გადაცემაში „ბიზნესი და სამართალი ნინო ლიპარტიასთან ერთად“ საზღვაო ტრანსპორტის სააგენტოს დირექტორის მოადგილემ, საერთაშორისო საზღვაო სამართლის მაგისტრმა, ივანე აბაშიძემ საქართველოში საზღვაო ურთიერთობის რეგულირების მექანიზმებზე ისაუბრა.
მისი თქმით, საქართველოში ზღვა არ არის აღქმული,როგორც ეკონომიკური, პოლიტიკური და გეოპოლიტიკური აქტივი.
შავი ზღვა სქართველოს აკავშირებს უმსხვილეს ეკონომიკებთან და ჩვენი ნავსადგურები არის უმსხვილესი ბიზნეს აქტორი,რომელთა საშუალებითაც ხორციელდება საზღვაო გადაზიდვები. ზოგადად, მთლიანი გადაზიდვების 90%-მდე მსოფლიო ზღვაზე მოდის და ზღვის გამოყენება უმნიშვნელოვანესი აქტივია, მას სტრატეგიული მნიშვნელობა აქვს.
ჩვენ გვაქვს ლიბერალური რეგულაციები, თუმცა სახელმწიფო მაქსიმალურად ხელს უწყობს,რომ განვითარდეს ეს ურთიერთობები, რაც ჩვენს სანავსადგურე სექტორსა და ინტერმოდალურ კონტექსტში მნიშვნელოვან როლს თამაშობს. ბევრი ნაბიჯი გადაიდგა ამ მიმართულებით. ჩვენ შევქმენით სამართლებრივი ბაზისი,რომელიც 2011 წლამდე ჩვენი საზღვაო სატრანსპორტო სააგენტოს ეროვნული მარეგულირებლის ჩამოყალიბებამდე არ არსებობდა, იყო რამდენიმე დოკუმენტი,რომლის გარშემოც ხდებოდა ურთიერთობების აწყობა. ჩვენ ეკონომიკის სამინისტროსთან ერთად აქტიურად დავიწყეთ ამ დარგის გამოღვიძება, რაც მარეგულირებლისა და ბიზნესის ურთიერთობის წარმატებული მაგალითია.
ფოთის ნავსადგურში ჩვენ გვქონდა სერიოზული პრობლემა ამინდთან დაკავშირებით, რის გამოც პორტი იკეტებოდა ხოლმე, თუმცა მნიშვნელოვანი ინვესტიციებისა და სახელმწიფოს მიერ განხორციელებული ეფექტური რეგულაციის პირობებში მინიმუმამდე დავიდა დახურვის დღეები, რაც იმის მესამედიც არ არის, რაც წინა წლებში იყო,- ამბობს ივანე აბაშიძე.
მან აღნიშნა,რომ საზღვაო დარგის რეგულირება საქართველოში სამი მიმართულებით ხდება : მეზღვაურების, ნავსადგურებისა და საქართველოს სახელმწიფო საზღვა დროშის.
ჩვენ ფაქტობრივად, ვასრულებთ watchdog-ის ფუნქციას, ინდუსტრიის მაჯისცემას ვაწვდით სახელმწიფოს და ვართ ხიდი ბევრ საკითხებში სახელმწიფო ორგანოებთან ურთიერთობისას. საქართველოში საზღვაო განათლებას 100 წელზე მეტი ისტორია აქვს, პირველი საზღვაო კლასები ნიკო ნიკოლაძის ინიციატივით გაიხსნა ფოთში, ხოლო ოციან წლებში დაარსდა ბათუმის საზღვაო აკადემია. ჩვენ გვყავს კვალიფიციური მასწავლებლები და მეზღვაურები, მსხვილი თანამედროვე-ტექნიკური ბაზა და უცხოელ გემთმფლობელებს ვთავაზობს კომპეტენტურ სამუშაო ძალას,რომელიც ასოცირდება ბევრ ისტორიასთან და გმირობასთან.- ამბობს ივანე აბაშიძე.
ნინო ლიპარტია
