სტატისტიკის ეროვნული სამსახურის ინფორმაციით საქართველოში საარსებო მინიმუმის ოდენობა კიდევ შემცირდა.

საქსტატის მონაცემებზე დაყრდნობით, 2020 წლის ივლისში, ამავე წლის ივნისთან შედარებით, საშუალო მომხმარებლის საარსებო მინიმუმი 2.7 ლარით შემცირდა და 162.6 ლარს შეადგენს.

მიმდინარე პროცესების შესაფასებლად „კომერსანტი“ ეკონომიკის ექსპერტს ნიკა შენგელიას დაუკავშირდა.

საკითხთან დაკავშირებით, ეკონომიკის ექსპერტი ნიკა შენგელია კომერსანტთან განმარტავს, რომ  საქმე „ფასების დამახინჯებასთან“ გვაქვს, რადგან მთავრობის მიერ უმუშევრობის პირობებში გაცემული 200 ლარიანი დახმარება საარსებო მინიმუმზე მაღალი გამოჩნდება. 

ასევე, როგორც ნიკა შენგელია აღნიშნავს, საქსტატი ტრანსპორტისა და კომუნალური გადასახადების ხარჯებს არ ითვალისწინებს და საარსებო მინიმუმის ოდენობას მხოლოდ საკვების მინიმალური ნორმის მიხედვით ანგარიშობს.

„საარსებო მინიმუმი რეალურად არ ასახავს დღევანდელ მდგომარეობას და თუ დავაკვირდებით, ის ოქტომბრის თვიდან მოიმატებს.

ბაზარზე შემოსული შიდა პროდუქტებისა და სასოფლო სამეურნეო პროდუქტებზე ფასების დაკორექტირების ფონზე, ნაკლები თანხის დახარჯვა დაფიქსირდა, რამაც საარსებო მინიმუმის კლება გამოიწვია,“ - განმარტავს ნიკა შენგელია.

სტატისტიკის ეროვნული სამსახური საარსებო მინიმუმს მინიმალური სასურსათო კალათის საფუძველზე ადგენს. მინიმალური სასურსათო კალათა კი შრომისუნარიანი ასაკის მამაკაცის ნორმალური სიცოცხლისა და შრომისუნარიანობისთვის ფიზიოლოგიურად აუცილებელი საკვების რაოდენობას შეიცავს.

საარსებო მინიმუმის სასურსათო კალათა შედგება 40 დასახელების პროდუქტისგან – პური, ბურღულეული, ხორცი, რძის პროდუქტები, ბოსტნეული და საკონდიტრო ნაწარმი.

რაც შეეხება საარსებო მინიმუმს სულადობის მიხედვით, ივლისში შემდეგი მონაცემები ფიქსირდება: ერთსულიან ოჯახზე თანხა 162.6 ლარით განისაზღვრა, ორსულიანი – 260.1 ლარით, სამსულიანი – 292.6 ლარით, ოთხსულიანი – 325.1 ლარი, ხუთსულიანი – 363.7 ლარი, ექვსსულიანი და მეტი – 432.4 ლარი.

ანი ცარციძე