სავაჭრო ცენტრებში, კინოთეატრებში, მაღაზიებსა თუ სადგურებში ვიზიტისას ხშირად ბარგთან დაკავშირებული პრობლემა იქმნება, რადგან ასეთი დაწესებულებების დიდი ნაწილი არ არის აღჭურვილი შემნახველი ყუთების დაცული სისტემით.
სწორედ ამიტომ, Edison Tech Solution-ის გუნდმა გადაწყვიტა, საქართველოში დაემზადებინა ჭკვიანი შემნახველი ყუთები და ასე, შეექმნა იაფი და კონკურენტუნარიანი პროდუქტი როგორც ქართულ, ასევე საერთაშორისო ბაზარზე. პირველ ასეთ ჭკვიან შემნახველ ყუთს, რომელსაც „ედისონის“ გუნდში „ლოქერს“ უწოდებენ, სავაჭრო ცენტრ „გალერია თბილისში“ შეხვდებით.
მისი დახმარებით, სენსორულ ეკრანზე შეძლებთ აირჩიოთ სასურველი ზომის ყუთი და შეინახოთ ბარგი/ნივთი დაცულად, სანამ შოპინგით იქნებით დაკავებული. აღნიშნული პრაქტიკა მსოფლიოში საკმაოდ გავრცელებულია, თუმცა, როგორც Edison-ის დამფუძნებელი – გივი ბერიძე გვიყვება, საქართველოში, ამ კუთხით, აქამდე საკმაოდ მოძველებულ გადაწყვეტას ვიყენებდით:
„დღემდე ყველა იყენებდა ერთ სისტემას: რკინის ყუთებს, რომლებიც იღება/იკეტება რკინის გასაღებით. ამ შემთხვევაში, იმის გარკვევა, თუ რომელ ყუთში შეინახე შენი ნივთი, შესაძლებელია ყუთებსა და გასაღებებზე დატანილი ნომრით. ეს არის, ალბათ, წინა საუკუნის გადაწყვეტა, რომელიც უამრავჯერ დამტკიცდა, რომ ძალიან ცუდია, რადგან ეს გასაღებები იკარგება/ფუჭდება და ხშირადაა ისეთი სიტუაცია, როცა 1 გასაღები აღებს 2 ან რამდენიმე ყუთს, რაც დამატებით პრობლემებს ქმნის.
ჩვენ პრობლემის გადაჭრას მივუდექით თანამედროვე გზით. შეიქმნა ჭკვიანი ლოქერი, რომელიც იმართება ერთი სენსორული ეკრანით. ვიზიტორს შეუძლია ეკრანზე ნახოს, რომელი ყუთებია დაკავებული და რომელი თავისუფალი, თითის ერთი დაჭერით გააღოს შესაბამისი ყუთი და მოათავსოს თავისი ნივთი. ამის შემდეგ, ის იღებს PIN კოდსა და ბეჭდური სახით, QR კოდს. გასვლის წინ, თუ დაგავიწყდა სად შეინახე შენი ნივთი არც ეგაა პრობლემა, ასკანერებ კოდს და ლოქერი ავტომატურად გააღებს შესაბამის უჯრას, საიდანაც აიღებ შენს ნივთს. გარდა ამისა, ასეთი ტიპის გადაწყვეტა არის იდეალური საშუალება, რომლის მეშვეობითაც, პანდემიის პირობებში, საკურიერო/საფოსტო სერვისები ამანათსა თუ წერილს უსაფრთხოდ დაუტოვებენ ადრესატს. მიმღებს მიუვა შესაბამისი კოდი, რითიც შეძლებს კარადის გაღებას“, – ამბობს გივი ბერიძე.
ჭკვიანი ყუთები დიზაინის, მოწყობილობისა თუ პროგრამულ დონეზე მთლიანად „ედისონის“ გუნდის მიერაა შექმნილი?
შეიძლება ითქვას, რომ ლოქერი სრულად წარმოებულია საქართველოში. Edison Tech-ში დაიხაზა პლატები, რომლებიც ამ ლოქერებს მართავენ და შეიქმნა პროგრამული უზრუნველყოფა, რომლითაც ლოქერის მფლობელები აკონტროლებენ პროცესს, ხოლო მომხმარებლები აღებენ. ხოლო ჭკვიანი შემნახველი ყუთების კარკასი ადგილობრივ საწარმოში შეიქმნა და შეიღება ჩვენ მიერ შექმნილი 3D მოდელის მიხედვით. საბოლოო ჯამში კი, მივიღეთ კიდევ ერთი ქართული პროდუქტი, რომელსაც პოტენციალი აქვს როგორც ადგილობრივ ისე საერთაშორისო ბაზარზე, რადგან წარმოების ავტომატიზაცია მის ფასს საგრძნობლად აიაფებს, თუნდაც ჩინურ ბაზართან შედარებით.
რა მნიშვნელობისაა ჭკვიანი შემნახველი ყუთების შექმნის პრეცედენტი ქართული ტექნოლოგიური ინდუსტრიისთვის?ეს პროექტი, მსოფლიო ბაზარზე, გრანდიოზულ ტექნოლოგიურ სიახლეს არ წარმოადგენს, მაგრამ ეს არის პრეცედენტი იმისა, რომ პროდუქტი რომელიც ჩინეთის ბაზარზე იყიდება, შეიქმნა საქართველოში, ბევრად ნაკლები დანახარჯებით ისე, რომ გასაყიდი ფასიც კი უფრო ნაკლებია მათ გასაყიდ ფასზე. ეს კი ნათლად ასახავს საქართველოს პოტენციალს, რომლის იდეასაც Edison Tech Solutions ატარებს. ჩვენ შეგვიძლია ტექნოლოგიური პროდუქტების წარმოება და ექსპორტი, რაშიც ხარისხითა და ფასით შევეჯიბრებით სხვა ქვეყნებს.
იგეგმება, თუ არა სხვა სავაჭრო ცენტრებსა თუ მსგავს დაწესებულებებში საქართველოში წარმოებული ჭკვიანი ყუთების დამონტაჟება? „გალერია თბილისის“ გარდა, სად უნდა ველოდოთ თქვენს პროდუქტს უახლოეს მომავალში?
ლოქერი Galleria Tbilisi-სთვის შეიქმნა პანდემიამდე. ახლახან დავაანონსეთ მისი არსებობა და უკვე ძალიან დიდი ინტერესი გამოიწვია სხვადასხვა სავაჭრო ცენტრებსა და დაწესებულებებში. ვფიქრობთ, სხვადასხვა სავაჭრო ცენტრები, სადგურები და დაწესებულებები მალე შემოგვიერთდებიან და ერთობლივად გავხდით ამა თუ იმ ადგილის ვიზიტს უფრო კომფორტულს. ამ ეტაპზე გვსურს ქართულ ბაზარზე გავავრცელოთ ეს ტექნოლოგია, სამომავლოდ კი მის ექსპორტზე ვიმუშავებთ.
წყარო: MARKETER.GE