2021 წლის 14 ივლისი საქართველოს მოსახლეობამ „breaking news“-ით დაიწყო - ყველამ ერთად გავიგეთ, რომ ნანატრი, ამერიკულ-გერმანული წარმოების „Pfizer“-ის ვაქცინა უკვე შემოვიდა. გავიგეთ ისიც, რომ ვაქცინაციისთვის რეგისტრაცია მოქალაქეებს იმავე დღეს 15:00 საათიდან შეეძლებოდათ, თუმცა პირველი იმედგაცრუება მოსახლეობამ მაშინ იწვნია, როდესაც საქართველოს დაავადებათა კონტროლისა და საზოგადოებრივი ჯანდაცვის ცენტრის დირექტორისგან გაიგო, რომ ქვეყანაში სულ 14 ათასი ადამიანის აცრისთვის საკმარისი ვაქცინა ჩამოვიდა. ამირან გამყრელიძემ თქვა ისიც, რომ წარსულის გამოცდილებიდან გამომდინარე, IT სამსახურებმა ყველაფერი გააკეთეს, რომ პორტალს გამართულად ემუშავა.
თბილისის დროით 15:00 საათია, ყველაფერი აქედან იწყება - საქართველოს მოსახლეობის დიდი ნაწილს სახლში, სამსახურში, გზაში, მთაში თუ ბარში booking.moh.gov.ge აქვს გახსნილი, ქვეყანაში საყოველთაო ვაქცინაცია იწყება. ახლა მეორე იმედგაცრუების ჯერია - რეგისტრაციის დაწყების დროს booking.moh.gov.ge გაითიშა.
„მაღალი მიმართვიანობის გამო ვებგვერდი ხარვეზით მუშაობს“, - განაცხადეს ჯანდაცვის სამინისტროში. დაპირებული გამართული საიტი მოსახლეობამ ვერ მიიღო.
მესამე იმედგაცრუების დრო დადგა - გარკვეული დროის შემდეგ საიტი გახსნა, მაგრამ შესაბამისი ველიდან Pfizer-ი გაქრა. შემდეგ მოვისმინეთ ჯანდაცვის მინისტრის გულწრფელი ბოდიში, რომელმაც გვითხრა, რომ დაავადებათა კონტროლის ეროვნულ ცენტრში ყველა შესაძლო IT სამსახურია მივლენილი, რომლებლიც მათთან ერთად ხარვეზის გამოსწორებაზე მუშაობენ. ამ დროს მეოთხე იმედგაცრუებამაც არ დააყოვნა – ხარვეზი გამოსწორდა, თუმცა Pfizer-ზე ასაცრელად ყველა ადგილი უკვე დაკავებული აღმოჩნდა. საქართველოს მოსახლეობამ ვერც დაპირებული Pfizer-ის ვაქცინა მიიღო.
საქართველოს მოსახლეობა, სუბიექტური თუ ობიექტური მიზეზების გამო, Pfizer-ის ვაქცინას რამდენიმე თვეა ელოდება. ამის პარალელურად, თითქმის ყოველდღე საჯარო პირების განცხადებებს ვისმენდით, რომელებიც მოქალაქეებს ვაქცინაციისაკენ მოუწოდებდნენ, მაშინ, როცა ქვეყანაში ვაქცინა არ იყო.
როგორ იტყუება ჯანდაცვის სამინისტრო - ამ სათაურით პროგრამული ინჟინერი გიორგი ლუბარეცი ვიდეოს აქვეყნებს. მისი თქმით, მიუხედავად იმისა, რომ Pfizer-ზე ასაცრელად ყველა ადგილი უკვე დაკავებულია, 10-15 წუთის ინტერვალით შიდა ქართლსა და აჭარაში ერთი ან ორი ადგილი ჩნდებოდა. თუმცა პროგრამისტი ამბობს, რომ უფრო საინტერესო რამ მას შემდეგ მოხდა, რაც Pfizer-ის ვაქცინა საიტიდან საერთოდ გაქრა. საიტის „მოტყუების“ შემდეგ აღმოჩნდა, რომ ადგილები ყოფილა, არა მხოლოდ თბილისში, არამედ სხვა ქალაქებშიც. კომერსანტი გიორგი ლუბარეცის პოსტს გთავაზობთ:
სოციალურ ქსელში მთავრობას Pfizer-ის ვაქცინის მცირე რაოდენობით ჩამოტანისა და შემდეგ რეგისტრაციის პროცესის შეფერხების გამო მკაცრად აკრიტიკებს პოეტი რატი ამაღლობელიც:
„ნახევარი წლის დაგვიანებით რო 14 000 ადამიანის სამყოფ ვაქცინას ჩამოიტან, საიტს რო ვერ გამართავ მერამდენე ჯერზე აღარც მახსოვს, ყოველ დღე ამდენი ადამიანი რო გეღუპება კოვიდით, მე-4 ტალღა რო გაქვს და ყელამდე ძღნერში ხარ - აი რაღა გინდა იმ მთავრობაში, ან ეგეთი მთავრობა ვის გინდათ გამოდით ერთი ცალი თვალით მაინც დამენახეთ გულში ჩაგიკრათ“, - წერს რატი ამაღლობელი.
