საქართველოში ქონების დამზღვევები ან კორპორაციული კლიენტები არიან, ან ის მოქალაქეები, რომლებსაც იპოთეკური დაკრედიტების ვალდებულებების გამო ბანკები აზღვევენ. საერთო ჯამში, უძრავი ქონება მოსახლეობის მხოლოდ 6.9%–ს აქვს დაზღვეული. ამის შესახებ ,,კომერსანტს“ სადაზღვევო კომპანიების ასოციაციის გამგეობის თავმჯდომარემ დევი ხეჩინაშვილმა უთხრა.

მისი თქმით, „ცალკეული შემთხვევების გარდა, საქართველოში ქონებას ნებაყოფლობით არავინ აზღვევს, ამიტომ წარმოდგენაც რთულია, რა მდგომარეობაში აღმოჩნდებიან მოქალაქეები, თუკი ქვეყანაში დიდი მიწისძვრა მოხდება, განსაკუთრებით ურბანულ დასახლებაში“.

,,ქონების დაზღვევის მიმართულებით საქართველოში კატასტროფული მდგომარეობაა. 7%-მდეა დაზღვეული და ისიც კორპორაციული კლიენტების ან ბანკის მომხმარებლების ხარჯზე, ამ ტიპის დაზღვევით საქართველოში ძალიან მცირე ადამიანი სარგებლობს, რეალურად არაფერი არ ხდება. არავინ არ ფიქრობს, დააძალოს და ქონება დააზღვევინოს ვინმეს, აზრი არ აქვს! ცხადია, უნდა იფიქროს მთავრობამ და მოსახლეობამაც, დიდი მიწისძვრა რომ მოხდეს, რას ვაკეთებთ? ანალოგიური საფრთხის წინ აღმოჩნდა თურქეთი რამდენიმე წლის წინ, მიწისძვრის შედეგად დაინგრა ყველაფერი და აღმოჩნდა, რომ 3-4% იყო დაზღვეული, ამის შემდეგ შემოიღეს სავალდებულო დაზღვევა. დაზღვევის შემთხვევაში, დანაკარგი საცხოვრისის დონეზე მაინც დაფინანსდება, რომ ოჯახი ქუჩაში არ დარჩეს. ქონებასთან მიმართებაში, ეს არის მთავარი პრობლემა. დაზღვევა ურბანულ ნაწილში აუცილებელია და ამაზე ყველამ უნდა ვიფიქროთ“, - ამბობს ხეჩინაშვილი.

მისი შეფასებით, ქონების დაზღვევა მართლა არ არის ფუფუნება, ის ადამიანმა უნდა წარმოიდგინოს როგორც ერთ-ერთი ხარჯი, მოქალაქეებს პირდაპირ უნდა ვუთხრათ, რომ ქონება აუცილებლად უნდა იყოს დაზღვეული და მხოლოდ ასე იქნებიან დაცულნი ზარალისგან.

როგორც წესი, ქონების დაზღვევა განკუთვნილია პირებისთვის, რომელთაც სურთ მათ საკუთრებაში თუ სარგებლობაში არსებული უძრავი ქონების - რემონტის, შიდა/გარე მოპირკეთების, კარკასისა და მესამე პირთა წინაშე წარმოქმნილი პასუხისმგებლობის დაზღვევა.

ქონების დაზღვევა მოქალაქეებს იცავს იმ გაუთვალისწინებელი შემთხვევებისას, როდესაც საკუთრებაში ან სარგებლობაში არსებული საცხოვრებელი ადგილი ზიანდება. ამ შემთხვევაში ნაზღაურდება ხანძრის, წყალგაყვანილობის დაზიანების, სტიქიური უბედურებების, ვანდალიზმისა და სხვა რისკების შედეგად მოყენებული ზარალი.

საქართველოს დაზღვევის სახელმწიფო ზედამხედველობის სამსახურის ანგარიშით, საქართველოში ქონება მოსახლეობის მხოლოდ 6.9%–ს, კერძოდ 187 797 მოქალაქეს აქვს დაზღვეული. სადაზღვევო კომპანიების მიერ დაზღვევის ამ სეგმენტში ანაზღაურებულმა ზარალმა 2021 წლის 6 თვის მონაცემებით, 4.7 მილიონი ლარი შეადგინა.

როგორც ანგარიშშია აღნიშნული, დაზღვევის აღნიშნულ სახეობაში ბაზარზე ყველაზე დიდი წილი – 36% „ალდაგს“ უკავია. 2021 წლის 6 თვის მონაცემებით, კომპანიამ ქონების დაზღვევის პორტფელში 26.87 მილიონი ლარი მოიზიდა.

მარი ჩიტაია