ასაკობრივი პენსიის მიმღებ პირთა რაოდენობა 2020 წელს 784 ათასამდე გაიზარდა. მათგან 71% ქალია. პენსიონერთა 29.2% თბილისში ცხოვრობს. დამატებით 174 ათასი ადამიანი სხვადასხვა სახის სოციალურ პაკეტს ღებულობდა.

საქართველოში 2020 წელს პენსია 220 ლარი გახდა, 70 წლის ასაკიდან კი 250 ლარი. მაღალმთიან დასახლებაში მცხოვრებ პენსიონრებს 20-20 პროცენტი ემატებოდათ. შესაბამისად მათი პენსია 264 და 300 ლარს შეადგენდა. მოსახლეობის პენსიით უზრუნველყოფაზე 2.230 მლრდ ლარი იყო გამოყოფილი. 2021 წლის ბიუჯეტში კი 2.600 მლრდ-ა გათვალისწინებული. გარდა იმისა, რომ პენსიონერთა რაოდენობა ყოველწლიურად იზრდება იანვრიდან საბაზისო პენსია 20 ლარით. 70 წელს გადაცილებული პირებისთვის 25 ლარით, მაღალმთიან დასახლებაში მცხოვრებთათვის 24 და 30 ლარით გაიზარდა.

პენსიონერთა რაოდენობამ მოსახლეობის 21%-ს გადააჭარბა. შეიძლება ითქვას, რომ ეს მსოფლიო ტენდენციაა. შობადობა მცირდება და სიცოცხლის საშუალო ხანგრძლივობა იზრდება, რასაც ღარიბი ქვეყნებიდან ახალგაზრდების ემიგრაციაც ემატება. როდესაც საპენსიო დაზღვევაზე მსჯელობდნენ, საკითხი იმის შესახებ სისტემაში ჩართვა სავალდებულო უნდა ყოფილიყო თუ ნებაყოფლობითი საკამათო გახდა. სავალდებულოს მომხრეთა ერთ-ერთ არგუმენტს სწორედ ის ფაქტი წარმოადგენდა, რომ სახელმწიფოს მომავალში პენსიონერთა გაზრდილი რაოდენობისთვის მაღალი პენსიის მიღება გაუჭირდებოდა. საბოლოოდ საპენსიო დაზღვევა 2019 წლის იანვრიდან სავალდებულო წესით ამოქმედდა, პირნციპით 2+2+2, სადაც 2%-ს დასაქმებული იხდის დარიცხული ხელფასიდან და მას მხოლოდ ამის შემდეგ ეჭრება საშემოსავლო, 2%-ს დამსაქმებელი ამატებს, 2%-ს კი სახელმწიფო ბიუჯეტი, რომელიც რეალურად ისევ გადასახადების გადამხდელთა ფულით ივსება. 2020 წელს ამ პროგრამისთვის 200 მლნ ლარი იყო გათვალისწინებული, 2021 წელს თანხა 220 მლნ-მდე გაიზარდა.

იმ ფაქტს, რომ პენსიონერთა 71% ქალია ორი ახსნა აქვს: საქართველოში ისევე როგორც მთელს მსოფლიოში, ქალის საშუალო სიცოცხლის ხანგღლივობა, კაცისას აღემატება. ამასთან ქალები პენსიაზე 60 წლის ასაკიდან გადიან, კაცები 65 წლიდან.

პენსიოერთა გარდა 2020 წელს სხვადასხვა სახის სოციალურ პაკეტს 174 ათასი პირი იღებდა. სოციალური პაკეტის მიმღებთაგან 72.5%-ს შეზღუდული შესაძლებლობის მქონე პირები წარმოადგენენ, 12.6%-ს მარჩენალდაკარგული ოჯახის წევრები, 8.9%-ს - ომის მონაწილეები, 5.7%-ს- სახელმწიფო კომპენსაციის მიმღები პირები, ხოლო 0.3%ს - სხვა სახის სოციალური პაკეტის მიმღები პირები. სოციალური პაკეტის მიმღებ პირთა უმრავლესობა - 65%, პენსიონერთა განსხვავებით კაცია, 35% ქალი.

გიორგი ელიზბარაშვილი