სარესტორნო ბიზნესი კოვიდრეგულაციების მარწუხებისგან გათავისუფლებას ითხოვს. შეზღუდული საქმიანობიდან გამომდინარე, აღნიშნული ბიზნესი, შეიძლება ითქვას, რომ ჩრდილოვანი ეკონომიკის ნაწილი ხდება. სოციალურ ქსელებსა თუ საინფორმაციო საშუალებებში ვხვდებით ერთი მხრივ ხალხმრავალი სუფრების ფოტოებს, ხოლო მეორე მხრივ რეგულაციების დარღვევის ფაქტებს.
მთავრობა სექტორისთვის შეზღუდვების შემსუბუქებას არ ჩქარობს. მეტიც, დაავადებათა კონტროლის ეროვნული ცენტრის ხელმძღვანელის მოადგილის, პაატა იმნაძის განცხადებით, კორონავირუსთან ბრძოლის გზაზე პირველი მტერი არის სუფრა.
„შეზღუდვები თუ არ გვინდა, უნდა დავიცვათ ელემენტარული რეგულაციები. ყველა ეპიდაფეთქება, რაც დღეს გვაქვს ქვეყანაში, ეგრეთ წოდებული კლასტერები, გარდა ოჯახურისა, არის ქეიფის, ჭირის სუფრის, ქორწილების შემდეგ. გასაგებია, რომ პირბადით სუფრასთან ვერ დაჯდები. ჩვენი პირველი მტერი არის სუფრა. სადაც რეგულაციები დაცულია, იქ კორონავირუსის გავრცელების რისკი არის დაბალი. ჩვენ ხომ ვხედავთ, სადაც ეპიდაფეთქებებია, იმ დასახლებულ პუნქტებში მკაცრდება რეჟიმი“, – განაცხადა პაატა იმნაძემ.
ამასთან, როგორც იმნაძემ განაცხადა, იგეგმება ვაქცინაციის ცენტრების დამატება არა მხოლოდ თბილისში, არამედ მთელ საქართველოში.
„რა თქმა უნდა, იგეგმება ვაქცინაციის ცენტრების დამატება არა მარტო თბილისში, არამედ მთელ საქართველოში“, – აღნიშნა პაატა იმნაძემ.
რეგულაციებისგან შეზღუდული სექტორი კი მძიმე ფინანსურ დანაკარგებსა და მართვის ცუდ პრაქტიკაზე აპელირებს. რამდენიმე დღის წინ, 14-მდე ბიზნესასოციაციამ პრემიერთან შეხვედრა და შეზღუდვების შემსუბუქება მოითხოვა. ბიზნესასოციაციებმა მთავრობის მეთაურს მიმართეს და ექვსპუნქტიან გეგმა შესთავაზეს, რომელთა შორისაა ღამის საათებში გადაადგილებაზე შეზღუდვის მოხსნა და შაბათ-კვირას რეგულაციების დაცვით სარესტორნო ბიზნესის ფუნქციონირება.
რესტორატორთა ასოციაციის დამფუძნებლის, შოთა ბურჯანაძის განცხადებით, ტურისტების მიღება აუცილებელია ქვეყნისთვის, წინააღმდეგ შემთხვევაში ეკონომიკის გადარჩენა რთული იქნება.
როგორც ბურჯანაძე განმარტავს, სხვადასხვა ბიზნესასოციაციასთან ერთად, შეზღუდვების შემსუბუქების მოთხოვნას პრემიერ-მინისტრთან შეხვედრაზე დააყენებს.
„დღეს ასეთი იწილო-ბიწილო და კატა-თაგვობანას თამაში, გააღე-დაკეტე, ვერ გადაარჩენს, ვერ მისცემს საზოგადოებას ამოსუნთქვის საშუალებას. აუცილებელია ვაქცინაცია და იმ პროპაგანდის გატარება, რომ ვაქცინაცია ამ შემთხვევაში არის გადარჩენა და არა პრობლემის შექმნა. დაახლოებით 9 თვეა გამოცხადებულია „კომენდანტის საათი“, რომელიც წარმოუდგენელია საზოგადოებისთვის.
