თბილისში სასტუმროებისა და ტურიზმის მენეჯმენტის პირველი საერთაშორისო უნივერსიტეტი იხსნება, რომელიც ფრანგული ბიზნეს სკოლის – „ვატელის” ეგიდითა და ბრენდით იქნება წარმოდგენილი, „ბლოკ ჯგუფის“ და სეუ-ს ერთობლივი პროექტია.

კომპანია „ბლოკ ჯგუფის“ აღმასრულებელი დირექტორი თორნიკე ჯანაშვილი „კომერსანტთან“ აცხადებს, რომ საწყის ეტაპზე საუბარია პროფესიული ტრენინგების დაწყებაზე, რომელიც Vatel-ის სასერთიფიკატო კურსები იქნება. 3, 6 ან 12 თვიანი კურსებზე სწავლის შესაძლებლობა 16 წლიდან ნებისმიერ ადამიანს ექნება.

„ამ ეტაპზე მუშაობა მიდის ფრანგულ პროგრამაზე, რომელმაც აკრედიტაცია უნდა გაიაროს, საკმაოდ ბევრი დეტალია შესათანხმებელი, როგორც საფრანგეთის ასევე საქართველოს განათლების სამინისტროებთან. სწორედ ამ იურიდიულ, ტექნიკურ და ბიუროკრატიულ დეტალებს გავდივართ, წესით ძალიან მალე უნდა მოგვარდეს ყველაფერი და ჩვენი გეგმებით სასწავლებელს მალე გავხსნით. სავარაუდოდ სტუდენტებს მომავალ წელს ან მაქსიმუმ 2024 წელს მივიღებთ. მართალია მიმდინარე წელს როგორც ვგეგმავდით მაგისტრატურაზე და ბაკალავრიატზე სტუდენტებს ვერ მივიღებთ, თუმცა პროფესიული სასწავლების და ტრეინინგების ნაწილი გვინდა ავამუშაოთ, რაც სავარაუდოდ წელს მოხდება და ამ მიმართულებით ბევრი დაინტერესებული ადამიანი გვყავს“, — ამბობს თორნიკე ჯანაშვილი.

მისი პროგნოზით, ტურიზმის სექტორის განვითარების პარალელურად და ამ სფეროში კვალიფიციური კადრების დეფიციტის ფონზე, სასწავლებელზე მოთხოვნა მაღალი იქნება როგორც საქართველოში, ასევე უცხოელი სტუდენტების მხრიდან.

„დარწმუნებულები ვართ, რომ მოთხოვნა მაღალი იქნება, რადგან ტურიზმის სექტორი ვითარდება და ამ სფეროში კარგი კადრების დეფიციტია. რაც შეეხება სწავლის ღირებულებას, ქართველი და უცხოელი სტუდენტებისთვის განსხვავებული იქნება. ადგილობრივ სტუდენტებს შეღავათიან პირობებს შევთავაზებთ, რომ როდესაც დასაქმდებიან, შემდეგ თავისი ხელფასიდან გადაიხადონ სწავლის საფასური, ეს მაქსიმალურად ხელმისაწვდომს გახდის პროგრამას.

ეს იქნება ფრანგული უნივერსიტეტი და მოთხოვნა არის არამარტო ქართველებისგან, არამედ უცხოელი სტუდენტებისგანაც, რადგან საქართველოში შესაძლებელი იქნება პირდაპირ ფრანგული დიპლომის აღება, რაც ბევრად უფრო ხელმისაწვდომია, ვიდრე იგივე დიპლომის აღება თუნდაც საფრანგეთში. ჩვენთან შესაძლებელი იქნება უფრო იაფად სწავლა და ცხოვრება, რადგან ისეთ ქვეყანაში, როგორიც საქართველოა, სტუდენტისთვის ყოფნა ბევრად იაფია“, — განმარტავს ჯანიაშვილი.

პროექტში მთლიანობაში 2 მილიონი დოლარის ინვესტიცია ხორციელდება. ტურიზმის მართვის სექტორში მსოფლიოში ყველაზე დიდ ფრანგულ უნივერსიტეტ Vatel-თან კონტრაქტი 2017 წელს გაფორმდა, რომლის მიხედვით, „ბლოკ ჯგუფს“ და საქართველოს ეროვნულ უნივერსიტეტს საქართველოსა და სომხეთში საქმიანობის ექსკლუზიური უფლება მიენიჭა.

ნინო თამაზაშვილი