„საქნახშირში“ სამუშაო პირობების გაუმჯობესებისა და უსაფრთხო გარემოს შექმნის მიზნით აქტიური მუშაობა მიმდინარეობს. კომპანიაში საწარმოო პროცესები 2019 წლის ნოემბრიდან აღდგა. 15 თვიანი ჩავარდნის მიუხედავად „საქნახშირს“ არ შეუჩერებია თანამშრომლებისთვის ხელფასის გადახდა და ამის პარალელურად, უსაფრთხო სამუშაო გარემოს შექმნის მიზნით, დაიწყო არსებული ინფრასტრუქტურის განახლება. აღნიშნული პროცესები უსაფრთხოების დაცვის საერთაშორისო კომპანია DMT-სთან თანამშრომლობით მიმდინარეობს. 

შახტის დირექტორის მოადგილე წარმოების დარგში, ბადრი არაბიძე მიმდინარე პროცესებთან დაკავშირებით კომენტარს აკეთებს:

„ნოემბრიდან, ფაქტობრივად ნულიდან დავიწყეთ საქმიანობა. ამჟამად უკუგება არ გვაქვს, თუმცა ხელფასებს ვიხდით. აქტიურად ვმუშაობთ, რომ თანამშრომლებისთვის შევქმნათ უსაფრთხო სამუშაო გარემო და ერთობლივი ძალისხმევით გავზარდოთ წარმოება. განსაკუთრებული კონტროლით ვატარებთ ბურღვა-ფეთქვით სამუშაოებს და პარალელურად, ვაახლებთ ინფრასტრუქტურას. ჩვენი მიზანია, მაქსიმალურად გამოვიყენოთ არსებული რესურსი, ამ რთულ სიტუაციაში წვლილი შევიტანოთ საქართველოს ეკონომიკის განვითარების საქმეში; რაც მთავარია, უზრუნველვყოთ უსაფრთხოება, ჩვენი თანამშრომლები იყვნენ დასაქმებულები და ხელი შევუწყოთ რეგიონის განვითარებას. ჩვენი პრიორიტეტია საერთაშორისო სტანდარტების შესაბამისი უსაფრთხო სამუშაო გარემოს შექმნა.

აღნიშნული მიმართულებით ამ ეტაპზე კომპანიამ უკვე განახორციელა მნიშვნელოვანი ცვლილებები, კერძოდ: 

განახლდა საშხაპეები/აბანო-გარდერობები; თანამედროვე სტანდარტების შესაბამისად გარემონტდა სასადილო, აღიჭურვა ახალი ინვენტარითა და ტექნიკით.
ხანძარსაწინააღმდეგო და პროფილაქტიკური ლამის მისაწოდებელი მილები ჩვენი ძირითადი ხანძარსაწინააღმდეგო საშუალებაა და თითქმის ყველა უბანი უკვე აღჭურვილია ამ სისტემით; ბოლო თვენახევრის განმავლობაში ორი ახალი სახალხო ვაგონი დამზადდა და მალე გაეშვება ექსპლუატაციაში (მზადდება მესამე ვაგონიც); აღდგა მწყობრიდან გამოსული მექანიზმები; შემოვიდა უკეთესი, უფრო საიმედო გაზის საზომი აპარატები, გამართულად მუშაობს ავტომატური საგაზო დაცვა (რომელსაც სპეციალური სამსახური აკონტროლებს).

გარდა ამისა, 3 თვის განმავლობაში დაახლოებით 10 კილომეტრის ძირითადი კაპიტალური გვირაბები გაიწმინდა სამთო მასისაგან და არასაჭირო ნარჩენებისაგან, რომლებიც ხელს უშლიდა გადაადგილებას. უბნებზე, სადაც სალიანდაგო მეურნეობა აღარ არსებობდა, ჩატარდა აღდგენითი სამუშაოები და დაგებულია 800 მეტრის კაპიტალური გზა. ზოგიერთ უბანზე მთლიანად ახალი სალიანდაგო გზა გადაეგო და მოეწყო სატვირთო პუნქტი.

ქვა-ნახშირის ტრანსპორტირების სქემის გამარტივების მიზნით, „ძიძიგურის შახტის“ N4 უბანში დაჩქარებული წესით გავიყვანეთ გამონამუშევარი. იქიდან უკვე ხდება ქვანახშირის ტრანსპორტირება, რაც საქმეს უადვილებს ჩვენს თანამშრომლებს და ხელს უწყობს წარმადობას. ამ ეტაპზე დაჩქარებული ტემპით მიმდინარეობს ახალი, მეცამეტე ამოსაღები ველის დამზადება.

ამ ყველაფრის პარალელურად, თავდაუზოგავად ვმუშაობთ ვირუსის გავრცელების თავიდან ასაცილებლად. „საქნახშირის“ ვირუსის საპრევენციო შტაბი ყოველდღიურად აკონტროლებს, რომ კომპანიის ტერიტორიაზე დაცული იყოს ჯანდაცვის მსოფლიო ორგანიზაციისა და საქართველოს ჯანდაცვის სამინისტროს რეკომენდაციები“.

შეგახსენებთ, რომ 2018 წლის ივლისიდან კომპანია „საქნახშირში“ წარმოება გაჩერებული იყო. შახტებზე სამუშაო პროცესები 2019 წლის ნოემბრიდან განახლდა. მიუხედავად ამისა, „საქნახშირის“ მენეჯმენტს არ შეუჩერებია თანამშრომლებისთვის ხელფასის გადახდა. ამ ეტაპისთვის, კომპანიის კიდევ ერთ პრიორიტეტს პანდემიასთან ბრძოლა და ვირუსის გავრცელების პრევენცია წარმოადგენს. „საქნახშირის“ ტერიტორიაზე სამუშაო პროცესები უსაფრთხოების ზომების სრული დაცვით მიმდინარეობს.

(NS)