ეს ვითარება უნდა შეიცვალოს. სარესტორნო სფეროს პრობლემები აქვს შაბათ-კვირას დაწესებული შეზღუდვის გამო. ამოსავალი წერტილი, ეს არის სამუშაო ჯგუფის შექმნა, რომელიც იზრუნებს კოვიდ ვითარების გამოსწორებაზე და ეკონომიკის გადარჩენაზე. ეს არის ძირითადი მოთხოვნა, პრემიერთან, რომელიც შეგვიძლია გავუზიაროთ“,- განაცხადა შოთა ბურჯანაძემ.
რესტორატორთა ასოციაციის პრეზიდენტის, კოტე გაბრიჩიძის თქმით კი, დღეს ხალხი ლეგალური და სანიტარულად დაცული ზონიდან, გაძევებულია იატაკქვეშეთში.
მისი თქმით, წელიწადზე მეტია ექსპერიმენტები ტარდება, რომ ჩაკეტვების ხარჯზე შეიძლება თუ არა ვებრძოლოთ ვირუსს.
„წარამარა იშვერენ ხელს რესტორანზე, ხალხი ლეგალური და სანიტარულად დაცული ზონიდან გადაწყვეტილებებით გაძევებულია იატაკქვეშეთში.
ვერანაირ შედეგს ეს ჩაკეტვა ვერ გვაძლევს, ამიტომ მივბაძოთ იმ ქვეყნებს, რომლებიც, არც კეტავენ ეკონომიკას ან თუ კეტავენ, ძალიან მიზერულად. ეკონომიკაც აქვთ გადარჩენილი და ვირუსსაც წარმატებით ებრძვიან. ჩვენი აქცენტია: მოდი, ვმართოთ პროცესი და არა უბრალოდ დაკეტვა.
ტრანსპორტი ან საერთოდ არ უნდა იყოს, ან თუ არის, ყირაზე უნდა გადადიოდეს შიგნით ხალხი. შუალედური ჩვენ რატომღაც არ ვიცით.
წარამარა იშვერენ ხელს რესტორანზე, რომ მიზეზი ის არის, მაგრამ სინამდვილეში ხალხი ლეგალური და სანიტარულად დაცული ზონიდან ამ გადაწყვეტილებებით გაძევებულია „იატაკქვეშეთში“.
ხალხი მიდის და სახლში მართავს ღონისძიებას, ქირაობენ ფართებს, „სეფა“ ეზოში და ა.შ. ეს ხომ რესტორანი არ არის, ეს არის არასწორი მართვის შედეგი. ჩვენ წინადადებით მივმართავთ მთავრობას, გადაეწყოს მართვის რეჟიმზე”, – განაცხადა კოტე გაბრიჩიძემ.
როგორც მან აღნიშნა, გადაწყევეტილების მიღება იგვიანებს, რაც მათთვის ზარალია.
„ეს საბჭო გადაიქცა აკრძალვების საბჭოდ და არა მართვის საბჭოდ. რაც შეეხება ვაქცინაციას, სჭირდება პროპაგანდა. გვეგონა ეს თავისთავად წავიდოდა, მაგრამ ასე არ მოხდა. სასწრაფოდ არის გადაწყვეტილება მისაღები, როგორ უნდა მოვიქცეთ, რომ “მე ვუთმობ გზას სასწრაფოს” არის ძალიან ადვილი გასაკეთებელი, იგივე მეთოდი ვაქცინაზეც.
საკმაოდ ნაზად და ნელა ხდება გადაწყვეტილების მიღება და დროს ვკარგავთ. სხვა უფრო სწრაფად იცრება და ეკონომიკის აღდგენა ხდება. ყველაზე მეტად დაკეტილი ქვეყანა ვიყავით, როდესაც ყველაზე სუსტი ეკონომიკა გვაქვს. დაკეტვა და აკრძალვა შეუძლია იმ მდიდარ ქვეყანას, რომელსაც აქვს ამის საშუალება. გადაწყვეტილებების მიღება იგვიანებს, რაც ზარალია. კომპანიები ვეღარ აღდგება, თუ ის გაკოტრდა”, – აღნიშნა გაბრიჩიძემ.
bfm.ge