პარტია „ქართული ოცნების“ ყოფილმა თავმჯდომარემ ბიძინა ივანიშვილმა თავისი ბიზნესების და უძრავი ქონების მნიშვნელოვანი ნაწილი, რომელსაც ოფშორული კომპანიების გავლით ფლობდა, „ფონდ ქართუზე“ საქველმოქმედო მიზნით გადააფორმა. როგორც ცნობილია, საჯარო რეესტრში ცვლილებები 2020 წლის დეკემბრის ბოლო დღეებში დარეგისტრირდა.
ყველაზე მსხვილი ცვლილება 31 დეკემბერს დარეგისტრირდა, როდესაც „ტურიზმის განვითარების ფონდი” (GTDF), რომლის საკუთრებაშიც თავისმხრივ „პანორამა თბილისის” მშენებარე ობიექტები და „პარაგრაფ შეკვეთილი” შედიან „ქართუ ფონდს“ გადაეცა. ცვლილებამდე ამ კომპანიების 100%-იან წილს პანამური FRANKSTON INTERNATIONAL S.A. ფლობდა. ტურიზმის განვითარებაზე ორიენტირებული საინვესტიციო პროექტებისთვის „საქართველოს ტურიზმის განვითარების ფონდი“ 2016 წელს „საქართველოს თანაინვესტირების ფონდის“ ინიციატივით შეიქმნა, სწორედ ის მართავდა ბიძინა ივანიშვილის მნიშვნელოვან პროქტებს.
„საქართველოს ტურიზმის განვითარების ფონდის“ საკუთრებაში არსებული აქტივები გრძელ სიას მოიცავს: შპს „თბილისი სითის“, შპს „სოლოლაკი ჰილზ“, შპს „სოლოლაკი რაიზ“, შპს „თაბორი რიზორთს“ და შპს „ჯორჯიან ეკო ტრანსპორტს“. ყველა მათგანი მრავალმილიონიანი სადავო პროექტის „პანორამა თბილისის“ პროექტის ნაწილია.
გარდა ამისა, ფონდის მფლობელობაში არსებული და შემდეგ ფონდ „ქართუსთვის“ გადაცემული სხვა კომპანიებია: შპს „ბიზნეს დეველოპმენტ“, შპს „სისაიდი“, შპს „ბლექ სი რიზორთსი“ და შპს „ბლექ სი რივიერა“ – ყველა მათგანი სტუმართმასპინძლობის ბიზნესშია ჩართული, ან საქართველოს საზღვაო კურორტებზე ფლობენ საკუთრებას, მათ შორისაა მწვანე კონცხი, სადაც ცნობილი ბოტანიკური ბაღი მდებარეობს და სასტუმრო „პარაგრაფი“ შეკვეთილში.
„კომერსანტი“ დაინტერესდა, მას შემდეგ რაც ივანიშვილმა „ქართუ ფონდს“ გადასცა „თანაინვესტირების ფონდის“ ძირითადი პროექტები, ხომ არ დაკარგა მან თავისი ფუნქცია და რჩება თუ არა ბიძინა ივანიშვილი ფონდის მთავარ ბენეფიციარად. როგორც „თანაინვესტირების ფონდში“ გვითხრეს, მიუხედავად იმისა, რომ „საქართველოს ტურიზმის განვითარების ფონდს“ შეეცვალა მესაკუთრე, „საქართველოს თანაინვესტირების ფონდი“ როგორც მართავდა უწინდებურად ყველა პროექტს, იგივე სტილით მართვას გააგრძელებს ახლაც და არც მთავარი ინვესტორი შეცვლილა, ის ისევ ბიძინა ივანიშვილია.
„საქართველოს ტურიზმის განვითარების ფონდს (GTDF) შეეცვალა მესაკუთრე. პანამაში რეგისტრირებული კომპანიის ნაცვლად GTDF-ის მფლობელი იქნება ქართუ ფონდი. საქართველოს თანაინვესტირების ფონდი როგორც მართავდა უწინდებურად ყველა პროექტს, იგივე სტილით მართვას გააგრძელებს ახლაც, შესაბამისად თანაინვესტირების ფონდის ფუნქცია ამ პროექტებთან მიმართებაში არ შეცვლილა. მესაკუთრის ცვლილება კი აღინიშნება იმ გარემოებაზე, რომ აღნიშნული პროექტებიდან მიღებული ყველა საოპერაციო შემოსავალი ან აღნიშნული პროექტების გასხვისებიდან მიღებული ნებისმიერი შემოსავალი მოხმარდება საქველმოქმედო საქმიანობას.
საქართველოს ტურიზმის განვითარების ფონდის პროექტების პარალელურად თანაინვესტირების ფონდი მართავს კომერციულ პროექტებს უძრავი ქონების, სოფლის მეურნეობის, ენერგეტიკის და მრეწველობის მიმართულებით. საქართველოს თანაინვესტირების ფონდი სხვადასხვა სექტორში 9 პროექტს აერთიანებს. სოფლის მეურნეობის მიმართულებით ჩვენ გვაქვს სამი პროექტი, კერძოდ: „საქართველოს სათბურის კორპორაცია“, „გეოაგრო“ და „ქართული აგრო სახლი“. უძრავი ქონების მიმართულებით საქართველოს თანაინვესტირების ფონდის პროექტების ნუსხაში წარმოდგენილია 2 პროექტი: „ აქსის თაუერსი“ და „გალერია თბილისი“, მრეწველობის მიმართულებით ფონდი წარმოდგენილია 1 პროექტის სახით, კერძოდ: „ჰაიდელბერგ ცემენტით“, ხოლო ენერგეტიკის მიმართულებით ჩვენ ვახორციელებთ სამ მსხვილ პროექტს, კერძოდ: „მტკვარი ჰესი“, „ონი 1“ და „ლენტეხი ჰესი“.
გარდა ამისა, საქართველოს თანაინვესტირების ფონდის მთავარი ინვესტორია ბატონი ბიძინა ივანიშვილი. საქართველოს თანაინვესტირების ფონდის ინვესტორთა სტრუქტურა არ შეცვლილა“, - აცხადებენ „თანაინვესტირების ფონდში“.
ნინო თამაზაშვილი