კრიტიკული იყო ფილოსოფოსი ლევან ღამბაშიძის პოზიციაც, რომელიც წერს, რომ ორი წელია სახელმწიფო უწყებებმა ერთი საიტის გამართვა ვერ შეძლეს.
„წარმოიდგინეთ, გყავთ დაქირავებული ქორწილის ორგანიზატორი. ორი წელი ფულს უხდით რომ ყველაფერმა კარგად ჩაიაროს. ესეც ყოველ დღე გეუბნებათ რომ ყველაფერი კარგად ჩაივლის. ქორწილის დღეს კი აღმოჩნდება, რომ სამი მაგიდა ხალხისთვის მოსაწვევი არ აქვს გადაგზავნილი, ფეიერვერკი არ არის შეკვეთილი და ასეტრინა მოვა მაშარაფის გარეშე. რას უზამთ ასეთ ორგანიზატორს?
ორი წელია ერთი საიტი ვერ გააკეთეს. სხვაზე არაფერზე რომ არ ვილაპარაკოთ. ერთი საიტი.
ჯერ ოპოზიციის ჯინაზე მართული ქვეყნის დედავატირე, მაგრამ დანარჩენები კომფორტულად გრძნობთ თავს ტიკარაძის პირობებში?“, - დაწერა ღამბაშიძემ სოციალურ ქსელში.
ერთიან ნაციონალური მოძრაობის წევრი რომან გოცირიძე კი მიიჩნევს, რომ საქართველოს მთავრობა პანდემიას ვერ მართავს. მისი თქმით, ხელისუფლება ქვეყნის მოქალაქეების სიცოცხლეს და ჯანმრთელობას საფრთხეს უქმნის.
„ვაქცინაციის მხრივ ყველაზე წარმატებულად ითვლება სამი ქვეყანა: ისრაელი, დიდი ბრიტანეთი და ამერიკა. დიდ ბრიტანეთში ერთჯერადად აცრილია თითქმის მთელი მოსახლეობა, ხოლო სრულად - მისი 53 პროცენტი. 19 ივლისიდან ამ ქვეყანაში უქმდება შეზღუდვები, მათ შორის პირბადის ტარების ვალდებულება.
ბრიტანელი ექიმები და მეცნიერები მოუწოდებენ მთავრობას, არ გააუქმოს შეზღუდვები. მოქალაქეებმა დაიწყეს ხელმოწერები (უკვე 180 ათასზე მეტია შეგროვებული) და პეტიციით მიმართავენ მთავრობას, რომ არ მოხდეს პირბადეების სავალდებულო ტარების გაუქმება ინდური შტამის გააქტიურების გამო.
რა გააკეთა ამ დროს საქართველოს მთავრობამ? ჩაფლავებული ვაქცინაციის პირობებში გააუქმა ღია სივრცეში, მასობრივი თავშეყრის ადგილებში პირბადის ტარების ვალდებულება და ფაქტობრივად ხელი შეუწყო მეოთხე ტალღის რამდენიმე თვით ადრე დადგომას. ხალხი მოეშვა და ბევრმა არა მხოლოდ ღია სივრცეებში, არამედ ტრანსპორტში და სხვა დახურულ ადგილებშიც შეწყვიტა პირბადის გამოყენება.
მთავრობამ ეს გადაწყვეტილება მიიღო საარჩევნო კამპანიის დაწყების წინ, რასაც მასობრივი შეკრებები მოჰყვება ხოლმე. შარშან, ასე თუ ისე, შეძლეს ჩვენმა მოქალაქეებმა წინასაარჩევნო პერიოდში ამ მოთხოვნის დაცვა და არც ახლა გაუჭირდებოდათ ამის გაკეთება.
უგუნური მთავრობა აღატაკებს ადამიანებს და საფრთხეს უქმნის ქვეყნის მოქალაქეების სიცოცხლეს და ჯანმრთელობას“, - აცხადებს რომან გოცირიძე.
შეგახსენებთ, რომ ამ დრომდე საქართველოს Pfizer-ის მხოლოდ 29 500 დოზა ჰქონდა მიღებული. ჯანდაცვის სამინისტროში აცხადებენ, რომ ხელშეკრულების ფარგლებში საქართველო ეტაპობრივად 1 000 350 დოზა ვაქცინას მიიღებს, თუმცა დღეს ფაქტი ერთია - საქართველოში საყოველთაო ვაქცინაცია არ დაწყებულა.