წლიური ინფლაციის განაკვეთმა ოქტომბერში 12.8%-ს მიაღწია. ინფლაციაზე ყველაზე დიდი გავლენა სურსათის 18.4%-ით გაძვირებამ იქონია. როგორ აისახება მომატებული ფასები სარესტორნო ბიზნესზე და დახვდება თუ არა რესტორანში მისულ მომხმარებელს გაძვირებული მენიუ. საკითხზე მედია ჰოლდინგთან „მეგრული სახლის“ დამფუძნებელი ეკა ჯალაღონია საუბრობს. ბიზნესმენი გვიყვება, რომ სტუმართ-მასპინძლობის სექტორი უმძიმეს მდგომარეობაში. სამომხმარებლო ფასების საგრძნობლად გაზრდის მიუხედავად ამბობს, რომ მენიუ არ გაუძვირებია, თუმცა როდემდე შეძლებს არსებული ფასების შენარჩუნებას არ იცის:
„პროდუქტი გაძვირდა, მაგრამ ფასის გაზრდას აზრი არ აქვს, რადგან მუშაობა ისედაც არ გვაქვს. შემიძლია გითხრათ, რომ სარესტორნო ბიზნესი სულს ღაფავს. როდესაც სურსათის ფასი იზრდება, ბუნებრივი თვითღირებულებაც იზრდება, რაც საბოლო ფასზე მოქმედებს და მოგება აღარ გვრჩება. ის მინიმალური მოგება, რომელიც გვაქვს, საკმარისი არ არის იმისთვის, რომ ყველა საკითხი მოაგვარო. მინიმალური მოგება მინიმალურად გიგვარებს ხელფასებს და იჯარას, მეტს ვერაფერს. თუ საბანკო ვალდებულება გაქვს ვეღარ ერევი ყველაფერს. ერთ ადგილზე ვტრიალებთ და არ ვიცი რა არის გამოსავალი. რამდენიმე წლის წინ ხორცის პროდუქტებზე პირველი ფასის მატების დროს ამბობდნენ, რომ ფასი დაიკლებდა. შემცირების ნაცვლად კიდევ უფრო გაიზარდა. რაღაც რომ გაიაფდეს ქვეყანაში ეკონომიკა უნდა იყოს. ეკონომიკის მინისტრი ამბობ რომ ეკონომიკური ზრდის ყველაზე მაღალი მაჩვენებელი გვექნება, მაგრამ ბიზნესსექტორი ამას ვერ გრძნობს“, - განაცხადა ეკა ჯალაღონიამ.
ბიზნესმენი გვიყვება, რომ რესტორანი 50 პროცენტიანი დატვირთვით მუშაობს. ამბობს იმასაც, რომ სტუმარი ისე აღარ ხარჯავს, როგორ ადრე ხარჯავდა. ეკა ჯალაღონიას განცხადებით, დღეს საშუალო ჩეკის ოდენობა მინიმალურია. მდგომარეობის სასიკეთოდ შეცვლის მოლოდინი კი არ აქვს.
„ყველა ბიზნეს არ აქვს მნიშვნელობა დიდი, საშუალოა თუ მცირე, ყველას აქვს საბანკო ვალდებულები. გამოდის, რომ პანდემია მხოლოდ სარესტორნო სექტორისთვისაა, არავის არაფერი აინტერესებს. ყველაზე მეტად დავზარალდით იმიტომ, რომ ბანკში მისვლას აზრი არ აქვს, რადგან სესხს არ გვაძლევენ იმისთვის, რომ ამოძრავდე. სესხი რომელიც გაქვს გადახდა თუ დაგაგვიანდა ეგრევე პრობლემურში გადადიხარ და მორჩენილია შენი ამბავია. ელექტროენერგია ბიზნეს ოპერატორებისთვის ძალიან გაძვირებულია, რეალურად ცხოვრება წინ არ მიდის ყველაფერი კი ძვირდება“, აცხადებს ეკა ჯალაღონია.
შეგახსენებთ, რომ საერთაშორისო სავალუტო ფონდის პროგნოზით, მიმდინარე წლის ბოლოს საქართველოში 13,05%-იანი ინფლაცია იქნება, რის შედეგადაც მსოფლიოს ქვეყნების რეიტინგში მე-16 ადგილს დავიკავებთ.
ბაჩო ადამია