვნას, რომელიც შესაძლებლობას აძლევს სასამართლო სისტემას, დაიცვას დემოკრატია და ადამიანის უფლებები. საქართველოში გატარებული საკანონმდებლო ცვლილებების მიუხედავად, სასამართლო ხელისუფლების დამოუკიდებლობის, ეფექტიანობისა და ანგარიშვალდებულების ხარისხი კვლავ გამოწვევას წარმოადგენს. აშკარაა, რომ სასამართლო სისტემა და საზოგადოება ერთმანეთისგან გაუცხოებულია. ამის ერთ-ერთი მიზეზი ისაა, რომ წლების განმავლობაში მიმდინარეობდა სასამართლო რეფორმები, თუმცა ფართო საზოგადოება აღნიშნულ პროცესებში ჩართული არ ყოფილა, ამიტომაც მოქალაქეების ხმა სათანადოდ არ ისმოდა. მიგვაჩნია, რომ დადგა დრო შეივსოს ის ნაპრალი, რომელიც სასამართლოსა და მოქალაქეებს შორის არსებობს.
„მოქალაქეთა მიერ სასამართლოს მონიტორინგის წამოწყება“ არის „სასამართლოს გუშაგის“ ახალი პროექტი, რომლის ამოცანაა შეიქმნას სასამართლოს გაუმჯობესების პროცესში მოქალაქეთა მონაწილეობის ინსტრუმენტი. აქედან გამომდინარე, „სასამართლოს გუშაგი“ აცხადებს მოხალისეთა მიღებას სასამართლოს მონიტორინგის პროექტში მონაწილეობის მისაღებად. სასამართლო პროცესების მონიტორინგი განხორციელდება იმ მოქალაქეების მიერ, რომლებიც წარმოადგენენ სხვადასხვა სფეროს, თუმცა პროფესიით არ არიან იურისტები. ხოლო სასამართლო პროცესების მონიტორინგის დაწყებამდე მათთვის ჩატარდება ლექციები შესაბამის სამართლებრივ საკითხებზე. ორგანიზაცია ამ ეტაპზე პროექტს განახორციელებს ქალაქ გორში. პროექტი USAID/PROLoG-ის მხარდაჭერით ხორციელდება“, - აცხადებენ ორგანიზაცია "„საქართველოს სასამართლოს გუშაგში".
ცნობისთვის, „სასამართლოს გუშაგი" 2021 წლის ივლისში დაფუძნდა, რომლის მიზანია საქართველოს დემოკრატიული განვითარების ხელშეწყობა სასამართლოს დამოუკიდებლობის, ანგარიშვალდებულების და ეფექტიანობის გაუმჯობესების მეშვეობით. ორგანიზაციის დაფუძნების ინიციატორია ნაზი ჯანეზაშვილი, საქართველოს იუსტიციის უმაღლესი საბჭოს ყოფილი არამოსამართლე წევრი (2017-2021).